Bakıda “MDB-də sosial islahatlar: trendlər, potensiallar, həllər” mövzusunda beynəlxalq konfrans keçirilir

Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu (DSMF) və Beynəlxalq Pensiya və Sosial Fondlar Assosiasiyasının birgə təşkilatçılığı ilə Bakıda “MDB-də sosial islahatlar: trendlər, potensiallar, həllər” mövzusunda beynəlxalq konfrans keçirilir.

AZƏRTAC xəbər verir ki, tədbirdə Rusiya, Moldova, Qazaxıstan, Özbəkistan, Tacikistan və Qırğızıstandan sosial müdafiə və sosial sığorta qurumlarının rəhbər şəxsləri, Beynəlxalq Pensiya və Sosial Fondlar Assosiasiyasının rəsmiləri, diplomatik korpus nümayəndələri, millət vəkilləri iştirak edirlər.

Konfrans iştirakçıları əvvəlcə Fəxri xiyabanda ümummilli lider Heydər Əliyevin xatirəsini anıb, məzarı önünə gül dəstələri qoyublar. Görkəmli oftalmoloq-alim, akademik Zərifə xanım Əliyevanın da xatirəsi yad olunub.

Tədbir Azərbaycanda həyata keçirilən sosial islahatlar barədə videoçarxın nümayişi ilə başlayıb. Əmək və əhalinin sosial müdafiəsi naziri Sahil Babayev son dörd ildə Azərbaycanda ölkə əhalisinin 40 faizindən çoxunu əhatə edən üç əsas sosial islahat paketinin həyata keçirildiyini, həmin paketlər üçün ayrılan əlavə illik vəsaitin ümumilikdə 6 milyard manat və ya 3,5 milyard ABŞ dolları olduğunu bildirib.

S.Babayev həmin dövrdə minimum əməkhaqqının orta hesabla 2,3, minimum pensiyanın 2,2 dəfə, sosial müavinətlərin 70 faiz, ümumi sosial xərclərin 2,5 milyard manat artdığını diqqətə çatdırıb. 2018-ci ilə nisbətən orta aylıq pensiyada orta hesabla 65, orta aylıq əməkhaqqında 35, median əməkhaqqında 74 faiz, əməkhaqqı fondunda 2 dəfə artım baş verdiyini qeyd edib.

Bildirib ki, qeyd edilən dövrdə əmək müqavilələrinin sayının 30 faiz artması sosial sığorta daxilolmalarına da müsbət təsir göstərib. Son dörd ildə DSMF-nin gəlirləri 42 faiz və ya 1,5 milyard manat artıb. Dövlət büdcəsindən fonda transfertlərin həcmi isə 14 faiz azalıb və bu il üçün həmin həcm 21,6 faiz təşkil edib. Həmin dövrdə DSMF tərəfindən sosial sığorta ayırmaları hesabına əhaliyə ödənilən sosial ödənişlərin həcmi 1,5 milyard manat artıb və fondun xərclərinin 97 faizdən çoxunu sosial ödənişlər təşkil edib.

S.Babayev nazirlik tərəfindən 400 min nəfərə sosial müavinət, 300 min nəfərə təqaüd, 176 minə yaxın ailə üzvü olan 40 min ailəyə ünvanlı dövlət sosial yardımı verildiyini deyib. Həmin yardımın hər ailəyə düşən orta aylıq məbləğinin son 4 ildə 2,5 dəfə artaraq 380 manata çatdığını qeyd edib.

Nazir COVID-19 pandemiyası dövründə 4 istiqaməti əhatə edən 12 sahə üzrə icra olunan sosial dəstək paketinin ölkə əhalisinin 48 faizinə və ya 4,8 milyon nəfərə şamil olunduğunu diqqətə çatdırıb. Bildirib ki, məqsədyönlü iqtisadi-sosial tədbirlər nəticəsində 2021-ci ilin sonuna Azərbaycan iqtisadiyyatı pandemiyadan əvvəlki göstəricilərini bərpa edib, ÜDM 5,6 faiz artıb, işsizlik səviyyəsi 7,2 faizdən 6 faizə enib.

2020-ci ildə 44 günlük müharibə nəticəsində Azərbaycan beynəlxalq səviyyədə tanınan ərazi bütövlüyünü bərpa edib. Postmüharibə dövründə ölkəmizdə müharibədən zərər çəkmiş mülki əhali, eləcə də şəhid ailələri və müharibədə yaralanmış insanlarla bağlı sosial dəstək tədbirləri 45 minə yaxın insanı əhatə edib, onlara 50 minə yaxın sosial xidmət göstərilib.

S.Babayev DOST konsepsiyası və onun sosial xidmətlərdə vətəndaş məmnunluğuna nail olunmasına şərait yaratdığı barədə məlumat verib. Həmçinin nazirliyin 174 xidmətindən 110-nun rəqəmsallaşdırıldığını, 46-sının hazırda proaktiv qaydada həyata keçirildiyini, bu ilin sonuna kimi daha 50 xidmətin elektronlaşdırılacağını, nazirlik üzrə xidmətlərin 90 faizinin e-platformaya keçirilməsinin hədəf olduğunu vurğulayıb.

Beynəlxalq Pensiya və Sosial Fondlar Assosiasiyasının sədri Almas Kurmanova videomüraciətində və Assosiasiyanın direktoru Yevgeni Ametov çıxışında, həmçinin Beynəlxalq Sosial Təminat Assosiasiyasının Baş katibi Marselo Abi-Ramia Cayetano videoformatda salamlama nitqində sosial sahədə qarşıya çıxan yeni çağırışlara uyğun sosial təminat islahatlarının zəruruliyini və bu sahədə ölkələr arasında qarşılıqlı faydalı əməkdaşlığın vacibliyini və hazırkı konfransın bu baxımdan əhəmiyyətini qeyd ediblər.

Sonra DSMF-nin İdarə Heyətinin sədri Himalay Məmişov son illərdə Azərbaycanda sosial müdafiə proqramları, sosial təminat sahəsində aparılan islahatlara dair təqdimat edib. O, həmçinin sosial təminat sahələri üzrə xidmətlərin elektronlaşdırılması istiqamətində əldə olunan uğurlar, bu sahələrdə yaradılmış proaktiv xidmətlər, Azərbaycanın sosial təminat sisteminin prioritet hədəfləri barədə məlumat verib.

Konfransın gündəliyində Qazaxıstan, Moldova, Qırğızıstan, Rusiya, Tacikistan, Özbəkistandan olan nümayəndələrin ölkələrində sosial təminat, həmçinin sosial sığorta və pensiya təminatı sahələrində aparılan islahatlara dair təqdimatları, müzakirələr və təcrübə mübadilələri, habelə konfrans iştirakçılarına Beynəlxalq Pensiya və Sosial Fondlar Assosiasiyasının fəxri fərmanlarının təqdim edilməsi də nəzərdə tutulub.

Konfrans öz işinə fevralın 24-də yekun vuracaq.

Azərbaycan.- 2022.- 24 fevral.- S.2.