Cəmiyyətin aparıcı
qüvvəsi
Tələbələrimiz
"Texnofest"də nəyə qadir
olduqlarını bir daha
nümayiş etdirdilər
Gənclik cəmiyyətin aparıcı qüvvəsidir. Həmin qüvvəni isə yalnız yüksək elm və təhsillə, qabiliyyət və bacarıqla reallaşdırmaq mümkündür.
Azərbaycanın "Texnofest" Aerokosmik və Texnologiya Festivalına evsahibliyi etməsi bütün dünyada əks-səda verdi. "Texnofest" Festivalı ilk dəfə idi ki, Türkiyədən kənarda qeyd edilirdi və xarici ölkə kimi Azərbaycanın seçilməsi heç də adi fakt deyildi. Festival bir çox iştirakçılara yeni investisiya və biznes imkanlarının genişləndirilməsi şansı yaratdı. Azərbaycan gəncinin beyninin məhsulu olan belə innovativ təkliflərin beynəlxalq aləmə çıxarılması üçün ilk və uğurlu addım oldu.
6 müsabiqədə 8 mükafat
Festivalda SOCAR-ın Bakı Ali Neft Məktəbinin (BANM) tələbələri də iştirak etdilər. BANM "Texnofest" Aerokosmik və Texnologiya Festivalının final mərhələsində 16 komanda və 2 startap layihəsi ilə təmsil olundu. 10 ildir tam ingilis dilində yüksəkixtisaslı kadrlar yetişdirən BANM-ın 6 komandası B kateqoriyası üzrə 6 müsabiqədə 8 mükafata layiq görüldü.
Ali təhsil ocağının qalib gələn tələbələri ilə görüşüb, onların təəssüratlarını öyrəndik. "İstiqlal" komandası festival çərçivəsində baş tutan "Cansat Model Peyk" yarışının qalibidir. Komanda bu müsabiqə üzrə final mərhələsində hazırladıqları peyk modelini səmaya buraxaraq birinci yeri tutub. Əlbəttə ki, bu nüfuzlu müsabiqənin qalibi olmaq, dövlət başçıları tərəfindən mükafatlandırılmaq gənclərimizə gələcəkdə daha böyük uğurlara imza atmalarına stimul verib.
Komanda BANM-ın Proseslərin avtomatlaşdırılması mühəndisliyi ixtisasında təhsil alan 5 tələbədən ibarətdir. Komandanın mentoru Bakı Ali Neft Məktəbinin məzunu və hazırda ali məktəbdə müəllim kimi fəaliyyət göstərən Ramil Şükürovdur. Birinci yerin qalibi olan komandanın mentoru qeyd edib ki, "Texnofest" yarışı növbəti illərdə ölkəmizdə keçirilərsə, yenidən iştirak edəcəklər: "Texnofest" yarışı Azərbaycanda ilk dəfə keçirilirdi. Bununla bağlı sosial şəbəkələrdən öyrəndik və qatılmaq qərarına gəldik. BANM-ın həm bakalavr, həm də magistr məzunu olmuşam. Hazırda isə doktorantura pilləsində təhsilimi davam etdirirəm. Bizə model hazırlamaqla bağlı tapşırıq verilmişdi. Bu model müəyyən tələblərə cavab verməli idi. Sözügedən model raket vasitəsilə 150 metr hündürlüyə qaldırılmalı və passiv enmə sistemi vasitəsilə yerə düşməli idi. Yarışda birinci yerin qalibi olduq".
"Texnofest"in digər qalib BANM komandası isə "Atəşgah"dır. "Yaşıl Texnologiyalar" üzrə "Texnofest"ə qoşulan komandanın üzvləri ali məktəbin kimya mühəndisliyi ixtisasında təhsil alan 3 tələbədir. Komandanın mentoru Bakı Ali Neft Məktəbinin məzunu Murad Rəhimovdur. Ümumiyyətlə, BANM-ın iki komandası I, iki komandası II, iki komandası isə III yerə sahib olub. Bununla yanaşı, təhsil ocağının iki komandası qatıldığı iki müsabiqə üzrə də mükafat alıb.
Bakı Ali Neft
Məktəbi "Yaşıl texnologiyalar"
müsabiqəsi üzrə Azərbaycan ali
təhsil müəssisələri arasında ən çox təmsil olunan, finala yüksələn və mükafat
alan ali təhsil
ocağıdır. "Texnofest"ə müraciət edən
BANM-ın 33 komandasının 15-i bu
müsabiqəyə layihə təqdim edib.
Finala bu nominasiya üzrə yüksələn 10 komandanın
8-i BANM-ı təmsil edən
komandalar olub. Bu isə
Azərbaycan universitetləri
arasında yalnız Bakı Ali Neft Məktəbinə aid göstəricidir.
BANM finalda da
bu müsabiqə növü üzrə fərqlənərək rekorda
imza atmağı bacarıb. Belə ki, bu müsabiqə üzrə
ilk üç yerin sahibi BANM-ın komandaları olub. Kimya mühəndisliyi ixtisasında təhsil alan 3 tələbə - Faiq Əliyev, Fatimə Məmmədova və Fərid Əliyev (kapitan) və mentoru BANM-ın məzunu olan Murad Rəhimovdan
ibarət "Atəşgah"
komandası "Yaşıl
texnologiyalar" müsabiqəsinin
qalibi seçilib.
Kondisionerlərdən istifadəni azaldan, enerjiyə qənaət edən cihaz
Bu müsabiqə üzrə
II yerə BANM-ın Kimya mühəndisliyi kafedrasının
müdiri Əmir Rza Vəxşurinin mentorluq etdiyi, tələbələr Fidan
Cəbrayılova (kapitan), Toğrul Əzizli, Çingiz Hacıyev, Fərid Hüseynli, Ruslan Həsənovdan ibarət
"Murov" komandası
layiq görülüb.
Bu müsabiqə üzrə
III yerin sahibi mentoru BANM-ın laboratoriya rəhbəri Nəsir Sultanov, məsləhətçisi ali
məktəbin məzunu
və əməkdaşı
Elmar Əsgərzadə,
üzvləri
Güllü Hüseynli
(kapitan), Zaur İmaməliyev, Kafyə Abzarova, Rəşad Əhmədovdan
ibarət "Gülüstan"
komandası olub.
Ali Məktəb "Cansat
Model Peyk" müsabiqəsində
də uğurla təmsil olunub. Proseslərin
avtomatlaşdırılması mühəndisliyi ixtisasında
təhsil alan Fidan Mahmudova, Səmra Hüseynova, Qeybulla Əliverdiyev, Kənan Bəgəliyev, Fuad Məmmədzadədən
(kapitan) ibarət
"İstiqlal" komandası
hazırladığı peyk
modelini səmaya buraxaraq "Cansat" Həvəskar Peyk Modelləşdirilməsi yarışının
qalibi olub.
Fuad Məmmədzadə
1-ci yer qazanmış
komandanın kapitanıdır. O bu cür yarışların
ənənə halını
almasını arzulayır.
Robotun adını "Nilay-44" qoydular
BANM-ın "Oğuz" və "Həkəri" komandaları qatıldıqları iki müsabiqədə mükafata layiq görülüblər. Mentorluğunu Nicat Həsənovun həyata keçirdiyi, Nəzrin Qurbanova (kapitan), Firəngiz Hümbətova, İlqar Məmmədov, Gülüstan Abdullayeva, Ağamirzə Fətəliyev, Aysel Abdullayevadan ibarət "Oğuz" komandası "Robotexnika" müsabiqəsi üzrə II, "Planer" müsabiqəsi üzrə isə III yerə sahib olub.
"Oğuz" komandasının üzvü Ağamirzə Fətəliyev deyir ki, ərsəyə gətirdikləri robotun adını Vətən müharibəsində hər iki valideynini itirən Nilayın şərəfinə "Nilay-44" qoyduq: "Yarışlara iki kateqoriya üzrə qatılmışdıq. "Robotexnika" üzrə 2-ci, planer müsabiqəsində isə 3-cü yeri qazandıq. "Robotexnika" müsabiqəsində hörümçəyə oxşar altıayaqlı robot təqdim etdik. Əsas məqsəd dağıntıların altında insanların istifadə edə bilmədiyi ərazilərdən məlumat almaqdır. Gəncədə törədilən müharibə cinayəti nəticəsində çox sayda insan dağıntılar altında qalmışdı. Elə bu səbəbdən ərsəyə gətirdiyimiz robotun adını Vətən müharibəsində hər iki valideynini itirən Nilayın şərəfinə qoyduq".
İki kateqoriya üzrə qalib olan "Həkəri" komandasının kapitanı Cavid İsayev bu adı seçməkdə xüsusi bir səbəbin olduğunu dedi: "Komandamızın üzvlərindən biri zəngilanlı olduğuna və Həkəri çayı da Zəngilandan keçidiyinə görə komandamızın adını Həkəri qoyduq. Yarışmada iki kateqoriya üzrə iştirak etdik. Hər iki kateqoriya üzrə qalib olduq".
"Baku
Skills" müsabiqəsi üzrə III yerin sahibi olan
"Alfa" komandasının
üzvləri arasında Bakı Ali Neft Məktəbinin
Biznesin idarə olunması üzrə I kurs magistratura tələbəsi
Aydın Cəfərov da təmsil edilib.
Elşən
YƏHYAYEV,
Azərbaycan.-2022.- 7 iyul.- S.8.