ADAU ikili diplom proqramına qoşulmuşdur
Ölkədə kənd təsərrüfatı üçün ixtisaslı kadrlar hazırlayan Azərbaycan Dövlət Aqrar Universiteti (ADAU) dünyanın bir çox tanınmış ali təhsil müəssisələri ilə əlaqələrini genişləndirməkdə davam edir.
Prezidentin 2018-ci il 16 noyabr tarixli sərəncamı ilə təsdiq edilmiş "2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı" çərçivəsində ADAU Türkiyənin Ege Universiteti ilə imzalanmış Anlaşma Memorandumuna, habelə Azərbaycan Respublikasının Təhsil Nazirliyi və Türkiyənin Ali Təhsil Şurası tərəfindən təsdiq olunmuş protokola uyğun olaraq, bakalavriat səviyyəsində "Aqronomluq", "Bitki mühafizəsi", "Aqromühəndislik" və "İqtisadiyyat" ixtisaslarına beynəlxalq ikili diplom proqramları üzrə (ödənişsiz) tələbə qəbulunu həyata keçirməyə başlamışdır. Proqram çərçivəsində hər il 120 tələbə 3 il ADAU-da, 1 il isə Ege universitetində ödənişsiz təhsil alacaq. Hər iki ali təhsil müəssisəsinin diplomlarının verilməsi ilə yekunlaşan tədris və təcrübə prosesinin bir hissəsi Ege Universitetində təşkil olunacaq.
Hazırda dərslər hər iki ali təhsil müəssisəsinin təcrübəli professor-müəllim heyəti tərəfindən aparılır. Tələbələrin təhsil müddətində bütün xərclər sözügedən dövlət proqramı çərçivəsində Azərbaycan Respublikası Dövlət Neft Fondunun vəsaiti hesabına ödənilir. Bu xərclərə təhsil haqqı, qeydiyyat xərci, tədris materialları və elektron informasiya resurslarına çıxış xərcləri, Ege Universitetində təhsil, yay məktəbində və istehsalat təcrübəsində iştirak xərcləri daxildir. Tələbələr aylıq stimullaşdırıcı təqaüdlə də təmin olunacaqlar.
Qeyd edək ki, Türkiyənin Ege Universitetinin rektoru prof. dr. Necdet Budakın başçılıq etdiyi nümayəndə heyəti bu ilin may ayında ADAU-da olmuşdur. Səfər çərçivəsində iki universitet arasında həyata keçirilən beynəlxalq ikili diplom proqramının rəhbər komitəsinin iclası da keçirilmişdir. İclasda ikili diplom proqramının icrasının mövcud vəziyyəti və qarşıda duran vəzifələr müzakirə edilmişdir.
Ege Universitetinin rektoru prof. dr. Necdet Budakın başçılıq
etdiyi nümayəndə
heyəti ADAU-nun maddi-texniki
bazası, o cümlədən
Torpaqşünaslıq və
aqrokimya, Baytarlıq təbabəti fakültələrində
yaradılan şəraitlə
tanış olmuş,
müasir auditoriyalar və laboratoriyalara baş çəkmişdir.
Torpaqşünaslıq laboratoriyasında qonaqlara burada aparılan analizlər barədə ətraflı
məlumat verilmişdir.
Qonaqlar Baytarlıq təbabəti
fakültəsinin nəzdində
olan Patoloji Anatomiya muzeyinə baxdıqdan sonra Necdet Budak universitetin
2 saylı Tələbə
evində gənc müəllim və tədqiqatçılar üçün
mühazirə oxumuşdur.
Həmin gün ikili diplom proqramı layihəsində iştirak
edəcək tələbələrlə
görüş də
keçirilmişdir. Görüşdə ikili diplom proqramının
İnformasiya və Koordinasiya ofisində üç ay ərzində
könüllü fəaliyyət
göstərən tələbələrə
sertifikatlar təqdim olunmuşdur.
Universitetin Biotexnologiya mərkəzində
olan qonaqlar bitkilərin müxtəlif
stress amillərinə, xəstəliklərə
qarşı davamlılığının
müəyyən edilməsi
məqsədilə bu
istiqamətlərdə molekulyar
analizlərin həyata
keçirilməsi prosesini
izləmişlər.
Sonra Azərbaycan
Dövlət Aqrar Universiteti və Türkiyənin Ege Universiteti arasında həyata keçirilən
beynəlxalq ikili diplom proqramının rəhbər komitəsinin
növbəti iclası
keçirilmişdir. İclasda birgə
əməkdaşlığın qiymətləndirilməsi, karyera
planlanması üzrə
görüləcək işlər
və gündəlikdə
duran digər məsələlər müzakirə
olunmuşdur.
Görüşdə ADAU-nun rektoru, professor İbrahim Cəfərov və Ege Universitetinin rektoru Necdet Budak ikitərəfli əməkdaşlıq müqaviləsi
imzalamışlar.
Sabir ƏLİYEV
Azərbaycan.- 2022.- 2 avqust.- S.5.