İrəvan problemdən çıxış yolu tapa bilmir

Müharibədən sonra Ermənistanda miqrasiya daha da artıb

Hazırda Ermənistan üçün hələ də ən aktual problemlərdən biri əhalisinin xarici ölkələrə köçünün davam etməsidir. Miqrasiya prosesinin indiki templə davam edəcəyi təqdirdə Ermənistanın əhalisiz ölkəyə çevriləcəyi özlərinin sosioloqları tərəfindən də açıq etiraf olunur. Belə hesab edilir ki, real şəraitdə Ermənistanın ümumi təhlükəsizliyinə xələl gətirən əsas hallardan biri məhz əhalinin ölkəni tərk etməsidir.

Mövcud iqtidar bu cür sosial-iqtisadi şərait fonunda miqrasiyanın qarşısının alınmasında artıq aciz olduğunu nümayiş etdirir. Ermənistanda belə bir fikir hakimdir ki, Nikol Paşinyan hökuməti hakimiyyətdə olduğu müddət ərzində digər çətinliklər kimi, miqrasiya problemi də öz həllini tapmayacaq. Bildirilir ki, əvvəlki illərdə də miqrasiya böhranı müşahidə olunub, amma İkinici Qarabağ müharibəsindən sonra ölkəni birdəfəlik tərk edən sadə ermənilərin sayı artıb.

“Joxovurd” nəşri yazır ki, rəsmi məlumatlara görə, ötən il 73 571 vətəndaş ölkəni tərk edib və geri qayıtmayıb. Ümumilikdə ölkədən 762 min 792 nəfər gedib, onlardan 689 min 221-i geri qayıdıb. Qeyd edək ki, söhbət Ermənistan vətəndaşlarından gedir. Eyni zamanda, təkcə ötən ilin birinci yarısında 22 minə yaxın erməni Rusiya vətəndaşlığını qəbul edib. Bu, son 4 ilin mütləq rekordudur.

Məqalə müəllifi rəsmi statistikiya istinad edərək yazır ki, ötən il 161 minə yaxın Ermənistan vətəndaşı “Green card” üçün müraciət edib. İndi isə gəlin inqilabdan əvvəl və sonrakı dövrü müqayisə edək. Rəsmi məlumata görə, 2017-ci ildə 36,2 min insan Ermənistanı tərk edərək geri qayıtmayıb. Ötən il bu rəqəm 73,5 mindən çox olub. Bu arada Ermənistanın hakim “Mülki müqavilə” partiyasından olan deputat Armen Xaçatryan deyib ki, 2020-ci ilin 44 günlük müharibəsinin şəraitini araşdırmaq üçün istintaq komissiyası artıq yaradılıb. O bildirib ki, komissiyaya yalnız Ermənistan parlamentinin Müdafiə və Təhlükəsizlik Daimi Komissiyasının üzvləri daxildir: “Komissiya 11 deputatdan ibarətdir, lakin deputatlardan biri müvafiq məxfilik rejiminə icazə almadığı üçün hazırda 10 üzvün tam səlahiyyəti var. Müvafiq icazəni aldıqdan sonra o da komissiyaya cəlb olunacaq. Söhbət Artur Kazinyandan (“Ermənistan” blokundan olan deputat - red.) gedir. Ümid edirik ki, o, aidiyyəti qurumlara müraciət edəcək, icazə alacaq və komissiyanın işində tam iştirak edəcək. Kazinyan tərəfindən bu icazənin alınması və ya alınmaması komissiyanın işinə mane olmayacaq. Ancaq Müdafiə və Təhlükəsizlik Daimi Komissiyasının üzvü olduğu üçün onu alsa, yaxşı olardı”.

Xaçatryan əlavə edib ki, komissiyanın işi əsasən məxfi xarakter daşıyacaq, məlumatların əhəmiyyətli hissəsi dövlət və rəsmi sirrdir. Hakimiyyətin niyə parlamentdənkənar qüvvələrin nümayəndələrini komissiyaya daxil etmədiyinə gəlincə, Xaçatryan bildirib ki, hakimiyyət heç bir qərar verməyib, çünki müdafiə və təhlükəsizlik üzrə istintaq komissiyasının işi konstitusiya qanunu ilə tənzimlənir: “Hazırda parlamentdənkənar qüvvələrin komissiyanın işində iştirak formatı üzərində düşünülür, lakin bu, o demək deyil ki, onlar istintaq komissiyasının səlahiyyətlərini yerinə yetirəcəklər. İştirakın formatı məsələsi iş proseduru təsdiq edildikdən sonra öz həllini tapacaq”.

Belə vəziyyət isə həqiqətən Ermənistanın sürətlə məhvə yaxınlaşdığını, ölkədə qarşıdurmanın ən yüksək səviyyədə olduğunu göstərir.

Elçin CƏFƏROV

Azərbaycan.- 2022.- 13 fevral.- S.3.