Şəhid ailələri və qazilərin məşğulluğunun təmin edilməsi unudulmamalıdır

Prezident bu məsələnin vacibliyini bir daha vurğuladı

Şəhid ailələri, müharibə əlilləri və bu kateqoriyadan olan digər şəxslərə maliyyə dəstəyinin göstərilməsi, onların mənzillərlə, minik avtomobilləri ilə təminatı, müalicəsi, sosial durumunun yaxşılaşdırılması istiqamətində görülən digər tədbirlər ardıcıl xarakter daşıyır.

Dövlət başçısı, Ali Baş Komandan İlham Əliyevin tapşırığına əsasən, bu insanlar hərtərəfli sosial təminat sistemi ilə əhatə olunublar.

Aylıq təqaüd və digər sosial ödənişlərlə yanaşı, həmin vətəndaşların rifahının yaxşılaşdırılmasına xidmət edən bir çox sosial proqramlar həyata keçirilir ki, bunlardan da biri onların məşğulluq probleminin həllidir. Aktiv məşğulluq proqramlarında - özünüməşğulluqda, ödənişli ictimai işlərdə bu kateqoriyadan olan insanlara üstünlük verilir. Həmçinin onların məşğulluğunun təmin edilməsi məqsədilə bütün işəgötürənlər üçün məcburi kvota müəyyən edilib. Beləliklə, şəhid ailələri və müharibə əlillərinin sosial müdafiəsinin daha da yaxşılaşdırılması üçün bu istiqamətdə də mütəmadi iş aparılır.

Prezident İlham Əliyev bu il fevralın 18-də Bakı şəhəri Nizami və Nərimanov, eləcə də Kürdəmir Rayon İcra Hakimiyyətinin başçılarını təyin olunmaları ilə əlaqədar videoformatda qəbul edərkən sözügedən mövzuya bir daha toxunub: “Vətən müharibəsində qəhrəmanlıq göstərmiş övladlarımızın məşğulluq məsələləri də mənim göstərişimlə öz həllini tapır. Əmək və Əhalinin Sosial Müdafiəsi Nazirliyi bu sahədə genişmiqyaslı işlər görür - Məşğulluq Marafonu keçirilir. Mənim tərəfimdən sahibkarlara tövsiyə edilib ki, işə qəbulda, ilk növbədə, Vətən müharibəsində fərqlənmiş gənclərimizi nəzərə alsınlar. Əlbəttə ki, dövlət qurumları qarşısında bu vəzifəni mən qoymuşam. Siz də bu amili nəzərə almalısınız ki, öz canını fəda etməyə hazır olan gənclərimiz işlə təmin edilsin. Onların peşə qabiliyyətinin təkmilləşdirilməsi üçün müxtəlif tədbirlər görülməlidir. Yəni biz onları gələcək fəaliyyətə hazırlamalıyıq. Bir daha qeyd etmək istəyirəm ki, kadr məsələlərinin düzgün təşkilində əsas prinsiplər, bax, dediyim iş qabiliyyəti, vətənpərvərlik və dövlətçilik əsasları olmalıdır”.

Ümumiyyətlə, həm Vətən müharibəsindən əvvəl, həm də sonrakı dövrdə şəhid ailələrinin, qazilərin daim dövlətin diqqətində olduğu, onların sosial müdafiəsinin gücləndirilməsi, yaşayış şəraitlərinin yaxşılaşdırılması üçün bütün zəruri addımların atıldığı hamıya məlumdur. Bu, dövlət siyasətinin əsas prioritetlərindən sayılır. Rəqəmlərə nəzər salaq: keçən il bu kateqoriyadan olan insanlara 3 min mənzil verilib. Postmüharibə dövründə həmin kateqoriyayaya daxil olan 45 min vətəndaşımıza 50 min növ xidmət göstərilib. Şəhid ailəsi üzvləri olan 7942 şəxsə 15 841 sosial ödəniş, 2515 müharibə iştirakçısına əlillik və sosial ödənişlərin təyinatı həyata keçirilib. 184 hərbçi son nəsil 193 yeni protezlə, 1200 müharibə əlili 13 minə yaxın reablitasiya vasitəsilə təmin olunub.

Prezidentin 2021-ci il 25 yanvar tarixli sərəncamı ilə bu kateqoriyadan olanlara 2021-2025-ci illərdə 11 min mənzil və ya fərdi evin verilməsi nəzərdə tutulub. 2021-ci ildə şəhid ailələrinə və müharibə əlillərinə üç il əvvələ nisbətən 5 dəfə çox mənzilin verilməsi proqramı icra olunub. Xatırladaq ki, şəhid ailələri və müharibə əlillərinə 2018-ci ildə 626, 2019-cu ildə 934, 2020-ci ildə 1572 mənzil və fərdi ev təqdim edilib. Həmçinin əlillərin avtomobillə təminatı işi də uğurla aparılır. İndiydək 7400 müharibə əlilinə avtomobil verilib. Ötən il isə 164 nəfər müharibə əlili minik avtomobili ilə təmin olunub.

Məşğulluğun həlli də, qeyd edildiyi kimi, bu məsələlərin ön cərgəsindədir. Belə ki, həmin tədbirlərin bir istiqaməti də sözügedən insanların kiçik biznesə çıxışına özünüməşğulluq proqramı vasitəsilə şərait yaradılmasıdır. Bu məqsədlə postmüharibə dövründə 6,5 mindən çox şəhid ailəsi üzvü və qazi, erməni terrorundan zərər çəkən şəxs özünüməşğulluq proqramına cəlb edilib. İlkin mərhələdə onlar üçün kiçik biznesin təşkili və idarə olunması üzrə bilik və bacarıqlara malik olmaları məqsədilə təlimlər təşkil olunub. Təlimlərdən sonra isə seçdikləri iqtisadi fəaliyyət növləri üzrə kiçik ailə təsərrüfat və müəssisələrini yaratmaları üçün onlara lazımi mal və materiallar, avadanlıqlar formasında aktivlər təqdim edilib. Ümumilikdə, postmüharibə dövründə qeyd olunan kateqoriyalara aid 10 min şəxs Əmək və Əhalinin Sosial Müdafiəsi Nazirliyi tərəfindən aktiv məşğulluq proqramları ilə əhatə olunub.

Vətən müharibəsindən sonra səmərəli tədbirlərdən olan “Məşğulluq marafonu” da həyata keçirilir və həmin marafon çərçivəsində şəhid ailəsi üzvlərinin və qazilərin məşğulluğu həyata keçirilir. Əmək və Əhalinin Sosial Müdafiəsi Nazirliyi tərəfindən ötən ilin iyun ayında başlanan “Məşğulluq marafonu”na bu günədək 618 işəgötürən qoşularaq 4203 vakansiya təqdim edib. Həmin vakansiyalar üzrə qeyd edilən kateqoriyalara aid 1744 şəxs işlə təmin olunub. Hazırda da vakansiyalar üzrə göndərişlərin verilməsi davam edir. Tədbir “Qəhrəmanlarımızın məşğulluğuna birgə dəstək olaq!” devizi altında keçirilir.

Prezident İlham Əliyevin bir çox çıxışlarında bu məsələyə toxunması onların vacibliyinə bir daha diqqət çəkir. Qarşıya qoyulan vəzifələrin uğurla yerinə yetirilməsi şəhidlərimizin xatirəsinin bizim üçün nə qədər əziz, qazilərimizin nə qədər dəyərli olduğunu dönə-dönə təsdiqləyir.

Flora SADIQLI

Azərbaycan.- 2022.-22 fevral.- S.4.