Şuşanın Məhbubəsi
Şuşa, 1902-ci il, 11 iyul...
Cıdır düzündə, Topxanada min bir rəngli gül-çiçəyin al-əlvan kəpənəklərlə gözəllik yarışına çıxdığı bir yay səhəri...
Kirsdən, Sarıbabadan əsən sərin meh Yuxarı Gövhər ağa məscidindən ucalan azan sədasını Şuşaya yayır, qalalıları sübh namazına səsləyir...
Adəti üzrə lap obaşdan duran Kərim bəy də bu müqəddəs avazın sədaları altında namaza başlayır. Elə bu an "Mehmandarovların imarəti"ni daha bir müqəddəs səs - dünyaya yenicə göz açan bir körpənin çığırtısı bürüyür...
Kərim bəy Tanrıya etdiyi dualar sırasında eşitdiyi xoş sədanın gətirdiyi şadlıq ruhu ilə namazını sonacan qılıb qurtarır. Canamazını büküb kənardakı daş-qaşlı sandıqçanın üzərinə qoyur və aramla qapıya yönəlir. Və o, dəhlizdə qarşılaşdığı eşikağasından belə bir müjdəli xəbər alır: "Bəy, muştuluğumu verin, bir qızınız oldu..."
Gülümsəyərək əl atıb ağzı qızılı baftalı pul kisəsini çıxaran bəy bir qızıl onluğu eşikağasının ovcuna basır. Onu da buyurur ki, dərhal qurbanlar kəsilib ehtiyacı olanlara paylanılsın...
O gün Şuşanın yaşıl çəmənlərindən Kərim bəyin öz əlləri ilə dərdiyi bir dəstə gül-çiçək isə ömür-gün yoldaşı Zəringül xanım üçün dünyanın ən qiymətli hədiyyəsi olur...
Ata bu nurlu yay səhərində Tanrının ona lütf etdiyi övlad payına, sonbeşik qızına "istəkli", "sevimli" anlamında bir ismi - Məhbubə adını qoyur...
Hər zaman Allahın, ailəsinin, Qarabağının, xalqının istəkli, sevimli məhbubu olması üçün...
Mehmandarovlarla Qacarların nəvəsi
O, Azərbaycan tarixinə qol-budaqlı ulu çinar əzəməti ilə daxil olan adlı-sanlı bir soydan - Mehmandarovlardandır. Xeyli vətənpərvər və ziyalı azərbaycanlının yetişərək xalqımızın həyatında müstəsna rol oynadığı nüfuzlu nəslin qızıdır. Elə o, özü də tibb elmində ən uca zirvələrə yüksələrək, ilk azərbaycanlı qadın alimlərdən biri kimi möhtəşəm titula sahib işıqlı bir ziyalı olmağı bacarıb. Azərbaycan xanımlarına xas gözəlliyi, ədəb-ərkanı, kübarlığı, xeyirxahlığı, vətənpərvərliyi, mərdanəliyi, mətinliyi ilə görənlərinin hafizəsində dərin iz buraxan, unudulmaz olaraq yaddaşlara köçən respublikanın tanınmış mama-ginekoloqu, tibb elmləri doktoru, professor, Azərbaycanın Əməkdar həkimi - bu gün 120 illik yubileyi qeyd olunan Məhbubə xanım Mehmandarova-Mahmudbəyovadan danışırıq.
1902-ci il iyul ayının 11-də Şuşada Azərbaycanın ilk ali təhsilli həkimi Kərim bəy Mehmandarovun və Bəhmən Mirzə Qacarın qızı Zəringül (Şahbacı) xanımın ailəsində dünyaya göz açıb Məhbubə xanım. Atası Kərim bəy Mehmandarov ömrü boyu xalqının tərəqqisi və rifahı üçün çalışıb-vuruşmuş vətənpərvər azərbaycanlı idi. 1905-1906-cı illərdə ermənilərin Qarabağda müsəlmanlara qarşı başladıqları qırğınların qarşısını almaqda müstəsna xidmətləri olan Kərim bəy "Difai" təşkilatının liderlərindən olmuş, onun Şuşa şöbəsini yaratmışdı. Məhz Kərim bəyin cəsur səyləri nəticəsində erməni daşnaklarının dəfələrlə Şuşa əhalisinə qarşı planlaşdırdıqları qətliamların qarşısı alınmış, burunları ovulmuşdu. Kərim bəy həm də böyük xeyriyyəçi idi. Şuşada evində xəstəxana və yetim qalmış uşaqlar üçün məktəb, qiraətxana açmışdı. 1911-ci ildə Şuşada ilk dəfə qızlar məktəbinin açılması da Kərim bəyin təşəbbüsü ilə olmuşdu.
Kərim bəyin dörd oğlu, 5 qızı vardı. O, Peterburqda yaşayarkən Aleksandra Mixaylovna Dolqanova ilə evlənmiş və bu nikahdan onun Mixail adlı (Mixail Kərim bəy oğlu Mehmandarov-Tuşinski) oğlu olmuşdu. İkinci dəfə isə Şuşada Zəringül xanımla ailə həyatı qurmuş və bu nikahdan da onların 8 övladı dünyaya gəlmişdi: Rəşid bəy, Ədil bəy, Surxay bəy, Zəhra xanım, Turan xanım, Kübra xanım və Nüşabə xanım. Məhbubə xanım Kərim bəyin kiçik qızı idi.
Məhbubə xanımın mənsub olduğu Mehmandarovlar soyu Kərim bəylə yanaşı, xalqımızın həyatında müstəsna rol oynayan onlarca tanınmış nümayəndələr yetişdirib: hüquqşünas, çar dövründə dövlət qulluqçusu olmuş Sadıq bəy Mehmandarov, Lənkəran şəhərinin rəisi Nağı bəy Mehmandarov, Azərbaycan Xalq Cümhuriyyətinin hərb naziri Səməd bəy Mehmandarov, SSRİ Tibb Elmləri Akademiyasının həqiqi üzvü Mixail Tuşinski, Böyük Vətən müharibəsində saysız qəhrəmanlıqlara imza atmış, "Partizan Aliyə" adı ilə tanınan Aliyə Rüstəmbəyova və digərləri...
Məhbubə xanımın anası Zəringül xanım isə Fətəli şahın nəvəsi, Abbas Mirzənin oğlu Bəhmən Mirzə Qacarın qızı idi. Bir müddət Azərbaycanın hakimi, eyni zamanda İran ordusunun baş komandanı olan Bəhmən Mirzə İran sarayında şahzadə qardaşlar arasında gedən hakimiyyət davası nəticəsində həyatını və ailəsini xilas etmək məqsədilə İranın siyasi həyatında iştirakdan əl çəkərək ailəsi, yaxın əhatəsi ilə birlikdə Şuşaya gəlib məskunlaşmışdı. Bəhmən Mirzə Rusiyanın ən yaxşı imtiyazlı məktəblərində oğlanlarına və nəvələrinə Avropa təhsili vermişdi. I Dünya müharibəsi ərəfəsində onların arasından altı general, bir neçə müxtəlif dərəcəli yüksək çinli zabit çıxıb. Bəhmən Mirzə Azərbaycan tarixinə dair kitablar, müxtəlif həcmli əsərlər yazıb, əlyazmalar şəklində tarixi sanballı irs qoyub.
Sonradan tale Məhbubə xanımın həyatını Azərbaycan tarixində özünəməxsus ad-san qoyan daha bir soylu nəsillə çarpazlaşdırır. Məhbubə xanım Azərbaycanın ilk maarifçilərindən olan Həbib bəy Mahmudbəyovun ocağına gəlin gəlmiş, görkəmli ictimai xadim Şamil bəy Mahmudbəyovla ailə həyatı qurmuşdu.
Elmira adı verdikləri gözəl bir qız övladları dünyaya gəlmişdi. Qoşa çıxdıqları sevgi dolu bu ömür yolunda bəxtəvərliklə irəliləmişdilər. Amma təəssüf ki, həmin dövrdə Azərbaycanda tüğyan edən amansız repressiya burulğanına düşən nakam taleli gənclər olmaqdan da yaxa qurtara bilməmişdilər.
Amma bunlar
çox sonralar olmuşdu... Hələliksə, balaca Məhbubə
Şuşada sevincli günlər yaşayır, atası kimi həkim
olmaq üçün cidd-cəhdlə elmin sirlərini öyrənməyə
çalışırdı...
Müsəlman
şagirdlərini bu şuşalı qız təmsil edirdi
Mütərəqqi fikirli Kərim bəy oğul
övladları ilə yanaşı, qız
övladlarının da təhsil almasına böyük
önəm verirdi. Buna görə də o, Məhbubə
xanımı 1911-ci ildə Şuşada açılan ilk
rus-tatar qız məktəbinə qoymuşdu. İbtidai təhsilini Şuşada bitirən Məhbubə
xanım 1914-cü ildən etibarən təhsilini Bakıda
davam etdirmişdi. O, hər zaman yüksək savad və
biliyi ilə seçilir, eyni zamanda ictimai-mədəni fəallığı
ilə də diqqət çəkir, öz məktəbində
və qızların oxuduğu digər məktəblərdə
müxtəlif tədbirlərin təşkilatçısı
olurdu.
Bu
yazıda tədqiqatlarından istifadə etdiyimiz
araşdırmaçı-jurnalist Vasif Quliyev
"Mehmandarovlar" kitabında yazır ki, heç də təsadüfi
deyildi ki, 1917-ci il may ayının 5-6-da
Qafqazın hər yerindən gəlmiş əlli beş
oğlan və qızın toplaşdığı
Ümumqafqaz müsəlman tələbələrinin birinci
ali məclisində Bakının və ətraf kəndlərin
müsəlman şagirdlərini bu şuşalı qız təmsil
edirdi.
Orta məktəbi
müvəffəqiyyətlə bitirən Məhbubə
xanım 1919-cu il noyabrın 1-dən Azərbaycan
Xalq Cümhuriyyəti Nazirlər Kabineti katibliyində birinci dərəcəli
dəftərxana xidmətçisi vəzifəsinə qəbul
edilir. Lakin bu vəzifədə cəmi bir
neçə ay işləyə bilir. Həmin
dövrdə respublikada yaranmış ictimai-siyasi vəziyyətlə
əlaqədar Şuşaya qayıdır. O, burada müəllim
kadrları hazırlamaq üçün Azərbaycan dilində
üç aylıq pedaqoji kursu bitirib müəllimlik
hüququ qazanır. Məhbubə xanım
Şuşada da fəal şəkildə qızların,
qadınların arasında maarifçilik ideyalarının təbliği
istiqamətində durmadan çalışır. Hətta gənc qızları başına
yığıb "Maarif ocağı" adlı qadınlar
klubu da yaradır.
Ən
böyük arzusu həkim olmaq idi
1922-ci ildə Şamil bəy Mahmudbəyovla ailə quran
Məhbubə xanım Bakıda yaşamağa başlayır. Bu şəhərdə də
gecə-gündüz ictimai fəaliyyətlə məşğul
olur, eyni zamanda təhsilini davam etdirib ali pedaqoji institutun
məzunu olur.
Lakin onun ən böyük arzusu atası kimi həkim
olmaq idi. Buna görə də Azərbaycan Dövlət
Universitetinin Tibb fakültəsinə qəbul olur. 1929-cu
ildə həkimlik diplomu alan Məhbubə
xanım Tibb İnstitutunun mamalıq-ginekologiya klinikasında
ordinator saxlanılır, daha sonra kafedranın birinci assistenti vəzifəsinə
keçirilir. Mövzu götürüb
dissertasiya üzərində çalışmağa
başlayır.
1935-ci ildə elmi işini müdafiə edərək ilk
azərbaycanlı qadın alimlərdən biri kimi
tanınmağa başlayır. Həmin dövrdə
Tibb İnstitutunun Mamalıq və ginekologiya kafedrasının
dosenti olan Məhbubə xanım Bakının orta tibb məktəblərində
dərs deyir, tələbələr qarşısında Azərbaycan
və rus dillərində ginekologiyaya aid mühazirələr
oxuyur.
Repressiyanın
məhv etdiyi gənc ömürlər
Məhbubə xanım işində, elm yolunda uğurla
irəliləsə də, təəssüf ki, şəxsi həyatında
bu müvəffəqiyyət onu müşayiət etmir. 1936-cı il
həyatlarına qara kabus kimi daxil olur və gənclərin həyatını
məhv edir. Birinin - Şamil bəyin
ömrü yarıda zülmətə bürünür, Məhbubə
xanım isə gənc yaşında həyatdan
aldığı ağır zərbənin
sarsıntısından bir daha özünə gələ
bilmir, yeganə təsəllisi övladları Elmiranı hər
ikisinin arzuladığı kimi böyüdüb, boya-başa
çatdırmaq olur.
1898-ci ildə Bakıda doğulmuşdu Şamil bəy
Mahmudbəyov.
1915-ci ildə Bakı Realnı Məktəbini
bitirmiş, 1916-cı ildə Kiyev şəhərində
Politexnik İnstitutuna daxil olmuşdu. Lakin
Birinci Dünya müharibəsi illərində gizli partiya fəaliyyəti
və səhhətindəki problemlər səbəbindən
institutu qurtara bilməmiş, 1919-cu ildə Bakıya
qayıtmışdı. Azərbaycanda
sovet hakimiyyəti qurulduğu ilk gündən bolşevik dəstəsinə
qoşulan və Bakıda işləyən Şamil bəy Azərbaycan
İnqilab Komitəsinin sədri N.Nərimanovun katibi olub.
Sonralar o, Şuşa İcraiyyə Komitəsinin sədri,
Qarabağ və Zəngəzurun fövqəladə
komissarının müavini, Naxçıvan daxili işlər
xalq komissarı, Naxçıvan SSR-in Xalq Komissarları
Şurasının sədrinin müavini və sədri, Azərbaycan
Mərkəzi İcraiyyə Komitəsinin işlər
müdiri olub.
1924-1928-ci illərdə "Azərbaycan Dövlət
Kinosu"nun rəhbəri, 1931-ci ilə kimi Kənd Təsərrüfatı
İnstitutunun tədris bölməsinin prorektoru vəzifələrində
çalışıb. O, 1930-cu illərin əvvəllərində Moskvada
Qırmızı Professorlar İnstitutunda oxuyub, Qorki şəhərində
Marksizm-Leninizm İnstitutunda siyasi təhsilini davam etdirib. Lakin 1936-cı ilin fevral ayında Şamil bəy də
aralarında olmaqla Qorki filialının kollektivini "antisovet
təbliğatçıları" adı altında həbs
edirlər. Təəssüf ki, Şamil bəyin
sonrakı taleyindən bir daha məlumat almaq mümkün
olmur. Azərbaycanın görkəmli
ictimai xadimi Şamil bəy Mahmudbəyova 30 aprel 1957-ci ildə
bəraət verilir.
Nigarançılığı
Elmiradan idi
Həyat yoldaşının həbsi ilə sarsılan Məhbubə
xanım onun xilas edilməsi üçün çox
çalışır. Hətta Şamil bəyin arxasınca
Qorkiyə kimi gedib çıxır və onun işinə
yenidən baxılması üçün saysız-hesabsız
müraciətlər edir. Lakin hər dəfəsində
rədd cavabları alır və kor-peşman geri
qayıtmağa məcbur olur...
Məhbubə xanımın öz həyatı da təhlükədən
uzaq deyildi.
Artıq o da "xalq düşməni"nin
arvadı kimi "topun qabağı"nda idi və hər an
sürgünə göndəriləcəyi ilə
bağlı təhdidlər alırdı.
13
yaşlı qızı Elmira ilə birgə Azərbaycan
Kommunist Partiyası Mərkəzi Komitəsinin binasının
foyesində oturub birinci katib Mircəfər Bağırovun rəsmi
qəbuluna gedən qardaşı akademik Mixail Tuşinskini
gözlədiyi müddət isə ömründən
ömür almışdı bu gənc qadının... Xeyr, hər
zaman haqq-ədalətin tərəfində olan, millətinin təəssübünü
çəkən, zəmanənin bu çətin
dövründə də qorxub-çəkinmədən fikirlərini
açıq izhar edən Məhbubə xanım öz canı
üçün əsla qorxmurdu...
Nigarançılığı qızı Elmira
sarıdan idi.
Buna görə də qardaşı Mixailin Mircəfər
Bağırovun kabinetindən gülər üzlə
çıxması simasında ömürlük kök
salmış qəm kölgəsinin bir anlıq çəkilməsinə
səbəb olmuşdu. Repressiyanın dəmir məngənəsində
əzilməkdən yaxa qurtardıqlarını
anlamışdı...
Sonra isə...
Bu mətanətli Azərbaycan qadını
bütün həyatını sənətinə və
övladına həsr edir. Peşəsində uğurla
irəliləyərək respublikanın Əməkdar həkimi
adına layiq görülür, professor
elmi rütbəsinədək yüksəlir. Tibb
İnstitutunun II Mamalıq və Ginekologiya kafedrasının
müdiri vəzifəsinə seçilir, 1968-ci ildən
respublika mama-ginekoloqları cəmiyyətinə rəhbərlik
edir, bir il sonra isə Ümumittifaq
Mama-Ginekoloqları Cəmiyyəti İdarə Heyətinə
üzv seçilir. Tədqiqatını əsasən
qadın, ana və uşağın
sağlamlığının qorunması probleminə həsr
edir. "Ürək-damar sistemi xəstəlikləri
zamanı hamiləlik və doğuş" monoqrafiyası
böyük elmi-praktiki əhəmiyyət daşıyır.
Ömrünün yarıdan çoxunu həkimliyə,
pedaqoji fəaliyyətə həsr edən Məhbubə
xanımın əməyi yüksək qiymətləndirilir. "Böyük
Vətən müharibəsində şərəfli əməyə
görə", "Lenin" yubiley medalları, "Səhiyyə
əlaçısı" döş nişanı və Azərbaycan
SSR Ali Sovetinin, Azərbaycan SSR Səhiyyə Nazirliyinin fəxri
fərmanları ilə təltif edilir.
Məhbubə xanım qızı Elmiranı da vətən
üçün layiqli insan kimi böyüdür, o da Tibb
İnstitutunu bitirir, elmlər namizədi alimlik dərəcəsi
alır. İxtisasca kardioloq olan Elmira xanım Tibb
İnstitutunun dosenti olub. İqtisad elmləri
namizədi, məsul vəzifələrdə
çalışmış Əziz Əzizovla ailə həyatı
qurur. İki oğul övladı olur.
Elmira xanımın iki nəvəsi - Məhbubə
və Şamil isə ulu nənə və babalarının
şanlı adlarını ləyaqətlə
daşıyırlar.
Məhbubə
xanımın adını daşımaq şərəfi
Ulu nənəsi haqqında qürurla danışan nəticə
Məhbubə xanımın özü də sələfinin
layiqli davamçısıdır. Hazırda həkim, həm də elmi
işçi kimi Azərbaycan Tibb Universitetinin
II Mamalıq-Ginekologiya kafedrasında
çalışır. Gənc dosentin ulu nənəsi Məhbubə
xanım da vaxtilə məhz bu kafedrada
çalışıb.
Deyir ki,
üzünü görməsə də, həmişə
atasından, nənəsindən ulu nənəsinin necə
xeyirxah, zadəgan, savadlı qadın olması haqqında
eşidib: "Məhbubə xanımın hər zaman öz həyat
prinsipləri olub və bu prinsiplərin önündə
xeyirxahlıq gəlib. O, həmişə insanlara yardım etməyi,
əl tutmağı sevərmiş. Tibb Universitetində
oxuduğum müddətdə və hazırda işlədiyim
kafedrada nənəmin iş yoldaşları, dissertantları,
aspirantları ilə rastlaşıram. Hər
biri Məhbubə xanımla bağlı işıqlı xatirələrini
sevinclə, minnətdarlıqla bölüşürlər.
Həmişə nənəmin insanları
maarifləndirməyə
çalışdığını, elmlə məşğul
olan gəncləri ruhlandırdığını, daim onlara dəstək
olduğunu söyləyirlər".
"Belə
ziyalı, xeyirxah bir qadının adını daşımaq həm
böyük şərəf, həm də böyük məsuliyyətdir"
söyləyən nəvə Məhbubə xanım
vurğulayır ki, ulu nənəsindən qalan kitabları, əlyazmaları
vərəqlədikcə, şəkillərə baxdıqca
onu özünə daha yaxın hiss edir: "Ümumiyyətlə,
ta uşaqlığımdan Məhbubə xanıma bənzəyib
ona layiqli bir nəticə olmağımı arzulayırdım
və indi də çalışıram ki, elə bu cür də
olsun. Düşünürəm ki, məni bu sənətə
yiyələnməyə, həkim olmağa, elmi işlə məşğul
olmağa da məhz bu hisslər yönəldib".
O qeyd edir
ki, Məhbubə xanım hər yay Şuşaya gedər, həmkarlarını,
aspirantlarını da Qarabağın bu səfalı yurdunda
dincəlmək üçün qonaq dəvət edərmiş:
"Vaxtilə nənəmin qonağı olan həmin insanlar
mənə Şuşada olduqları zaman çəkdirdikləri
fotoları göstərirdilər. Ümumiyyətlə, həmişə
ailə albomlarımızda Məhbubə xanımın
Şuşada olan şəkillərinə baxırdım və
arzulayırdım ki, Şuşada olmaq, onun küçələrini
gəzmək, "Mehmandarovlar malikanəsi"ni
görmək mənə də qismət olsun. Şükür
ki, hər bir azərbaycanlının ürəyinin arzusu olan
bu müqəddəs məqama çatmışıq.
Artıq Qarabağımızın incisi, qürur mənbəyimiz
Şuşa azaddır. İndi ulu babam Kərim
bəyin, ulu nənəm Məhbubə xanımın və
onların timsalında dünyadan köçmüş
bütün şuşalıların nigaran ruhları da
şaddır...
Mehmandarovlar malikanəsinin Şuşada bərpa edilən ilk tarixi-memarlıq obyektlərinin sırasına salınması bizim üçün ayrıca bir qürur, fəxarətdir. Prezident İlham Əliyevin göstərişi, Mehriban xanım Əliyevanın himayəsi ilə baba evimiz Heydər Əliyev Fondu tərəfindən bərpa olunur, əvvəlki görkəminə qaytarılır. Ailəmizin, nəslimizin əziz İlham Əliyevə, Mehriban xanıma minnətdarlığı sonsuzdur, əbədidir".
Şöhrətli nəslinin şanına şan qatdı
Bu, Məhbubə xanım Mehmandarova-Mahmudbəyovanın hər anına bir ömür sığdırdığı yaşam hekayəsi idi. Görkəmli alim 74 illik ömür yolunda nələr yaşamamışdı ki... O, ta gənc yaşlarından həyatını xalqının rifahına, onun maariflənməsinə, sağlamlığının keşiyində durmağa həsr etmişdi. Hər zaman vətənpərvərliyi ilə seçilmiş, ölkənin ən çətin məqamlarında belə insanlarımızın xoşbəxtliyi naminə doğru bildiyi yolla getməkdən çəkinməmişdi. Gənc ömür-gün yoldaşının itkisinin ağrı-acısını yaşasa da, bu əzmkar qadın sınmamış, bütün çətinliklərə sinə gərərək həm övladını layiqli vətəndaş kimi böyütmüş, həm də seçdiyi peşədə, elm yolunda öz sözünü deməyi bacarmışdı.
Bəlkə də bir çoxlarımız düşünərik ki, Məhbubə xanımın əldə etdiyi bütün bu uğurların arxasında həm də mənsub olduğu soy-kökün nüfuzu da rol oynayıb. Amma əksinə, bir çox hallarda Mehmandarovlar-Mahmudbəyovlar soyadına mənsubluğu o zamanın qəddar rejimləri tərəfindən Məhbubə xanıma çətinliklər yaşatmış, maneələr yaratmışdı...
Bəli, bu şuşalı qız uğur yolunu özü müəyyənləşdirmiş, zirvələrə uzanan yolda öz izi, öz imzası olmuşdu. Əldə etdiyi şöhrəti ilə də qədim, köklü və qəhrəman nəslinin şanına şan qatmışdı... İlk azərbaycanlı qadın alimlərdən biri kimi möhtəşəm titula sahib Məhbubə xanım Mehmandarova-Mahmudbəyova kimi...
Yasəmən MUSAYEVA,
Azərbaycan.-2022.- 8 iyul.- S.8.