“Tezliklə Laçına qayıdacağıq”

Doğma yurdlarına dönəcək vətəndaşlarla görüşlər keçirilir, ailələrin sayı dəqiqləşdirilir

"Biz Laçına, Zabuxa, Susa qayıtmalıyıq. Mən "Dövlətqaçqınkom"a göstəriş verdim, Laçın şəhərinin, Sus, Zabux kəndlərinin camaatı ilə əlaqə saxlasınlar və biz onları yaxın zamanlarda öz doğma yerlərinə qaytaracağıq".

İsmayıllı rayonuna səfəri zamanı Azərbaycan televiziyasına müsahibəsində bu fikirləri səsləndirən Prezident İlham Əliyev bir daha Ermənistana xəbərdarlıq edərək adıçəkilən şəhər və kəndlərimizdə qeyri-qanuni məskunlaşmış ermənilərə avqustun sonuna kimi vaxt verildiyini də bəyan etdi.

Dövlət başçısı bildirdi ki, bu proses avqustun 5-də reallaşmalı idi. Lakin Qarabağda yaşayan ermənilərin onlara vaxt verilməsi ilə bağlı xahişindən sonra müddət bir qədər uzadılıb: "Onlar bizə müraciət etdilər, xahiş etdilər. Dəfələrlə xahiş etmişdilər ki, onlara avqustun sonuna vaxt verilsin. Biz də buna razı olduq. Çünki indi avqustun 5-i olmasın, 25-i olsun, sentyabrın 1-i olsun, böyük fərq etmir".

Göründüyü kimi, hər zaman olduğu kimi İlham Əliyev yenə də humanist addım ataraq ermənilərin müraciəti əsasında vaxtı avqustun sonuna kimi uzadıb. Amma Ermənistan unutmamalıdır ki, bu müddətdə həmin ərazilər tamamilə boşaldılmalıdır. Bunun başqa yolu yoxdur.

Dövlət başçısının tapşırığı sürətlə icra olunur

Prezidentin tapşırığına əsasən, Qaçqınların və Məcburi Köçkünlərin İşləri üzrə Dövlət Komitəsində dərhal işlərə başlanıldı. Avqustun 13-də dövlət komitəsində işğaldan azad edilmiş Laçın şəhərinə və rayonun Zabux, Sus kəndlərinə yerli sakinlərin qayıdışının təşkili ilə əlaqədar Prezidentin verdiyi tapşırıqların icrası vəziyyətinə həsr olunmuş müşavirə keçirildi.

Müzəffər Ali Baş Komandan İlham Əliyevin qətiyyətli hərbi-siyasi fəaliyyəti, rəşadətli ordumuzun qəhrəmanlığı sayəsində sarsıdıcı məğlubiyyətə uğradılmış Ermənistan Laçın rayonunun ərazisini, o cümlədən Laçın şəhərini, Zabux və Sus kəndlərini də bir güllə atmadan Azərbaycana qaytarmaq məcburiyyətində qalıb. Dövlət başçısının tapşırığına əsasən, keçmiş məcburi köçkünlərin həmin yaşayış məntəqələrinə qayıdışa hazırlanması bu gün qarşıya qoyulan mühüm vəzifələrdəndir.

Respublikanın müxtəlif bölgələrində müvəqqəti məskunlaşmış Laçın şəhəri, həmçinin Zabux və Sus kəndləri sakinlərinin, yəni doğma yurda qayıdacaq ailələrin sayının dəqiqləşdirilməsi, onların sosial vəziyyətinin və məşğulluq imkanlarının qiymətləndirilməsi üçün zəruri tədbirlərin həyata keçirilməsi, əhali arasında məlumatlandırma, təbliğat işlərinin aparılması, köçürülmənin texniki-təşkilati məsələlərinin həlli və digər vəzifələrlə əlaqədar işlərin sürətləndirilməsi barədə struktur bölmələrə tapşırıqlar verilib. Dövlət komitəsində həmçinin Laçın şəhərinin, Zabux və Sus kəndlərinin bir qrup sakini ilə görüş keçirilib. Onlar ölkə rəhbərinin müsahibəsini dinlədikdən sonra böyük sevinc hissi keçirdiklərini, doğma yurda qayıtmağa hər an hazır olduqlarını bildiriblər.

Görüşdə dövlət başçısının işğaldan azad edilmiş ərazilərin bərpası, məcburi köçkünlərin doğma yurda qayıdışının başlanması üçün verdiyi tapşırıqların icra vəziyyəti barədə iştirakçılara ətraflı məlumat verilib. Bildirilib ki, komitənin struktur bölmələri Laçın şəhərinə, Zabux və Sus kəndlərinə qayıdışın təşkili ilə bağlı müəyyənləşdirilmiş tədbirlərin icrası ilə məşğuldurlar. Doğma yurda qayıdacaq sakinlərin sayının dəqiqləşdirilməsi, məşğulluq imkanlarının qiymətləndirilməsi, arzu, istək və tələblərinin müəyyənləşdirilməsi üçün sorğular aparılır, köçürülmənin səmərəli təşkili üçün zəruri tədbirlər həyata keçirilir.

Sülh müqaviləsini imzalamaqdan yayınan Ermənistana gözdağı

Avqustun 17-də də Laçın şəhərindən otuz il əvvəl məcburi köçkün düşən və respublikamızın müxtəlif yerlərində müvəqqəti məskunlaşan vətəndaşlarla daha bir görüş keçirilib. Bu görüşdə dövlət komitəsinin böyük Qayıdışa hazırlıq məqsədilə həyata keçirdiyi tədbirlər barəsində iştirakçılara ətraflı məlumat verilib. Bir daha diqqətə çatdırılıb ki, məcburi köçkünlüyü başa çatan vətəndaşların könüllü, təhlükəsiz şəraitdə və ləyaqətlə doğma yurda qayıdışını təmin etmək üçün dövlət başçısının tapşırığı ilə bütün lazımi tədbirlər həyata keçirilir.

Görüşdə qayıdışa hazırlıq və köçürülmənin təşkili ilə bağlı açıq və səmimi fikir mübadiləsi aparılıb. Laçınlılar doğma yurda qayıdıb, onun sosial-iqtisadi inkişafına, işğalın fəsadlarının aradan qaldırılmasına töhfə verməyə, dağlar qoynundakı şəhəri dirçəltməyə hazır olduqlarını bildiriblər.

Qayıdışla bağlı fikirlərini bildirən Zabux kənd sakinləri qeyd ediblər ki, bu kənddə tarixən bir nəfər də erməni olmayıb, onların Azərbaycan ərazilərinə qarşı olan iddiaları yersizdir.

Prezidentin tapşırığı ilə dərhal tədbirlərə başlanılması, dövlət başçısının çıxışı bir daha siyasi iradənin, sarsılmaz qətiyyətin bariz təcəssümüdür. Ermənistan da yaxşı bilir ki, İlham Əliyevin gerçəkləşdirmədiyi vəd, söz yoxdur. Əgər Azərbaycan Prezidenti bir fikir səsləndirirsə, mütləq onun reallığa çevrilməsi üçün ortaya iradə qoyur və tezliklə də məsələ həll olunur. Sözü imzası qədər keçərli olan İlham Əliyev tezliklə vətəndaşlarımızın Laşın şəhərinə və Zabux, Sus kəndlərinə qayıdışını reallaşdırıb sülh müqaviləsini imzalamaqdan hələ də yayınmağa çalışan Ermənistana gözdağı verəcək.

Əminliklə deyə bilərik ki, dədə-baba torpaqlarından uzun illər didərgin düşmüş şəxslər tezliklə əzəli torpaqlarına qayıdacaqlar. Laçın şəhəri və kəndləri yenidən gülüstana çevriləcək.

Əsmər QARDAŞXANOVA,

Azərbaycan.- 2022.- 20 avqust.- S.1; 7.