"Laçınlı
çağlarıma yenidən döndüm"
... Neçə gün idi ki, yuxuları da ərşə çəkilmiş, gecə səhərə kimi dağı arana daşımışdı. Gah öz-özünə danışmış, gah da beynində çək-çevir etdiyi fikirlərin kələfində dolaşıb qalmışdı...
"İlahi, illərdir bir daha görə bilməyəcəyimi düşündüyüm o yerlərə, həyatımın ən gözəl çağlarının keçdiyi o doğma yurda qədəm qoyanda sevincdən ürəyim partlamayacaq ki?!.", - deyə gözlərindən süzülən göz yaşlarına dəm vermişdi...
Kaş demişdi, "kaş ki, indi Mirzə də yanımda olaydı... Ürəyimizdə, qəlbimizdə, bir qərinəyə yaxındır ki, sağalmaz yara kimi qanayan, çarəsizliyimizin ağrı-acılı ünvanı olan doğma Laçınımıza etdiyim bu səfərə qoşa çıxaydıq, müqəddəs ziyarətimizi birgə edəydik..."
Körpə balası kimi bağrına basıb öpdüyü yurd daşları
İlahi,
hara gedib bu el-oba...
Niyə hər tərəfi daş sükutu
bürüyüb, heç yerdən səs gəlmir?
O, dizboyu
qalxmış otların arası ilə yeni cığır
aça-aça məhəllələrinə sarı
qalxır, heç olmasa tanış bir
üz görmək, doğma bir hənir duymaq
üçün ümidlə, intizarla ətrafa boylanır...
Dağlara, daşlara, meşələrə, düzənlərə
göz gəzdirir, səsi-avazı gəldikcə haraylayır
doğma el-obasını, qohumlarını,
qonşularını...
Heyhat...
Öz səsinin
dörd bir yandakı dağıdılmır, viranəyə
çevrilmiş evlərin yarıuçuq divarlarına dəyərək
sınıb qayıdan tükürpərdici əks-sədasına
diksinir...
Qəfildən
gözləri yurdundan geriyə qalmış son nişanələrə,
xırda daş parçalarına sataşır... Daha bundan
sonra odlu göz yaşları ilə torpağın
köksünü dağlayan Validə ananı heç cür
ovutmaq mümkün olmur...
Dizin-dizin
sürünərək yurd daşlarını körpə
balası kimi öpüb bağrına basan ağbirçək
elə hey fəryad edir, gəncliyində ömür
yoldaşı ilə birgə əl-ələ verib min bir əziyyətlə,
zəhmətlə qurub-yaratdığı yuvasının
dağıdılmasından duyduğu dəhşətli əzabla
qıvrılır...
Axı bu evi nə xəyallar quraraq, nə arzular diləyərək
tikmişdilər. Övladları bu evdə dünyaya göz
açmışdı, böyümüşdü, məktəbə
yollanmışdı... Hələ qarşıda onları nə
qədər xoş günlər gözləyirdi....
Bu evdə
oğul toyu edib gəlin gətirəcəkdilər, qız
köçürəcəkdilər: "Nə biləydik ki,
zalım fələk bizə necə oyunlar qurub? Haradan biləydik ki, el-obamızdan didərgin
düşəcəyik? Yurdumuza həsrət
qalacağıq, doğmalarımızın qəbrini belə
ziyarət edə bilməyəcəyik. Nə qədər
yaxınlarımız, doğmalarımız bir daha
doğulduğu torpağı görmədən həsrətlə
bu dünyayla vidalaşacaq..."
"Biz
qayıtdıq, Vətən!" rubrikasının budəfəki
qonağı Laçın rayon sakini Validə Yusif
qızı Həmzəyevadır...
Bu
yaxınlarda, Qurban bayramı ərəfəsində Laçına
ziyarətə gedib öz doğulduğu, gəlin
köçdüyü kəndləri görən Validə
xanım deyir ki, doğma torpağına qədəm
qoyduğu ilk anda beynində də, ürəyində də
sadəcə bir hiss olub - şükranlıq: "Bu müqəddəs
günləri yaşamağı mənə nəsib etdiyi
üçün əllərimi açıb Allaha
şükür edirdim. Bizi Laçın həsrətindən
qurtaran Müzəffər sərkərdəmiz İlham
Əliyevə, igid oğullarımıza sonsuz minnətdarlıq
duyur, torpaqlarımızın azadlığı uğrunda
canlarından keçən şəhid balalarımızın
ruhuna dualar edirdim. Sadəcə ürəyimdə bir
nisgil var idi ki, Laçının azad olduğunu bilsə də,
ana yurduna bir daha qədəm basmaq Mirzəyə qismət
olmadı... O, bu günlərin həsrətini çox çəkmişdi..."
Çadır
şəhərciyindəki məhrumiyyətlərə rəğmən
övladlarının hamısına ali təhsil
verib
1953-cü
ildə Laçın rayonunun Qarabəyli kəndində el
arasında böyük hörməti olan bir kişinin, Yusif Fətəliyevin
ailəsində anadan olub Validə xanım... Ailədə
4 uşaq olublar - iki qardaş, iki bacı. O, 1970-ci ildə
Qorçu kənd orta məktəbinin 10-cu sinfini bitirib və
1970-75-ci illərdə Mədəni Maarif Texnikumunun
kitabxanaçılıq fakültəsində oxuyub. Bir müddət doğulduğu Qarabəylidə kənd
kitabxanasının müdiri vəzifəsində işləyib.
1975-ci ildə ailə quraraq Qorçu kəndinə Mirzə
Rza oğlu Həmzəyevin evinə gəlin
köçüb. Onların beş övladları
dünyaya gəlib, ikisi oğlan, üçü qız.
1985-ci ildə Mirzə Həmzəyevin iş yerini Ağdam
rayonuna dəyişməsinə görə, həmin rayonunun
Seyidli kəndində yaşamağa başlayıblar. Övladları Ağdam şəhər 8 nömrəli
orta məktəbində təhsil alıblar. 1993-cü ildə rayon işğal olunandan sonra isə
Həmzəyevlər ailəsinin də çətin və məşəqqətli
məcburi köçkünlük həyatları
başlayıb. Ailə ilk olaraq Bərdə, sonra
Şamaxı şəhərlərində, daha sonra isə Bərdə
ərazisində yerləşən Türk Qızılay şəhərciyində
məskunlaşaraq, 12 il burada
yaşayıblar. Validə xanım şəxsi əzmi və
çabası sayəsində, yaşadıqları məhrumiyyətlərə,
yoxluqlara, çətinliklərə baxmayaraq, bu çadır
şəhərciyində beş
övladının hamısına ali təhsil verib. Onlar müxtəlif ixtisaslar üzrə müəllim
peşəsinə yiyələniblər. Tale
elə gətirib ki, bu ailənin gəlin və kürəkənlərinin
də hamısı müəllim olub.
Ömrünün 47 ilini dövlət qulluğuna həsr
etmiş ailənin başçısı Mirzə Həmzəyev
2013-cü ildən təqaüdə çıxıb. Təəssüf ki, bu ilin
yanvarında doğulduğu Laçını bir daha görmədən
gözlərini bu dünyaya əbədi yumub...
Solğun
çiçəklər...
Validə
xanımla həzin, kövrək notlar üzərində
köklənmiş söhbətimizə lap uzaqdan, illər
öncə Laçındakı bəxtəvərlik illərindən
başlayırıq...
Hələ
o zamanlar kiçik qızcığaz idi Validə...
Qarabəyli kəndində adla deyilən ovçu
babası südəmər bir əlik balası tapıb gətirmişdi
onun üçün. Balaca əlləri ilə ona süd
vermiş, böyütmüşdü. Bala
əlik ona, Validə də bu cüyür balasına o qədər
öyrəşmişdi ki, hər yerə birlikdə gedərdilər.
Körpə cüyür Validənin öz əlləri ilə
toxuyub boynuna asdığı al-əlvan qotazları
sağa-sola yelləyə-yelləyə onun arxasınca
qaçar, birlikdə dağlara çıxar, düzənlərdə
gəzər, sıx pöhrəli ağacların altında
dincələrdilər...
Xatirələrə
dalır Validə ana:
- Qarabəylidə
9-10-cu sinif olmadığı üçün qardaşım,
əmim uşaqları ilə birgə orta məktəbin son
siniflərini qonşu Qorçu kəndində oxuduq. Adətən,
bu iki kəndin arasında yerləşən Alaağac deyilən
yerdə sıx ağacların altında oturub bir hovur dincəlir,
daha sonra məktəbə doğru yolumuzu davam etdirirdik...
Böyük düz deyilən yer isə biçənək
yerimiz idi.
Biçinçilər kərənti ilə otu biçər,
təzə biçilmiş otdan qalxan xoş rayihə ətrafı
bürüyərdi... O qədər buradakı dərənin
içərisindəki bulaqdan atama, qardaşıma,
dayıuşaqlarıma, əmiuşaqlarıma cürdəkdə
sərin su daşımışam ki... Bir də
görürdün ki, atamgil axşamüstü elə buradaca
2-3 əmlik quzunu kəsib kabab çəkir, böyük bir
ziyafət təşkil edirdilər... Biz uşaqlar da
qayğısızcasına oynayır, alabəzək kəpənəklərin
arxasınca qaçır, əlvan güllərdən
özümüzə çələng hörürdük...
Yadımdadır,
bir dəfə evimiz təmir olunanda böyüklərin
gözündən yayınıb xəlvətcə divarda boya
ilə gül rəsmləri çəkmişdim... Anamgil mənə
hirslənməsin deyə, usta demişdi ki, "çox
gözəl rəsmlərdir, yenə də çək" və
mən də həvəslənib daha bir neçə rəngarəng
gül rəsmi həkk etmişdim evimizin divarına. İllərdən
sonra Qarabəylidəki evimizə gedəndə və
uçuq divarlarımız üzərində vaxtilə əllərimlə
çəkdiyim güllərin də solduğunu görəndə
o qədər kövrəldim ki...
"Əziyyətlə
tikib-qurduğumuz evimizin dağıdıldığını
görəndə çarəsizlikdən nə edəcəyimi
bilmədim"
Validə xanın deyir ki, 1975-ci ildə Qorçu kəndinin
Həmzələr, Göygüney kimi tanınan məhəlləsinə
gəlin köçüb. Yaxın dost olan atası Yusif Fətəliyev
və qayınatası Rza Həmzəyev II Dünya müharibəsinin
iştirakçıları olublar. Yoldaşıgilin
yaşadıqları bu məhəllə onların dədə-baba
torpaqları olmuş, hələ çar dövründə
babalarına sənədlə verilmişdir. Validə
xanımın qayınatasının atası Həmzə
kişinin dörd övladı da bu məhəllədə
yaşamışdılar...
- Kəlbəcər
yolu ilə Laçına səfər edəndə
Ağduzdağ deyilən yer var, orada "Laçın"
sözü yazılmış lövhəni görəndə
böyük həyəcan keçirdim, ağladım. Asan
deyil, düz 30 il idi ki, Laçına gedən
yolumuz bağlı idi və indi doğma yurdumun bir
addımlığındaydım. Amma ora gedib əzizlərimlə,
qonum-qonşumla rastlaşmayacağımı, öz əllərimlə
zəhmətlə tikdiyim evin dağıldığını
görəcəyimi bildiyim üçün çox
üzülürdüm. Biz
Ağduzdağdan Lolabağırlı kəndinə, oradan
Qorçu istiqamətinə yol aldıq. Uzaqdan
Göygüney dediyimiz məhəlləmiz, ilk olaraq meşənin
ətəyində qaynımın, yoldaşımın əmisi
oğlanlarının dağıdılmış evləri
görsənməyə başladı.
Daha səbrim çatmadı, maşından
düşüb pay-piyada evimizə tərəf
qaçdım. İlahi, evimiz nə gəzirdi? Ev adına yurd yerimizdə bir-iki xırda daş
parçası qalmışdı. Od-ocağımın bu
cür viranəyə çevrilməsi, əziyyətlə
tikib-qurduğumuz evimizin dağıdıldığını
görəndə çarəsizlikdən nə edəcəyimi
bilmədim...
Bircə
evimizdən geriyə qalmış xırda daş
parçalarını öpə-öpə ağlamağa
gücüm çatdı...
Taleyimizə
müharibə uşağı olmaq kimi bir qismət
yazıldı
Gedib
öz yurdunu viranə görən və elə hey ah-nalə
edərək, gözlərindən qan-yaş tökən bu
ağbirçək anaya təsəlli verməyə heç
bir söz tapa bilmirik...
Validə
ana bu obadakı xoş günlərini, xarabalığa
çevrilmiş evlərlə, kötükləri qalan
ağaclarla bağlı xatirələrini gəlini Nərgizə
danışır... İllər boyu söylədiklərini
indi bir-bir yerini nişan göstərərək
təkrarlayır...
Söhbətimizi 30 illik ayrılıqdan sonra anası ilə
bərabər Laçına səfər etmiş Validə
xanımın böyük oğlu, Ağdam 38 saylı məktəbin
direktoru Məsud Həmzəyevlə davam etdiririk. 15
yaşındaykən doğma yurdunu tərk etmək məcburiyyətində
qalan Məsud müəllim məcburi köçkünlük
həyatında bir yeniyetmə kimi sosial problemlər içində
nə qədər ağrı-acılar yaşasa da, oxumaq həvəsi
heç vaxt itməyib. Orta məktəbi
1995-ci ildə Bərdədə məskunlaşdıqları
çadır şəhərciyindəki 14 saylı məktəbdə
bitirib. Coğrafiya fənni üzrə ali
təhsil alaraq, 2002-ci ildən elə bitirdiyi bu orta məktəbdə
müəllim kimi çalışmağa başlayıb. 2004-2006-cı illərdə 14 saylı məktəbin
dərs hissə müdiri işləyən Məsud Həmzəyev
2006-cı ildə Ağdam ərazisində köçkünlər
üçün yeni salınmış Baharlı-2 qəsəbəsindəki
orta məktəbin direktoru təyin edilib. O, 2019-cu ilin may
ayında Kürdəxanıda məcburi köçkünlər
üçün inşa edilən şəhərcikdə yerləşən
Ağdam 38 saylı tam orta məktəbin direktoru təyin
olunub. Gənc olsa da, artıq 19 illik pedaqoji, 15
illik direktorluq təcrübəsi var.
- Bizim
taleyimizə müharibə uşağ
ı olmaq kimi bir qismət yazıldı. Savaş
gördük, güllə, mərmi yağışı
altında məktəbə getdik, təhsil aldıq. Yeniyetmə vaxtlarımızda torpaqlarımız
işğal edildi, elimizdən-obamızdan didərgin
düşdük. Məcburi
köçkünlük dövründə çox ciddi
problemlərlə qarşılaşdıq. Laçın, Ağdam işğal olunmuşdu,
sakinləri respublikanın müxtəlif bölgələrində
məskunlaşmışdılar. Həmin
dövrdə təhsili davam etdirmək, şagirdləri bir yerə
toplamaq həqiqətən də çətin idi. Təbii ki, bu da təhsildən yayınmaya səbəb
olurdu. Məcburi köçkün
uşaqları yerləşdikləri çadır şəhərciklərində
təhsil alırdılar. Böyük
maarifçilik, təhsil ənənələri olan Ağdam məktəblərində
boşluqlar yaranırdı. Mən
özüm 9-11-ci sinifləri 11 məktəbdə oxumuşam.
Yəni 3 ildə 11 məktəb dəyişmişəm.
Təkcə bu fakt məcburi köçkün
uşaqlarının hansı məşəqqətlərlə
orta təhsil aldıqlarını təsdiqləyir.
Armud
ağacı bizi gözləyirdi
Laçında,
Ağdamda keçirdiyi, çox qısa, lakin
ömrünün ən mənalı günlərini dilə gətirən
Məsud müəllim vurğulayır ki, doğulduğu və
Qorçunun ən səfalı hissəsində yerləşən
Həmzələr məhəlləsi xeyli ziyalı
yetişdirib:
- Burada Həmzə babamın oğlanları Bahadurun,
Rzanın (atamın atası) evi, əmim Fərruxun,
Hüseynalının, atamın əmisi oğlanlarının
evləri var idi. Gedib gördük ki, o evlərin
hamısını uçurublar, məhləmiz darmadağın
edilib.
Amma bilirsiniz, məni toxdadan nə oldu? Hələ mən
dünyaya gəlməzdən əvvəl atamın calaq etdiyi
bir armud ağacı var idi, gördüm ki, o armud ağacı
hələ də durur, bar gətirir... O ağacı görəndə
uşaqlıq xatirələrim, Laçında keçirdiyim
gözəl günlər canlandı gözlərim
önündə. Bu ağac həm də onun göstəricisi
idi ki, düşmən nə qədər mənfurluq etsə
də, burada min illər boyu məskən salıb
yaşamış nəsillərin kökünü kəsə
bilməyib və heç zaman da bunu bacarmayacaq...
Kəndimizdə çayın kənarında yerləşən
bulağa endik, oradan su içdik. O bulağın üstündəki
armud ağacının kölgəsində oturub dincəldik, ətrafın
möhtəşəm mənzərəsini seyr etdik. Dəmirçi dağına, səfalı
yaylaqlarımıza, yaşıl meşələrimizə
baxdıq. Bir daha, doğma
Laçınımızın, bütövlükdə Azərbaycanın
gözəl təbiətinin vurğunu olduq.
Ağdamda
tikib-qurduğumuz ikinci yurdumuzu da düşmən
darmadağın etdi
1985-ci ildə
Həmzəyevlər ailəsi Laçından Ağdama
köçdükdən sonra iş stajına və
çoxuşaqlı ana olduğuna görə Validə
xanım təqaüdə çıxır. Ana
burada yalnız övladlarının təhsil və tərbiyəsi
ilə məşğul olmağa başlayır. Məsud
müəllim danışır ki, özü də daxil olmaqla,
bacı-qardaşlarının hamısı yaxşı
oxuyurdu və bu nailiyyətlərində analarının
çox böyük rolu var idi:
- Ağdamın Seyidli sovetliyinin Sarıhacılı kəndində
yaşayırdıq. Burada çox gözəl məhləmiz
var idi. O zaman gəlib bağımızı görən
insanlar deyirdilər ki, daha buradan yaylağa getməyə
ehtiyac yoxdur, cənnətin özü elə buradır.
Bağımızda bütün meyvə ağaclarından var
idi, anam da o qədər gözəl, rəngarəng
çiçəklər əkmişdi ki, doğrudan da,
adamı valeh edirdi...
Çox təəssüf ki, valideynlərimizin ikinci
qurduğu yuvanı da mənfur düşmən məhv elədi. Burada da
yaşamaq bizə qismət olmadı.
Amma mənfur düşmənin yerləyeksan etdiyi, bir
salamat bina belə qoymadığı Ağdamda da,
Laçında da, digər viran qoyulmuş yurdlarımızda
da hazırda dövlətimiz tərəfindən həyata
keçirilən böyük tikinti-quruculuq işlərini
görəndə, ürəyimiz toxtayır. Laçında
olarkən burada Böyük qayıdışa möhtəşəm
hazırlıq getdiyinin qürurlu şahidi olduq.
Ötən
il dövlət başçımız cənab
İlham Əliyevin öz əlləri ilə təməlini
qoyduğu Laçın Beynəlxalq Hava Limanının
sürətli tikintisi gedir və çox yaxında istifadəyə
veriləcək. Eləcə də yeni yollar
çəkilir, tunellər salınır, digər
mühüm işlər həyata keçirilir. Ali Baş Komandanımız İlham Əliyev
torpaqlarımızı mükəmməl hərbi taktikası
ilə cəmi 44 günə azad etdiyi kimi, indi də dünya
tarixində görünməmiş bir sürətlə o yerlərdə
həyatın yenidən var olması üçün
böyük işlər görür. Çox
tezliklə biz öz abad yurdlarımıza
qayıdacağıq və orada əbədi
yaşayacağıq.
Biz keçmiş məcburi köçkünlərə
bu xoşbəxt hissləri yaşatdığına görə
ömür boyu Müzəffər Ali Baş Komandanımız
İlham Əliyevə minnətdar olacağıq.
Bu
torpaqlara qayıdacağımıza əmin idik
30 ildən sonra doğma yurda səfər edən Həmzəyevlərin
növbəti baş çəkdikləri ünvan isə
Validə ananın doğulduğu Qarabəyli kəndi olur. Kəndə
yaxınlaşdıqca qəbiristanlıqları
görünür və o burada tək-tük salamat qəbirlərdən
biri olan atası Yusif kişinin, dayılarının qəbirlərini
ah-nalə ilə ziyarət edir. Sonra isə
yenə də pay-piyada dünyaya göz açdığı
evə tərəf gedir. Quruca divarları qalmış
evlərinin qapısında "haradadır mənim ata-anam,
bacı-qardaşlarım" deyərək fəryad edir...
Validə
xanım onu da qəzəb qarışıq
ağrı-acı ilə dilə gətirir ki, mənfur
düşmən onların evlərində yaşayıb, daha
sonra xislətlərindəki vəhşi xüsusiyyətə
xas davranaraq dağıdıblar...
-
Bilirsiniz, dünya malı dünyada
qalır. İtirdiyimiz mal-dövlətə,
ev-eşiyə görə heç zaman heyifsilənməmişəm.
Elə Mirzə də hər zaman
şükür edirdi ki, biz övladlarımızı o
qan-qadalı günlərdən sağ-salamat çıxara
bildik.
Şükür, bu günləri gördük. Cənab
Prezidentimizin "dəmir yumruğ"u, igid
oğullarımızın canı, şəhidlərimizin
qanı bahasına vətən torpaqlarımız
işğaldan azad edildi və biz məcburi
köçkünlük həyatından qurtulduq.
Hər zaman düşünürdük ki,
torpaqlarımız mütləq işğaldan azad olunacaq və
biz yurd yerlərimizdə yenidən evlər tikəcəyik,
övladlarımız yenidən orada xoşbəxt həyat
sürəcək. İnanın Allaha, 44 günlük Vətən
müharibəsinin hər anı televiziya ekranının
qarşısında dayanıb cənab Prezidentimizin bir-bir
torpaqlarımızın azadlığı ilə bağlı
verdiyi müjdələri gözləməklə keçib.
Mirzə
də, mən də həmin günlərdə körpə
uşaq kimi sevincdən hönkür-hönkür
ağlayırdıq... Eləcə də cənab
Prezidentimizin, Mehriban xanımla çiyin-çiyinə o
yurdlara getmələri, dağıdılmış məscidlərimizi
ziyarət etmələri, onlara "Quran" hədiyyə
vermələri bizi dərindən
duyğulandırırdı. Allah onların hər ikisinə
cansağlığı versin, övladlarını min budaq
etsin...
İllərdən
sonra qovuşduğu Laçınından bir daha ayrılmaq
istəmirdi...
Yavaş-yavaş qüruba əyilən Günəş
Laçın dağlarını al-qırmızı rəngə
boyayır, bayaqdan bəri göylərdə sərbəst
süzən quşlar şən cəh-cəhlə meşədəki
nəhəng ağacların budağında qurduqları
yuvalara tələsirdilər. Şaqqıltısı
dağı-daşı başına götürmüş
çaylar da, bulaqlar da axşam mehinin sərinliyi ilə
xumarlanır, ruha sakitlik gətirən zümzümə ilə
axıb gedirdilər...
Validə
ana oğlu Məsud, gəlini Nərgizlə doğma vətənə
etdikləri müqəddəs səfəri başa vurub,
onları qoynuna alan Laçın və Kəlbəcərin
əsrarəngiz təbiət mənzərələrinə
baxa-baxa geri dönürdülər...
Yolboyu sıx meşələri, ucsuz düzənləri, coşqun çayları seyr edən Validə ananın fikri isə çox uzaqlarda idi...
Gah Qarabəylidəki uşaqlıq çağları, gah Qorçuda ailəsi ilə yaşadıqları bəxtəvər zamanları ötürdü xəyalından...
Gah da 30 il Laçın həsrəti ilə yaşadıqları nisgilli həyatları keçirdi ağlından...
Elə bu məşum anların yaratdığı dözülməz təəssüratlarla da hövlnak xatirələrindən ayrılıb geri dönmək istəyirdi Laçına...
İllərdən sonra qovuşduğu Laçınından bir daha ayrılmaq istəmirdi...
Lakin
tezcə də onu çuğlayan Laçına əbədi
dönəcəklərinin xoşbəxtlik hissi ilə
gözlərindən süzülən sevinc
gözyaşlarını silərək gözüdolusu ana Vətənə
baxırdı...
Yasəmən MUSAYEVA,
Azərbaycan.-2022.- 24 iyul.- S.6.