Qoşulmama Hərəkatı -
sülh və ədalət uğrunda birgə fəaliyyət
Müasir dünyamızda ümumən bəşəriyyəti qayğılandıran bir çox qlobal problemlərə birgə həllərin tapılması, sülhə, təhlükəsizliyə, davamlı inkişafa dəstək üçün ölkələr arasında əməkdaşlığın qurulması çox vacibdir. Belə bir əməkdaşlığın öz məqsədlərinə çata bilməsindən ötrü isə onun hər hansı hərbi blokun maraqlarından kənarda qurulması, beynəlxalq hüquqa hörmət prinsipləri əsasında fəaliyyəti çox əhəmiyyətlidir. Yalnız belə olduqda dövlətlər müasir dünyamızın çağırışlarına cavab verə, mövcud problemlərə ortaq həllər tapa bilərlər. Bu baxımdan Azərbaycanın sədrlik etdiyi Qoşulmama Hərəkatı son illər ölkələr arasında çox uğurlu əməkdaşlıq platformasına çevrilmişdir.
30 iyun 2022-ci ildə Qoşulmama Hərəkatı Parlament Şəbəkəsinin paytaxtımızda keçirilmiş Bakı Konfransı da bunu bir daha göstərdi. Qoşulmama Hərəkatının sədri, Azərbaycan Respublikasının Prezidenti İlham Əliyevin konfransdakı proqram xarakterli çıxışı müasir beynəlxalq münasibətlər sistemində bu qurumun yeri və rolunu, həyata keçirdiyi missiyanı, qarşıya qoyduğu hədəfləri diqqətə çatdırmış oldu.
İkinci ən böyük beynəlxalq qurum
Hazırda 120 üzvü, 17 müşahidəçi dövləti və 10 müşahidəçi beynəlxalq təşkilatı özündə birləşdirən Qoşulmama Hərəkatı Birləşmiş Millətlər Təşkilatından sonra dünyada ikinci ən böyük beynəlxalq qurumdur. Müxtəlif qlobal məsələlərlə bağlı hərəkat daxilində razılaşdırılmış mövqe BMT Baş Assambleyası çərçivəsində qərarların qəbuluna təsir baxımından əhəmiyyətli rol oynayır.
Son illər bu təşkilatın fəaliyyətinin güclənməsində Azərbaycanın müstəsna xidmətləri var. Məhz ölkəmizin təşkilata sədrliyi dövründə Qoşulmama Hərəkatının nüfuzu daha da yüksəlmiş, beynəlxalq proseslərə təsir imkanları genişlənmiş, qarşıya qoyduğu vəzifələr aydınlaşmışdır.
Azərbaycan bu quruma 2019-cu ildən sədrlik edir. 2019-cu ilin
25-26 oktyabrında ölkəmizin evsahibliyi ilə Hərəkatın
dövlət və hökumət
başçılarının 18-ci Zirvə
görüşü keçirilmişdir. Tədbirdə
BMT-yə üzv 120 dövlətin yüksəksəviyyəli
nümayəndələri, 42 beynəlxalq təşkilatın
təmsilçiləri iştirak etmiş, Bakı Sammiti ilə
Hərəkata sədrlik 2019-2022-ci illər üzrə Azərbaycana
keçmişdir.
Əslində, Qoşulmama Hərəkatına sədrlik
müddəti 3 ildir. Amma üzv dövlətlər təşkilata çox
uğurlu sədrliyini nəzərə alaraq Azərbaycanın
əlavə 1 il müddətinə də
rəhbərlik etməsi ilə bağlı ölkəmizə
müraciət etmişlər. Azərbaycan da Hərəkatın
fundamental prinsiplərinə və dəyərlərinə
olan sadiqliyini, mürəkkəb tarixi dövrdə bu quruma səmərəli
sədrliklə bağlı qazandığı dəyərli
təcrübəni nəzərə alaraq, müraciətə
müsbət cavab vermişdir. Beləliklə,
Azərbaycanın Qoşulmama Hərəkatına sədrliyi
2023-cü ilin axırınadək uzadılmışdır.
Hərəkatda təmsil olunan dövlətlərin bu
yekdil qərarı heç də təsadüfi deyil. Bu, bir tərəfdən
ölkəmizə, Prezident İlham Əliyevə yüksək
rəğbətdən irəli gəlirsə, digər tərəfdən
də təşkilata sədrlik dövründə Azərbaycanın
ortaya qoyduğu parlaq təcrübəyə,
qazanılmış uğurlara obyektiv qiymətin ifadəsidir.
Qoşulmama
Hərəkatını gücləndirən təşəbbüslər
Azərbaycanın Qoşulmama Hərəkatına
qazandırdığı nailiyyətlərin əhəmiyyətli
qismi bu qurumun institusional inkişafı ilə
bağlıdır. Hərəkatın Parlament Şəbəkəsinin
yaradılması da bura aiddir. O da bir reallıqdır ki,
parlament diplomatiyası müasir qlobal proseslərdə
çox mühüm rol oynayır. Parlament şəbəkəsi
təkcə bu Hərəkatdakı ölkələr
arasında həmrəyliyə töhfə verməyəcək,
eyni zamanda dünyanın müxtəlif parlament təşkilatları
ilə sıx əməkdaşlıq münasibətləri
quracaq. Qoşulmama Hərəkatının
institusional inkişafı üçün atılmış
daha bir önəmli addım isə Hərəkatın Gənclər
Şəbəkəsinin qurulmasıdır. Konfransda bununla bağlı mötəbər bir tədbirin
- Qoşulmama Hərəkatının Gənclər Sammitinin
keçiriləcəyi xüsusi vurğulandı. Azərbaycan Nyu Yorkda Qoşulmama Hərəkatının
Dəstək Ofisinin yaradılması təşəbbüsündən
də çıxış etmiş və bu təşəbbüs
üzv dövlətlər tərəfindən dəstəklənmişdir.
Prezident
İlham Əliyev çıxışında qeyd etdiyi kimi,
Azərbaycanın Qoşulmama Hərəkatının sədri
qismində irəli sürdüyü təşəbbüslər
həmrəyliyi və qarşılıqlı dəstəyi
möhkəmləndirməyə yönəlib: "İndi
institusional inkişaf istiqamətində daha çox
addımların atılması üçün düzgün
vaxtdır və bu da öz növbəsində bizə beynəlxalq
arenada maraqlarımızı qorumağa və əlbəttə
ki, ölkələrimiz arasında həmrəyliyin gücləndirilməsinə
kömək edəcək".
Münaqişələrsiz
dünya uğrunda
Azərbaycan Qoşulmama Hərəkatına təkcə
ölkələrin öz maraqlarını müdafiə
etdiyi, bir-birini dəstəklədiyi platforması kimi
yanaşmır. Ümumən beynəlxalq arenada bu qurumun
daha fəal rol oynamaq üçün güclü platformaya
çevrilməsi imkanlarını da yüksək qiymətləndirir
və buna çalışır. Qoşulmama
Hərəkatının tarixində bununla bağlı
müzakirələr olub. Dövlət rəhbərimiz
qurumun Parlament Şəbəkəsinin Bakı
Konfransındakı çıxışı zamanı
vurğuladı ki, bu müzakirələrə yenidən
başlamağın vaxtı çatıb. Çünki bu gün biz bütün dünyada
qlobal qütbləşmənin, müharibənin,
münaqişənin, proqnozlaşdırıla bilinməyən
vəziyyətin, ərzaq, enerji və humanitar
böhranların şahidiyik.
Belə bir durumda Bandunq prinsiplərinin təşviqi
mövcud problemlərə birgə həllərin
tapılmasına kömək göstərə bilər. Bu prinsiplərin
əsas məzmunu dünyada sülhə, əməkdaşlığa
dəstək, müstəmləkəçilik siyasətinə
son qoyulması, hərbi blokların fəaliyyətinin ölkələr,
xalqlar, ümumən bəşəriyyət üçün
doğurduğu təhdidlərin aradan
qaldırılmasıdır. Bunlar
müasir dünyamız üçün də son dərəcə
aktualdır.
Azərbaycanın
mövqeyinə görə, əgər Bandunq prinsiplərinə,
yəni başqa sözlə, ölkələrin ərazi
bütövlüyü, suverenliyi, müstəqilliyi, bir-birinin
işlərinə müdaxilə etməməsi məsələlərinə
hər kəs tərəfindən əməl edilsə və
onlar bütün ölkələr tərəfindən qorunub
saxlanılsa, onda dünyamızda heç bir müharibə,
münaqişə və ədalətsizlik olmaz. Ona görə də ölkəmiz Bandunq prinsiplərini
dövlətlər arasında əməkdaşlıq və
qarşılıqlı fəaliyyət üçün yeganə
əsas kimi qəbul edir və onların bütün
dünyada təşviqinə öz töhfəsini verməyə
çalışır.
Azərbaycanın
humanitar missiyası
Azərbaycanın
Qoşulmama Hərəkatına sədrliyi çox çətin
və mürəkkəb zamana təsadüf etdi. Bu, bəşəriyyəti çənginə
almış COVID-19 pandemiyası ilə mübarizə
aparıldığı dövr idi. Belə
bir böyük, miqyaslı mübarizənin effektivliyi
üçün bütün ölkələrin səylərini,
imkanlarını birləşdirməsi, bir-birinə
qarşılıqlı kömək göstərməsi tələb
olunurdu. Pandemiya hər kəsə o həqiqəti
anladırdı ki, heç bir fərd, xalq, ölkə bu
dünyada təklikdə mövcud deyil. Yer
kürəsi bizim ümumi evimizdir, bu evdə sağlam,
xoşbəxt, sahmanlı, rifah dolu mühitin olması
üçün hamı ümumi məqsədlər naminə
çalışmalıdır. Belə bir
dövrdə Azərbaycan beynəlxalq arenada ağır xəstəliklə
mübarizə aparan ən fəal ölkələrdən
oldu. İrəli sürdüyü təşəbbüslərlə
bütün dünyanı bu qlobal problem ətrafında bir
araya gətirməyə çalışdı və əzmkar
fəaliyyəti ilə mühüm nəticələr əldə
etdi. Bu baxımdan Qoşulmama Hərəkatının
yaratdığı imkanlar da pandemiyaya qarşı mübarizə
işində ümumi məqsədlərə doğru birgə
çalışmalara kömək göstərdi. Belə ki, Azərbaycanın təşəbbüsü
ilə 2020-ci ilin mayında Qoşulmama Hərəkatının
onlayn Zirvə toplantısının keçirilməsi
pandemiya ilə mübarizədə dövlətlərin səfərbər
edilməsi üçün ilkin addımlardan oldu.
Onu da qeyd edək ki, Azərbaycanın səyləri təkcə
ölkələr arasında həmrəyliyin gücləndirilməsinə
və dəstəyin təmin edilməsinə yönəlməmişdi. Azərbaycan
Respublikasının Prezidenti İlham Əliyevin təşəbbüsü
ilə ölkələrə dəstək, tibbi və humanitar
yardımla bağlı məlumat bazası
hazırlanmışdı və Ümumdünya Səhiyyə
Təşkilatı bu bazadan geniş şəkildə faydalana
bilmişdi.
Bundan başqa, pandemiyanın ən gərgin dövrlərində
Azərbaycan çox böyük humanitar missiya yerinə yetirərək
80-dən çox ölkəyə maddi yardım və
humanitar dəstək göstərdi. Eləcə də
Ümumdünya Səhiyyə Təşkilatına 10 milyon
ABŞ dolları məbləğində ianə etdi. Bu vəsaitin yarısı məhz Qoşulmama Hərəkatının
üzvü olan dövlətlərə birbaşa
ayrılmışdı.
Azərbaycan həmçinin peyvənd millətçiliyinə
qarşı açıq şəkildə etirazını
bildirən ölkələrdən oldu. Sirr deyil ki,
pandemiyanın ilk günləri və aylarında bəzi zəngin
ölkələr onlara lazım olduğundan hətta
üç, yaxud dörd dəfə çox peyvənd tədarük
edir, bununla da digər ölkələrin peyvəndlərə
çıxış imkanlarını məhdudlaşdırırdı.
Əksər ölkələr
çıxılmaz vəziyyətdə qaldıqları halda
zəngin ölkələr peyvəndlərin mütləq əksəriyyətindən
faydalanırdı. Bu, peyvənd millətçiliyinin
açıq təzahürü, insan hüquqlarının
pozulması idi. Ona görə də Azərbaycan
bu xoşagəlməz duruma qarşı haqq səsini
qaldıran birinci dövlət oldu. Bu
mübarizə BMT tərəfindən də dəstəkləndi.
Peyvəndlərin hər kəs üçün əlçatan
olmasında, insan həyatının qorunmasında Azərbaycanın
səyləri səmərə verdi.
Ölkəmizin
haqq işinə dəstək
Azərbaycan
Prezidenti İlham Əliyev Bakı Konfransındakı
çıxışı zamanı bəyan etdi ki, Azərbaycan
Qoşulmama Hərəkatının sədri olaraq ədalətsizliyə,
beynəlxalq hüququn pozulmasına, müxtəlif
münaqişələrə qarşı sərgilənən
selektiv yanaşmaya və ayrı-seçkiliyə qarşı
mübarizəni bundan sonra da davam etdirəcək.
Çünki özünə qarşı bu
münasibəti illərlə yaşamış ölkə
kimi Azərbaycan ədalətsizliyin, beynəlxalq hüquqa zidd
addımların, bir ölkəyə, xalqa qarşı ikili
standartların nə demək olduğunu çox yaxşı
bilir. Azərbaycan
dünyada ən böyük ədalətsizliklə üzləşmiş
ölkələrdən biri idi. Ərazisinin
20 faizinin Ermənistan tərəfindən işğalı
etnik təmizləmə ilə nəticələndi. Bir milyon azərbaycanlı qaçqın və məcburi
köçkün vəziyyətinə düşdü.
Azərbaycan xalqının tarixi və dini irsi
erməni işğalçıları tərəfindən
Yer üzündən silindi. Məscidlərimizin
təhqiri, mədəni və dini abidələrimizin
dağıdılması - bunlar faktlardır və bunu
heç kəs görməzdən gələ bilməz.
Konfransda xüsusi vurğulandı ki, Ermənistan-Azərbaycan münaqişəsi ilə bağlı vəziyyət təkcə regional deyil, qlobal məsələdir. Çünki bu, təkcə beynəlxalq hüququn təməl prinsiplərinin tam pozulması deyil, həm də BMT Təhlükəsizlik Şurasının qətnamələrinin kobud şəkildə pozulması və onlara məhəl qoyulmaması halı idi. 1993-cü ildə BMT Təhlükəsizlik Şurası 4 qətnamə qəbul etmişdir ki, orada erməni qoşunlarının Azərbaycan ərazisindən dərhal, tam və qeyd-şərtsiz çıxarılması tələb edilirdi. Amma Ermənistan bu qətnamələrə məhəl qoymadı. Əfsuslar ki, beynəlxalq ictimaiyyət də buna göz yumdu, işğalçı ölkədən qətnamələrin icrasını tələb etmədi. Problemin həllinə görə məsuliyyət daşıyan ATƏT-in Minsk qrupu isə 30 illik fəaliyyəti dövründə münaqişəni yoluna qoymaq əvəzinə, əfsus ki, münaqişənin əbədi olmasını istəyənlərin əlində alətə çevrildi. Münaqişənin heç bir insan itkisinə yol verilmədən dinc həlli üçün ən effektiv vasitə kimi Ermənistana qarşı beynəlxalq sanksiyalar tətbiq edilə bilərdi. Əfsuslar olsun ki, heç bir sanksiya tətbiq edilmədi. Əksinə, Ermənistan Azərbaycanla müqayisədə bəzi ermənipərəst siyasətçilərdən getdikcə daha çox dəstək almağa başladı.
Beləliklə, Azərbaycan Müzəffər Ordumuzun gücü ilə özü cəmi 44 gün içində beynəlxalq hüquq normalarını təmin etdi. Torpaqlarını işğalçılardan təmizlədi.
44 günlük Vətən müharibəsindəki tarixi qələbəmiz nəticəsində Ermənistan kapitulyasiya aktını imzalamağa məcbur qaldı. Qoşulmama Hərəkatına üzv dövlətlər Azərbaycan xalqının haqq-ədalət uğrunda mübarizəsini dəstəklədilər. Anti-Azərbaycan mahiyyətli bəyanatı, ölkəmizə qarşı yönələn ittihamı blokladılar.
Prezident İlham Əliyev konfransdakı çıxışı zamanı bir daha bəyan etdi ki, Azərbaycanın münaqişənin həllinə nail olmasından, işğala son qoymasından, ərazi bütövlüyünü hərbi-siyasi yollarla bərpa etməsindən sonra Minsk qrupuna daha ehtiyac yoxdur. "Minsk qrupuna artıq əlvida demişik. Təəssüflər olsun ki, Ermənistan və digərləri onu həyata qaytarmağa çalışır. Lakin bu, mümkünsüzdür. ATƏT-in Minsk qrupu ilə bağlı hər hansı spekulyasiya nəinki qeyri-məhsuldardır, eyni zamanda regionda mümkün sülhün bərqərar olması üçün dağıdıcı təsirə malikdir".
Azərbaycanın amalı regionda və dünyada əbədi sülhə, rifaha, davamlı inkişafa nail olmaqdır. Ədalətsizliklərin, ikili standartların norma kimi qəbul olunduğu, güclünün haqlı sayıldığı dünyada insan xoşbəxt ola bilməz. İnsanın xoşbəxtliyinin açarı hüququn aliliyində, fərdlərin, xalqların və ölkələrin bir-birinə hörmətlə yanaşmasında, nəcib niyyətlər uğrunda birgə fəaliyyətdədir. Ölkəmizin Qoşulmama Hərəkatı çərçivəsindəki fəaliyyəti də bu işıqlı hədəfə yönəlib.
İradə
ƏLİYEVA,
Azərbaycan.-2022.- 8 iyul.- S.7.