Əzmkarlığın və həmrəyliyin təcəssümü

Vətən cəmiyyəti fəalları və gənclər tərəfindən Şuşa-Laçın yolunda "Ekoloji terrora son!" şüarı ilə keçirilən etiraz aksiyası artıq bir həftədir davam edir.

Aksiya iştirakçıları Qarabağ iqtisadi rayonunda baş verən ekoloji terrorlara son qoyulmasını, ermənilər tərəfindən təbii sərvətlərimizin talanmasının dayandırılmasını tələb edirlər. Aksiyanın başlanmasının əsas səbəbi "Qızılbulaq" qızıl və "Dəmirli" mis-molibden yataqlarının qeyri-qanuni istismarıdır.

Aksiya dinc xarakterlidir, heç bir gərginlik ehtiva etmir. Aktivistlər Qarabağda yaşayan mülki ermənilərin yaşayışını çətinləşdirən heç bir addım atmır, onlara lazımi humanitar dəstəyin göstərilməsinin qarşısını almırlar.

Aksiyaya qatılanların sayı gündən-günə artır

Aksiya iştirakçısı, Azərbaycan Mətbuat Şurasının İdarə Heyətinin üzvü Hacıbəy Heydərli bildirib ki, dekabrın 12-də başlayan dinc aksiya bu gün də eyni coşqu və əzmkarlıqla davam etdirilir: "Tələblər dəyişmir - aksiyaçılar Azərbaycanın əzəli torpaqlarında ermənilər tərəfindən törədilən ekoloji terrorlara son verilməsini və mütəxəssislərimizin faydalı qazıntı yataqlarında monitorinq keçirməsinə lazımi şəraitin yaradılmasını tələb edirlər. Ona görə də Rusiya sülhməramlılarının komandanı Andrey Volkovun əraziyə gələrək ekoloji terrorlarla bağlı açıqlama verməsini gözləyirik.

Aksiyaya qatılanların sayı gündən-günə artır. Burada iştirakçılar üçün hər cür şərait də yaradılıb. Ərazidə tibb məntəqəsi və media düşərgəsi də salınıb. İstənilən halda aktivistlər soyuq havada belə gecə-gündüz demədən haqlarını tələb etməkdən çəkinmirlər".

Haqlı tələblərimizdən əl çəkməyəcəyik

Hacıbəy Heydərli deyib ki, aksiyanın ilk günündən başlayaraq burada xeyli diqqətçəkən məqamların şahidi olublar: "Dünyaya sülh mesajı verir, haqlı tələblərimizi irəli sürürük. Ermənilər isə hər zaman olduğu kimi, yenə də dezinformasiyalar yayırlar, Laçın yolunun guya azərbaycanlılar tərəfindən bağlanıldığını deyirlər. Belə iddialar tamamilə əsassızdır. Aktivistlər humanitar məqsədli daşınmaların qarşısını almır, məqsəd ekoloji terrora son qoyməq, sərvətlərimizin talanmasına mane olmaqdır. Hətta biz Xankəndidə yaşayanları da aksiyaya dəvət edirik. Gəlin, bizimlə bərabər ekoloji terrora "yox" deyək! Çünki ekoterrorizm həm də qlobal problemdir. Bu baxımdan Şuşa-Laçın yolunda keçirilən aksiya da humanist, sülhpərvər və qlobal aksiyadır".

Hava şəraiti də aksiya iştirakçılarını qorxutmur. Belə ki, havanın soyuq və yağıntılı olmasına baxmayaraq aksiya ilk gündə olduğu kimi yüksək coşqu ilə davam edir. Hacıbəy Heydərlinin sözlərinə görə, bu bir daha xalqımızın əzmkarlığını və milli maraqlar naminə hər zaman həmrəy olduğunu göstərir.

N.QARDAŞXANOVA

Azərbaycan.- 2022.- 18 dekabr.- S.7.