İlham Əliyevin Zəfəri
dünya qızılbaşlarını birləşdirən ən
böyük gücdür
Pakistan Parlamentinin Azərbaycan əsilli
deputatı Ağa Əli Heydər Qızılbaş Vətənə
dönüşü ilə şəcərəsinin 5 əsrlik
həsrətinə son qoydu
"Əsrlər sonra əcdadlarımın yurduna ayaq basdım...
Keçirdiyim hissləri, duyğuları hər hansı sözlə ifadə etmək çox çətindir...
Həyatda xoş günlərim çox olub, amma bəlkə də ömrümdə heç vaxt indiki kimi sevinməmişdim. Çünki əcdadlarımın uğrunda qan tökdüyü, can verdiyi, qoynunda əbədi məskən saldığı doğma Vətəndəyəm. Ömrümün 51-ci baharında sanki özümü tapmışam...
Bakıya düşən kimi ulu babam Şah İsmayıl Xətainin heykəlini ziyarət etdim və çox duyğulandım. Qollarımı açıb əcdadımın abidəsini bağrıma basaraq dedim ki, ey böyük türk hökmdarı, fatehlər fatehi, Qızılbaş irsinin nümayəndəsi kimi səni ziyarətə gəlmişəm. Dünyaya yayılmış qızılbaşlar heç zaman səni unutmur, ucalığın, böyüklüyün irsimizdə yaşayır..."
O, Ağa Əli Heydər Qızılbaşdır.
Pakistanın
Nanqana Sahib şəhərində anadan
olub. Pakistan parlamentinin deputatıdır,
qanunverici orqanda Pəncab əyalətini təmsil edir və
hakimiyyətdə olan Müsəlman Liqasının
üzvüdür. Azərbaycan əsilli
deputat əsrlər sonra Qızılbaşlar nəslinin
üzvü kimi ilk dəfə Azərbaycana səfər edib.
Doğma yurduna gəlişi həyatında
silinməz izlər salıb və özünün təbirincə
desək, ömür səhifələrində unudulmaz anlara
çevrilib.
Qızılbaş irsinin nümayəndəsinin həyat
hekayətini dinləmək üçün onunla həmsöhbət
olduq.
7 dəfə
deputat seçilən Qızılbaş ailəsi
1971-ci ildə
Nanqana Sahib şəhərində ziyalı ailəsində
anadan olan Ağa Əli Heydər Qızılbaş orta təhsilini
başa vurduqdan sonra Pəncab Universitetində inkişaf, idarəetmə
və planlaşdırma ixtisası üzrə bakalavr və
magistr təhsili alıb. Eyni zamanda aqrar sektor
üzrə kənd təsərrüfatı mütəxəssisidir.
İdmana da böyük marağı olan Ağa Əli
Heydər bu sahənin həm üzgüçülük, həm
də otüstü hokkey növü ilə məşğul
olub. Hər iki sahə üzrə peşəkarlığı
nəticəsində Pakistanın üzgüçülük
və otüstü hokkey milli komandalarına dəvət edilərək
hər iki yığmanın üzvü olub. Uzun müddət milli komandanın şərəfini
qoruyub. Hokkey oyunlarının birində
ağır zədə aldığı üçün
idmanı tərk etmək məcburiyyətində qalıb.
Atası Ağa Qulam Heydər Qızılbaş Pəncabda
sayılıb-seçilən sahibkarlardan olub. Kənd təsərrüfatı
sahəsində çalışan Ağa Qulam Heydər həm
də siyasi proseslərdə fəal iştirak edib. Pakistanın sabiq Baş naziri Nəvaz Şərifin
rəhbərlik etdiyi Müsəlman Liqasının nümayəndəsi
kimi parlamentin 4 çağırış deputatı
seçilib.
Atasının
yolunu davam etdirən Ağa Əli Heydər də 2002-ci ildə
Pakistan parlamentinə keçirilən seçkilərdə
namizədliyini irəli sürüb və Nanqana Sahib şəhərini təmsil edən Müsəlman
Liqasının təmsilçisi kimi deputat mandatı
qazanıb. Bundan sonra 2
çağırış parlament seçkilərində də
qalib gələn Əli Heydər Qızılbaş hazırda
parlamentdə Pəncab əyalətini təmsil edən
deputatdır. Ailəlidir, 3 övladı
var.
Pakistanın
Qızılbaş Prezidenti, Baş naziri, nazirləri, generalları,
səfirləri...
Tarixdən məlum olduğu kimi,
Qızılbaşlıq Azərbaycanda yaranıb. Bu tayfanın hakim mövqedə
olduğu Səfəvilər dövləti həm də
"Qızılbaşlar dövləti"
adlandırılıb, bugünkü Azərbaycan, İran,
İraq, Ermənistan, Əfqanıstan, Qərbi Pakistan, Türkmənistan,
Şərqi Türkiyə, Şimal-Şərqi Hindistan və
Özbəkistan ərazilərini əhatə edib. Bu da onu deməyə əsas verir ki,
qızılbaşlar bu ərazilərdə kök salaraq
dünyanın dörd bir yanına səpələniblər.
Tariximizin iki mərhələsində Azərbaycan
torpaqlarından böyük köç baş verib. Bunlardan biri Şah Təhmasib
tərəfindən Moğol imperatoruna göndərilən
12000 qızılbaş döyüşçüsü, digəri
isə Nadir Şah Avşar tərəfindən onun Hindistan və
Əfqanıstanı istilası zamanı ora
apardığı Cavanşirlər, Bayat və Avşar
boylarıdır. İngilislərin apardığı
siyahıyaalmaya görə, 1901-ci ildə indiki Hindistanın
Uttar Pradeş əyalətinə uyğun gələn ərazidə
2877 nəfər, 1911-ci ilin siyahıyaalınmasına görə
isə indiki Pakistan və Hindistanda 1959 soydaşımız -
qızılbaş ömür sürüb. Hazırda
isə dünyanın müxtəlif ölkələrində
milyonlarla qızılbaş yaşayır.
Əhalinin təbii artımını və xaricə
köçü də nəzərə aldıqda Pakistan və
Hindistanda qızılbaş sayını 20 min nəfər təxmin
etmək olar.
Pakistanda qızılbaşların sayı və
rolu daha çoxdur. Onlar bu ölkəyə
prezident, nazirlər, generallar, səfir, hakim və digər
nüfuzlu peşə sahibləri bəxş ediblər.
Bu gün də Pakistanın ən ali
orqanlarında çalışan qızılbaşlar var.
Ağa Əli Heydər Qızılbaşın şəcərəsi
Avşar boyundandır. Ulu babalarının Azərbaycandan
köçünü belə izah edir: "Anam
danışırdı ki, Nadir şahın
Əfqanıstanı və Hindistanı fəthindən sonra
Qızılbaş nəslindən olan bir qrup yaxın qohumlar
1739-cu ildən sonra Əfqanıstanda məskunlaşıblar. Yəqin ki, onlar bu ərazilərə nəzarət
etmək üçün göndəriliblər. Burada bir müddət yaşadıqdan sonra 1860-cı
ildə ulu babam Ağa Qulam Heydər Qızılbaş
Pakistana köç edib. Pəncab vilayətində
qızılbaşlar çox böyük hörmətə
sahib olublar. Ağa Heydərin iki oğul
övladı olub - Ağa Vilayət Əli xan
Qızılbaş və Ağa Sərdar Əli xan
Qızılbaş. Onların hamısının
adının sonluğunda "xan" sözü də olub. Ağa Vilayət
Əli xanın da iki oğul övladı dünyaya gəlib -
Ağa Mehdi Şərif xan Qızılbaş və Ağa
Mehdi Həsən xan Qızılbaş. Ağa
Mehdi Şərif xan mənim atamın atası, yəni
babamdır. Bu şəxslər Pakistanda kənd təsərrüfatı
sahəsində böyük mülklərə, torpaqlara sahib
insanlar, iş adamları olublar. Qızılbaşların
içərisindən həm də tanınmış siyasətçilər,
generallar, ictimai-siyasi xadimlər də çıxıb".
Onun sözlərinə görə, əslən
qızılbaşlardan olan general Ağa Məhəmməd Yəhya
xan Qızılbaş 1917-ci ildə Pəncabda doğulub. O da Nadir
şahla 1739-cu ildə Hindistana gələn xanların nəslindəndir.
Bir çox döyüş əməliyyatlarında
iştirak edən Yəhya xan Qızılbaş ordu
komandanının müavini və 1969-1971-ci illərdə
Pakistan Prezidenti kimi ən ali vəzifələrdə
çalışıb. Məhz həmin
dövrdə, yəni 1969-1971-ci illərdə
Qızılbaş şəcərəsindən olan Müzəffər
Əli xan Qızılbaş isə ölkənin maliyyə
naziri vəzifəsini icra edib. 1908-ci ildə
Pəncab əyalətinin Lahor şəhərində anadan
olan Müzəffər Əli xan müxtəlif yüksək vəzifələrdə
çalışıb və 1958-ci ildə Qərbi
Pakistanın Baş naziri vəzifəsinə təyin olunub.
Vəzifədə olduğu dövrlərdə
bir sıra mühüm işlər görüb ki, bunlar da
onun növbəti dəfə yüksək postda təmsil
olunmasına zəmin yaradıb. Maliyyə
naziri vəzifəsindən getdikdən sonra isə uzun müddət
Pakistanın Fransadakı səfiri kimi çalışıb.
Onun da soy-kökü Nadir şah Afşarla bu torpaqlara gəlmiş
Səfəvi tərəfdarı Qızılbaş
tayfalarındandır. Atası Fateh Əli xan Qızılbaş
Hindistanın iri maliyyə maqnatlarından olub. Britaniyalı
tarixçi L.H.Qriff
"Pəncab liderləri. Pəncab
hökumətinin nəzarətindəki ərazilərdə
yaşayan nüfuzlu ailələrin tarixi və tərcümeyi-halı
ilə bağlı qeydlər" kitabında bu ailənin
Nadir şahla birlikdə Əfqanıstana gəlməsindən
bəhs edib.
Həmçinin Qızılbaş şəcərəsindən
olan Mehdi Əfzəl xan Qızılbaş da Hindistandakı
Böyük Britaniya ordusunun generalı vəzifəsinədək
yüksəlib.
Azərbaycana
necə gəldi, nəyi gördü, nə eşitdi, nələr
yaşadı
Bəs necə oldu ki, əsrlər sonra Ağa Əli
Heydər Qızılbaş əslən azərbaycanlı
olduğunu öyrəndi və əcdadlarının yurduna səfər
etdi?
Bu
maraqlı hekayəti öz dilindən eşidək: "Bu barədə ilk dəfə
anamdan eşitmişəm. O, həmişə deyərdi ki,
bizim vətənimiz Pakistan deyil, Azərbaycandır. Vətən sevgisinin ayrı bir duyğu olduğunu
söyləyirdi və deyirdi ki, gərək onu hiss edəsən,
yaşayasan. Həmin vaxtlar mən onu
başa düşürdüm, amma o duyğunu hiss edə
bilmirdim. İllər ötdü və bir
gerçəklik yaşandı. Sən demə,
Azərbaycanda da bizi axtaran, arayan var imiş. Dünya
Qızılbaş Qlobal İrsi Şura Təşkilatından
Babək Hüseynli (təşkilatın həmtəsisçisi)
mənimlə əlaqə saxlayıb ətraflı məlumat verdi. Babək müəllim
öncə mənim kimliyimi, irsimi, şəcərəmi izah
etdi və gördüm ki, hər şeyi doğru söyləyir.
Doğrusu,
çox təəccübləndim, axı onda bu qədər
doğru məlumat hardan ola bilərdi? Sonra məlum oldu ki, Babək Hüseynli də
Qızılbaş şəcərəsinin nümayəndəsidir
və dünyada yaşayan bütün
qızılbaşları bir araya toplamaq üçün
Dünya Qızılbaş Qlobal İrsi Şura Təşkilatını
yaradıb. Feysbuk sosial şəbəkəsində
yaratdığı "Qizilbash Global Heritage Şura" səhifəsi
də bu məqsədlərə xidmət edir. Bunu eşidəndə həqiqətən çox
sevindim".
Babək
Hüseynli əslən azərbaycanlı olan pakistanlı deputatı Azərbaycana
dəvət edir və Ağa Əli Heydər buna etiraz etmir. Amma Azərbaycana gələrkən
düşünür ki, bəlkə də burada bir-iki
qızılbaş ailəsi qalıb. O da həmin ailələrlə
görüşüb geri qayıdacaq. Amma özünün də
dediyi kimi yanılıbmış: "Ana Vətənə
ayaq basanda, insanların xoş, nəvazişli
davranışlarını görəndə anamın söylədiyi
o müqəddəs duyğuları hiss etməyə
başladım. Gördüklərimə,
eşitdiklərimə inana bilmirdim və sevincimdən ürək
çırpıntılarım sanki get-gedə artırdı.
Bu hissləri bölüşməyə
çox yaxın insan axtarırdım. Əlimi
atıb telefona oğluma zəng elədim. Dedim ki, əziz
balam, mən indi ana Vətəndəyəm və bura çox
heyrətamizdir. Çox danışa bilmədim,
çünki kövrəlirdim... İnsanların
gülərüz simalarına baxdıqca sanki
özümü, qardaşlarımı, bacılarımı,
övladlarımı görürdüm. Yəni
mən burada özümü tapdım. Hərdən
sevincimdən sanki uçurdum, hərdən də qəhər
məni boğurdu. Axı bu qədər
uzun dövrdə bizlər niyə Vətəndən xəbərsiz
olmuşuq?!"
Ağa
Əli Heydər Qızılbaş Bakıya gəldikdən dərhal
sonra Şah İsmayıl Xətainin heykəlini də ziyarət
edib və bir daha ona bəlli olub ki, həm Şah
İsmayıl, həm də fatehlər fatehi Nadir şah Azərbaycanın
qüdrətli sərkərdələri, tarixi şəxsiyyətləri
kimi hər zaman hörmətlə anılır və
könüllərdə yaşayırlar. Bugünkü
qüdrətli Azərbaycan isə onların yaratdıqları
dövlətin mənəvi varisidir.
Pakistandan
Azərbaycana baxış
Əli Heydər Qızılbaş Azərbaycana ilk dəfə
səfər etməsinə baxmayaraq ölkəmiz haqqında
kifayət qədər məlumatlıdır. Pakistan-Azərbaycan
münasibətlərinin hər zaman yüksək səviyyədə
olduğunu söyləyən deputat deyir ki, Pakistan Azərbaycanın
müstəqilliyini tanıyan ikinci dövlət olub. Pakistan Azərbaycan torpaqlarını işğal edən
Ermənistanla heç bir diplomatik əlaqə qurmayıb.
İki ölkə rəhbərliyi səviyyəsində
keçirilən görüşlər, imzalanan sazişlər
bu əlaqələri daha da möhkəmləndirib. Son illərdə
isə bu ələqələr ən yüksək strateji tərəfdaşlıq
səviyyəsinə yüksəlib.
İkinci Qarabağ müharibəsi dövründə
Pakistanın Azərbaycana verdiyi mənəvi dəstək də
hər zaman yüksək dəyərləndirilir. Çünki
Azərbaycan haqq savaşına başlayarkən, bəzi
dövlətlər ölkəmizə qarşı
açıq-aşkar "hücum" edərkən Pakistan rəsmən
Azərbaycanın haqlı mövqeyini dəstəklədiyini
bəyan etdi.
Ağa Əli Heydər də qeyd edir ki, Pakistan-Azərbaycan
münasibətləri bütün dövrlərdə
çox yüksək səviyyədə inkişaf edib. Azərbaycan müstəqilliyini
bərpa etdikdən sonra isə bu əlaqələr daha da
şaxələnib, möhkəmlənib: "İkinci
Qarabağ müharibəsində hər kəsə bəlli
idi ki, bu, Azərbaycanın haqq savaşıdır. Çünki Qarabağın Azərbaycan ərazisi
olduğunu təsdiqləyən sənədlər də var
idi. İşğalçı Ermənistan
silahlı birləşmələrinin bu ərazilərdən
qeyd-şərtsiz çıxarılması ilə
bağlı BMT-nin Təhlükəsizlik Şurasının 4
qətnaməsi bunu təsdiqləyirdi. Amma
dünya birliyi bu ədaləti təmin edə bilmədi.
Azərbaycan yalnız öz gücünə, təkbaşına
30 illik münaqişəni həll etdi və ədalət zəfər
çaldı. Qarabağ
işğalçılardan təmizləndi. Qalib Sərkərdə kimi Prezident İlham
Əliyevin Şuşada Azərbaycan bayrağını
dalğalandırması ürəyimizi dağa döndərdi.
İlham Əliyevin Zəfəri dünya
qızılbaşlarını birləşdirən ən
böyük gücdür. Axı
Qarabağ mənim əcdadlarımın yurdudur və
şanlı Zəfər Qızılbaş sərkərdələrinin,
fatehlərinin ruhlarını da şad etdi. Zəfərdən sonra Azərbaycanın ən ucqar
kəndində belə Azərbaycan-Türkiyə bayraqları
ilə yanaşı, Pakistanın da bayrağının
dalğalanması qürurverici idi".
Pakistan
parlamentinin deputatı Ağa Əli Heydər
Qızılbaş hesab edir ki, hazırda iki ölkə
arasında münasibətlər yüksələn xətlə
inkişaf edir və yeni Baş nazir Şahbaz Şərifin rəhbərlik
etdiyi hökumət də Azərbaycanla münasibətlərin
daha da gücləndirilməsində maraqlıdır. O, buna
misal kimi iyunun 27-də Baş nazir Şahbaz Şərifin Azərbaycanın
Müstəqillik Günü münasibətilə Prezident
İlham Əliyevə ünvanladığı məktubda yer alan ifadələrə diqqət çəkir.
Məktubda qeyd edilir ki, bu il ölkələrimiz
arasında diplomatik əlaqələrin qurulmasının 30-cu
ildönümü qeyd edilir. Ötən 30 il
ərzində iki xalq arasında dostluq və qardaşlıq
münasibətləri daha da güclənib. Baş
nazir əminliklə vurğulayıb ki, siyasi, iqtisadi və mədəni
sahələr də daxil olmaqla, ikitərəfli əməkdaşlıqdakı
qarşılıqlı maraqlar və sabit dinamika növbəti
illərdə daha da inkişaf edəcək.
"Pakistan Qarabağ müharibəsində Azərbaycanın
haqq işini dəstəkləməkdən qürur duyur. Zati-alinizin Cənubi
Qafqazda sülh və sabitliyin təşviqindəki şəxsi
səylərini yüksək dəyərləndirirəm.
Həmçinin hökumətinizə Azərbaycanın
işğaldan azad olunmuş ərazilərinin yenidən
qurulmasında və bərpasında uğurlar arzulayıram.
Pakistan bu sahədə öz köməyini
göstərməyə və təcrübəsini
bölüşməyə hazırdır", - deyə
Şahbaz Şərif məktubunda vurğulayıb.
Ağa Əli Heydərin fikrincə, iyunun 30-da Bakıda
İlham Əliyevlə Pakistan Senatının Sədri Məhəmməd
Sadiq Sərcani arasında keçirilən görüşdə
səslənən səmimi fikirlər də iki ölkə
arasındakı münasibətlərin dinamikliyinin getdikcə
yüksələcəyini deməyə əsas verir.
Azərbaycana ilk səfəri çərçivəsində
Əli Heydər Qızılbaş Diasporla İş üzrə
Dövlət Komitəsinin sədri Fuad Muradovla da
görüşüb. Maraqlı keçən görüşdə
dünyaya yayılmış qızılbaşların
hazırkı vəziyyəti, onlarla əlaqələrin
qurulması və Azərbaycanla əməkdaşlığın
daha da intensivləşməsi ilə bağlı fikir
mübadiləsi aparılıb.
Pakistanlı
deputat geri dönərkən Pəncabın iş
adamlarının birgə toplantısında Azərbaycanla
bağlı təkliflər irəlü sürəcəyini
deyir: "Geri qayıdan kimi aqrar sektor mütəxəssisləri,
həm də digər həmkarlarımla keçirəcəyim
görüşlərdə Azərbaycanda, xüsusən də
işğaldan azad edilən torpaqlarda yaranmış investisiya
imkanlarını, ölkənin xarici investorlar
üçün yaratdığı yüksək şəraiti
izah edəcəm. Eyni zamanda səfər təəssüratlarımı
deputatı olduğum Pəncabın Baş naziri Həmzə
Şahbaz Şəriflə də bölüşəcəm.
Bütün bu görüşlər, təmaslar pakistanlı
iş adamlarının Qarabağa, Şərqi Zəngəzura
investisiya yatırmaları üçün müsbət
addım ola bilər".
Qızılbaşlar
bir araya toplanır
Əli
Heydər Qızılbaşın Azərbaycana, ana Vətəninə
səfərini reallığa çevirən, tarixi
torpaqlarımızdan köçən
soydaşlarımızın yenidən bir araya gəlməsi, təşkilatlanması
üçün ciddi səylər göstərən gənc
vətənpərvər Babək Hüseynli ilə də həmsöhbət
olduq.
Əslən Qızılbaş irsindən olan Babək
Hüseynlinin ökəmizdən kənarda yaşayan
qızılbaşların vahid mərkəzdə birləşməsi
üçün yaratdığı Dünya
Qızılbaş Qlobal İrsi Şura Təşkilatında
xaricdə yaşayan soydaşlarımız, xüsusən də
gənclər təmsil olunurlar. Onlar çox
mühüm əhəmiyyətli xoşməramlı
missiyanı üzərlərinə götürüblər.
Babək
Hüseynli ilə dünyadakı qızılbaşların
sayı, yaratdığı təşkilat, qarşıda duran
məqsədlər, planlar barədə söhbətləşdikdə
bəlli oldu ki, əvvəllər Pakistan, Hindistan,
Əfqanıstan, Türkmənistan və Özbəkistanda
yaşayan soydaşlarımızın sayı ilə
bağlı dəqiq rəsmi məlumat olmayıb. Türkmənistan və Özbəkistandakı
soydaşlarımızın statistikası əsasən sovet və
postsovet dövründə Qafqaz Azərbaycanından oraya
köçənləri ehtiva edir. Lakin bu
ölkələrdə daha qədim və köklü
icmalarımız var ki, onlar indiyəcən "kəşf
edilməyib".
Müxtəlif ölkələrdə yaşayan Qızılbaş nəslinin davamçılarını əvvəlcə feysbuk sosial şəbəkəsi üzərindən bir araya toplayan Babək Hüseynli bu təşəbbüsün daha böyük hədəflərə doğru irəlilədiyini deyir. O, dünyada Qızılbaş adı altında yaşayan azərbaycanlıların soy yaddaşının yaradılması ilə bağlı işlərin başladığını, yüzlərlə soydaşımızın məlumatlarının (ad, soyad və əlaqə nömrələri) toplandığını bildirir. Feysbukda yaratdığı "Qizilbash Global Heritage Şura" səhifəsi də bu məqsədlərə xidmət edir.
Sosial şəbəkədəki bu səhifədə 30-dan artıq ölkədən minlərlə həmvətənimiz aktiv fəaliyyət göstərir, müxtəlif sahələrdə fikir və informasiya mübadiləsi aparırlar. Qrup üzvlərinin əksəriyyətini gənclər təşkil edir. Əcnəbi ölkədə doğulub oranın bir parçasına çevrilmiş və qloballaşma dövrünün reallıqlarını yaşayan bu gənclər indi soy-köklərinə bağlılıq göstərir, qızılbaş mahiyyətləri və Azərbaycanəsilli olmaları ilə qürur duyurlar: "Əsas məqsədimiz Azərbaycanı, dilimizi, tariximizi, zəngin qrup mədəniyyətimizi tanıtmaq, dünyanın hər yerində Azərbaycana bağlı insanların sayını artırmaqdır".
Bu xoşməramlı missiya ilə qrup dünyanın müxtəlif istiqamətlərinə köçmüş, orda yaşayan Qızılbaşəsilli soydaşlarımıza ölkəmizi, dilimizi, tariximizi, zəngin mədəniyyətimizi tanıtmağa çalışır, Səfəvi dövlətinin əsas özəyini təşkil edən dünya qızılbaşlarını bir yerə cəmləmək, Azərbaycanın şanlı tarixi, mədəniyyəti ilə tanış etmək və ölkəmizin beynəlxalq aləmdə etibarını artırmaq üçün ciddi səy göstərir.
İnanırıq
ki, yeni yaranan Dünya Qızılbaş Qlobal İrsi Şura
Təşkilatı qarşısına qoyduğu hədəfləri
tezliklə reallığa çevirərək mühüm
uğurlar qazanacaq və bu proses
Azərbaycan tarixinə əvəzsiz töhfə
vermiş olacaq.
Rəşad
BAXŞƏLİYEV,
Azərbaycan.-2022.- 8 iyul.- S.4.