Baş verən insidentin bütün məsuliyyəti Ermənistanın siyasi və hərbi rəhbərliyinin üzərinə düşür

Dərs almasalar, cavab daha sərt olacaq

Ermənilər yenə yollarını azdılar. Bir sözlə, cızıqlarından çıxdılar. Deyəsən, başları yenə "dəmir yumruq" istəyir. Əslinə qalsa, ermənilərin heç vaxt yolu olmayıb. Həmişə ipləri başqalarının əlində olub. Hara çəkiblərsə, ora da gediblər. Müstəqilliyimizi, inkişafımızı gözü götürməyənlər illərdir ki, erməniləri qara ilan kimi yolumuzun üstünə atırlar. Müdriklərin belə bir deyimi var: "Ya bir yol tap, ya bir yol aç, ya da yoldan çəkil". Bu binəvalar nə yol tapa bilirlər, nə yol aça... Nə də yolumuzdan çəkilirlər.

İllərdir ki, Azərbaycan Prezidenti, Müzzəffər Ali Baş Komandan İlham Əliyev dəfələrlə onlara izah edərək anlatmağa çalışıb ki, getdiyiniz bu yol sizi dalana dirəyib. Daha gedə biləcəyiniz bir yer qalmayıb, ya ağıllı olun, ya da ağıllı olacaqsınız. Anlamadılar. Anlamayanla bəzən öz başa düşdüyü dildə danışmaq lazım gəlir. "Dəmir yumruğ"un, gücün, silahın dili ilə. 2020-ci ilin sentyabrında zəfər yürüşünə çıxan Azərbaycan Ordusu ermənini haqq etdiyi yerə kimi qovdu. Qaçdılar! Aman dilədilər! Yalvardılar!

Yıxdığını kəsməmək, aman diləyənə rəhm etmək türkün böyüklüyündəndir. Böyüklük etdik, "ağıllı ol" dedik. 2020-ci il noyabrın 10-da üçtərəfli Bəyanat imzalandı. İmzalanan Bəyanatla Ermənistan hökuməti Azərbaycan ərazisindəki qeyri-qanuni erməni silahlı dəstələrini çıxaracaqlarına söz verdilər. Üzərilərinə öhdəlik götürdülər. Amma görünən budur ki, yenə ermənilik edirlər. Nə imzalarına hörmət qoyur, nə də sözlərinin üstündə dururlar. Məqam düşən kimi də erməni xislətlərini işə salırlar. Yeni "planlar" qurub xam xəyala düşürlər. Ən pisi də budur ki, bu özbaşınalıqlar Qarabağda sülhün təminatını öz üzərinə götürmüş üçtərəfli Bəyanata imza atanlardan biri, Rusiya Federasiyasının sülhməramlı kontingentinin müvəqqəti yerləşdiyi ərazilərdə baş verir. Görünən odur ki, ermənilər 44 günlük zəfər müharibəsi zamanı başına gələnlərdən ya yaxşı dərs almayıblar, ya da ağıllarını tamailə itiriblər.

Üçtərəfli Bəyanatın müddəalarını kobud surətdə pozub öz qanunsuz silahlı dəstələrini Azərbaycan ərazisindən çıxarmayan erməni tərəfi avqustun 3-də yenidən iştahlanaraq Kəlbəcər və Laçın rayonlarının ərazisini əhatə edən dağ silsiləsində yerləşən Qırxqız yüksəkliyini ələ keçirməyə və orada yeni döyüş mövqeləri qurmağa cəhd göstəriblər. Nəticədə Azərbaycan Ordusunun hərbi qulluqçusu əsgər Kazımov Anar Rüstəm oğlu şəhid olub. Yaranmış insidentlə bağlı dərhal Azərbaycan Xarici İşlər Nazirliyi bəyanat verib. Bəyanatda xüsusi olaraq vurğulanıb ki, Azərbaycan tərəfi Ermənistanın 2020-ci il 10 noyabr tarixli üçtərəfli Bəyanatla üzərinə götürdüyü öhdəlikləri yerinə yetirmədiyini və qanunsuz erməni silahlı dəstələrinin hələ də Azərbaycan ərazisindən çıxarılmadığını dəfələrlə bəyan edib. Avqustun 3-də baş vermiş qanlı insident bir daha Ermənistanın üçtərəfli razılaşmanı kobud şəkildə pozduğunu, eyni zamanda iki dövlət arasında münasibətlərin normallaşdırılması istiqamətində səylərə xələl gətirdiyini nümayiş etdirir. Bu, həmçinin Ermənistanın beynəlxalq vasitəçilərin səylərinə hörmətsizliyinin göstəricisidir.

Azərbaycan ərazisində baş verən insidentin bütün məsuliyyəti qonşu dövlətin torpaqlarında qanunsuz silahlı birləşmələrini hələ də çıxarmayan Ermənistanın siyasi və hərbi rəhbərliyinin üzərinə düşür.

Təbii ki, ermənilərin torpaqlarımızda törətdikləri özbaşınalığa qarşı cavabı çox gözləmədik. Müzəffər Azərbaycan Ordusu dərhal keçirdiyi "Qisas" əməliyyatı ilə düşmənə sarsıdıcı zərbələr endirdi. Düşmən bir daha lazım olan dərsi aldı. Əməliyyat nəticəsində Qırxqız yüksəkliyi, Sarıbaba və bir sıra digər əhəmiyyətli hakim yüksəkliklər nəzarətimizə götürüldü.

Müdafiə Nazirliyinin Mətbuat xidmətinin məlumatında bildirilir: "Hazırda bölmələrimiz tərəfindən əlverişli hədlərdə yeni mövqelərin qurulması və təminat yollarının çəkilməsi üzrə mühəndis işləri görülür". Eyni zamanda Müdafiə Nazirliyi onu da qeyd edir ki, əməliyyat çərçivəsində qeyri-qanuni erməni silahlı ünsürlərinin bir neçə döyüş mövqeyi dağıdılıb, keçmiş Ağdərə rayonunun Yuxarı Oratağ yaşayış məntəqəsindəki hərbi hissəyə havadan zərbə endirilib. Nəticədə qanunsuz erməni silahlılarının canlı qüvvəsi məhv edilib və yaralanıb, həmçinin bir neçə D-30 haubitsası, hərbi nəqliyyat vasitələri və çoxlu sayda döyüş sursatları məhv edilib. Azərbaycanın suveren ərazilərində törədiləcək istənilən terror və təxribata qarşı cavab tədbirləri daha ağır və sarsıdıcı olacaq".

Azərbaycan Prezidenti, Müzəffər Ali Baş Komandan çıxışlarında dəfələrlə qeyd edib ki, Ermənistanda revanşist qüvvələr baş qaldırıb, xam xəyallara düşsələr, Azərbaycan tərəfinin mövqeyi daha sərt olacaq. Gərək ki, Azərbaycan tərəfinin sərt üzünü görən ermənilər indiyə kimi başlarına gələnlərdən nəticə çıxaraydılar. Əgər Azərbaycan ərazisində qalıb yaşamaq istəyirlərsə, bunun yeganə yolu qanunlarımıza tabe olmaqdan keçir. Əks halda Azərbaycan Ordusu heç kimin "ərköyün uşağının" nazını çəkmək haqqında üzərinə öhdəlik götürməyib.

Elşən QƏNİYEV

Azərbaycan.- 2022.- 7 avqust.- S.1; 3.