Qoşulmama Hərəkatının Gənclər Şəbəkəsinin məlumat sessiyası keçirilib

Azərbaycan Dövlət İqtisad Universitetində (UNEC) keçirilən tədbirdə çıxış edən Xarici İşlər Nazirliyinin Beynəlxalq Təhlükəsizlik İdarəsinin rəisi Yalçın Rəfiyev Qoşulmama Hərəkatı barədə tələbələrə məlumat verib. Sülhün, təhlükəsizliyin, beynəlxalq hüququn və ədalətin gücləndirilməsinə töhfə vermək məqsədilə Azərbaycanın 2011-ci ildə Qoşulmama Hərəkatı ailəsinə qoşulduğunu bildirib. Qısa müddət ərzində ölkəmizin böyük etimad və hörmət qazandığını, Azərbaycanın 2019-2022-ci illər üçün Qoşulmama Hərəkatının sədri seçildiyini, ölkəmizin sədrliyinin müddətinin bir il uzadıldığını diqqətə çatdırıb.

Sonra Qoşulmama Hərəkatı Gənclər Şəbəkəsinin sədri Orduxan Qəhrəmanzadə və katibliyin rəhbəri Ceyran Cəfərova çıxış ediblər. Bildiriblər ki, Gənclər şəbəkəsinin əsas məqsədi üzv dövlətlərindən olan gənclərin davamlı tərəqqisinə nail olmaq, onların qarşılaşdıqları problemlərin aradan qaldırılması üçün vətəndaşı olduqları ölkələrin birgə və adekvat səyləri barədə fikir mübadiləsinə şəraitin yaradılmasıdır. Çıxış edənlər gələcək layihələr barədə məlumatı da tələbələrlə bölüşüb, gəncləri bu istiqamətdə fəal olmağa dəvət ediblər.

UNEC-in prorektoru dosent Şaiq Əsgərov Qoşulmama Hərəkatının 44 günlük Vətən müharibəsində ölkəmizə göstərdiyi dəstəkdən söz açıb. Prorektor tələbələrin Qoşulmama Hərəkatının Gənclər şəbəkəsində fəallığını artırmaq məqsədilə UNEC-də həmin şəbəkənin universitet üzrə nümayəndəliyinin yaradılmasını təklif edib.

Tədbirdə Qoşulmama Hərəkatının 60 illiyinə həsr edilən videoçarx nümayiş olunduqdan sonra tələbələrlə sual-cavab sessiyası keçirilib.

Azərbaycan.- 2022.- 23 aprel.- S.9.