Xəzər sahilində Sumqayıt tablosu

Yamyaşıl dənizkənarı bulvar, mavi şəhər çimərliyi və qədim Corat kəndi

Ölkəmizin bir çox bölgələri kimi, Sumqayıtın da turizm potensialı genişdir. Paytaxtdan yarım saatlıq məsafədə yerləşən bu şəhəri Azərbaycana gələn turistlərin böyük hissəsi ziyarət edir. Yayda isə Sumqayıtın dəniz sahillərində istirahət etmək istəyənlərin sayı daha da artır.

Bu gün Sumqayıtda şəhər, kənd və çimərlik turizmi formalaşır. Şəhərdə həyata keçirilən layihələr buranı inanılmaz dərəcədə dəyişdirib. İnşa edilən hotel və mehmanxanalar şəhər turizminin inkişafı üçün geniş imkanlar yaradıb. Şəhərə təşrif buyuran turistlər iri ticarət mərkəzlərini, bir-birindən fərqli istirahət məkanlarını, park və xiyabanları gəzərək xoş təəssürat əldə edirlər. Sumqayıtda turistlər üçün xüsusi turlar təşkil edilir. "Göyərçin" abidəsi, bulvar və bələdiyyə parkının yanından ayrılan avtobuslar təkcə şəhəri dolaşmır, həm də qonaqlara Sumqayıtın tarixi haqqında məlumat verilir.

Sumqayıtın turizm potensialına hesablanmış layihələrdən biri də şəhər dənizkənarı bulvarının yaradılmasıdır. Xəzər sahilində Bakıdan sonra ikinci belə bir bulvarın salınması həm də ölkəmizdə görülən sosial layihələrin ardıcıl həyata keçirildiyini nümayiş etdirir. Bulvar təkcə Sumqayıtın simasını dəyişməyib, eyni zamanda ona turizm statusu verib. Təqribi hesablamalara görə, son beş ildə bulvarı 100 mindən artıq qonaq ziyarət edib.

Sumqayıt bulvarı dəniz səviyyəsindən 2,5 metr yüksəklikdə salınıb. Burada 4,2 kilometr uzunluğunda, 1,5 metr hündürlüyündə istinad divarı tikilib. 55 hektar ərazidə yaşıllıq zolağı salınan bulvarda 200 mindən çox ağac və dekorativ kol, 2 milyondan artıq gül və çiçək əkilib. Amma bu da hələ hamısı deyil. Hazırda Sumqayıt bulvarının genişləndirilməsini nəzərdə tutan yeni layihə üzərində işlər gedir. Yaxın gələcəkdə bulvarda yeni salınan obyektlərin, istirahət ocaqlarının şahidi olacağıq.

Sumqayıtda kənd turizmi isə çoxdan formalaşıb. Hələ sovetlər dönəmində Corat kəndinə müttəfiq respublikalardan həm ziyarətə, həm də turist kimi gəzməyə gələrdilər. Azərbaycan müstəqilliyini bərpa etdikdən sonra da Corata turistlərin marağı azalmayıb. Sumqayıtda qonaqların ən çox gəldiyi kənddə may ayının sonlarından başlayaraq evlər kirayələnməyə başlayır. Çünki dəniz sahilində yerləşən Corat istirahət üçün ən gözəl yerdir. Həm də kirayə evlər digər yerlərə nisbətən sərfəlidir.

Böyüklü-kiçikli hamının gözlədiyi yayda dənizə getməmək, Xəzərin duzlu suyuna baş vurmamaq günahdır. Elə isə Sumqayıtın çimərlikləri sizin ixtiyarınızdadır. Şəhərdə çimərlik turizmini şərtləndirən əsas cəhət onun təbii mövqeyidir. Bundan əlavə, çimərlik ərazilərində istirahət edənlərə lazımi səviyyədə ticarət, iaşə və digər xidmətlərin göstərilməsi qaydalarına əməl edilməsinə ciddi nəzarət var. Üstəlik, Sumqayıtın çimərliklərində istirahət etmək üçün ödəniş tələb olunmur.

Şəhər çimərlikləri təmizlikləri ilə də fərqlənir. "Sumqayıt şəhər Təmizlik Depatamenti" MMC və Gigiyena və Epidemologiya Mərkəzinin əməkdaşları bu işə ciddi yanaşırlar. Yay mövsümündə fəaliyyətini gücləndirən mərkəzlərdə çalışanların da sayı artır. Bu da mövsümi iş yerlərinin yaranmasına, insanların ailə büdcələrinin artmasına səbəb olur.

Bəli, yayın bəzəyi dəniz, dənizin bəzəyi onun qoynunda dincələn insanlardır. Bu baxımdan Xəzərin gözəlliyi yayda özünü daha çox büruzə verir. Onu görmək üçün isə dənizə getmək və onun ləzzətini çıxarmaq lazımdır.

Akif ƏLİYEV,

Azərbaycan.-2022.- 21 iyul.- S.10.