İsveçrədə "QARABAĞ" ruzigarı

Ağdam klubu bu gün səfərdə "Sürix" komandası ilə qarşılaşacaq

UEFA Çempionlar Liqası, 2-ci təsnifat mərhələsi, cavab qarşılaşması

21:00 "Sürix" (İsveçrə) - "Qarabağ" (Azərbaycan)

Baş hakim: Allard Lindhout (Niderland)

Stadion Letziqrund, Sürix

İlk oyun: 2:3

"İsveçrə "Sürix"i oyun üslubuna görə bizə uyğun olmayan rəqibdir. Hər bir halda Bakıda rəqibi daha yaxından tanıdıq. Səfərə böyük ümidlə gedirik". Bu sözləri "Qarabağ"ın baş məşqçisi Qurban Qurbanov UEFA Çempionlar Liqasının 2-ci təsnifat mərhələsində "Sürix"ə qarşı keçiriləcək cavab oyunu üçün İsveçrəyə yollanarkən deyib.

Həqiqətən "Sürix"in əlavə üstünlüyü ondan ibarətdir ki, matç ərzində iki oyun planına dönməyi bacarır.

Bakıda keçirilən ilk matçda rəqib topu təmsilçimizə verib müdafiə olunmaqla kifayətlənərək, yaranmış əks-hücumlardan faydalanmaq istədi. Bundan maksimum yararlanan Ağdam klubu oyunu meydançanın rəqibə aid hissəsinə yıxmaqla, daha çox topa sahib olub "Sürix"in müdafiə xəttini yarmağı bacardı. Xüsusilə, qonaqların heyətində meydanın mərkəzində yer alan Mark Xornuşuxun etdiyi kobud səhvlər "Sürix"in qapısı qarşısında təhlükəli epizodlarla yadda qaldı. Nəticədə rəqib qapısı qarşısında bir neçə dəfə qol epizodu yaradan "Qarabağ" bu vəziyyətlərin 3-nü qola çevirməyi bacardı.

Ağdam təmsilçisinin heyətində Marko Yankoviçin həm toplu, həm də topsuz oyunlardakı çıxışı sayəsində komandamız 3-cü zonada say baxımından da çox qalmağı bacardı. Lakin fasilədən sonra "Sürix" oyun planında dəyişikliyə gedib 4-4-2 taktiki düzülüşə döndü. Meydanın mərkəzində edilən Şeyk Konde dəyişikliyi rəqibin oyununu tamamilə dəyişdi. Daha çox hücumda qalan qonaqlar müdafiənin arxasına edilən ötürmələrlə qapımız qarşısında təhlükəli epizodlar yaşatdılar və yekunda istədikləri nəticə ilə Bakıdan ayrıldılar - 3:2.

Təbii ki, Bakıdakı qarşılaşmada hesab üstünlüyünü qorumamaq Qurban Qurbanovun oyunçu dəyişikliklərində etdiyi səhvlərlə də bağlamaq olar. Çünki birdən 3 və ya 4 futbolçunu əvəz etmək komanda oyununda balansın pozulmasına gətirib çıxara bilər. Bunun "Sürix"lə ilk matçda şahidi olduq.

Çox güman ki, İsveçrədə də 4-3-3 oyun formatı ilə meydana çıxacağı gözlənilən "Qarabağ" yenə də, müdafiənin arxasına atılan toplarda və standart vəziyyətlərdə daha çox diqqətli olmalıdır. Bakıdakı matçda birinci hissənin yarıdan çoxunu təzyiq altında olan qonaqlar arabir əks-hücumlara atılsa da, futbolçularımız onlara təhlükəli epizod yaratmağa imkan vermirdi və üstünlük "Qarabağ"da qalırdı. Təbii ki, meydan sahibləri azarkeş amilini də nəzərə alaraq oyuna sürətli başlamaq istəyəcəklər. İlk yarım saat ərzində daha çox qısa ötürmələrə üstünlük verərək meydanın mərkəzində "Sürix"li futbolçuları yormaq lazımdır ki, matç tempi aşağı düşsün və qarşılaşmaya nəzarəti tam ələ almaq imkanı yaransın. Bunun öhdəsindən gəlmək üçün isə mütləq həm toplu, həm də topsuz oyunda hazırlıqlı, ötürmələrdə daha sürətli olmaq lazımdır.

"Qarabağ" eyni zamanda müdafiə xəttini daha çox meydançanın mərkəzinə çəkərək rəqibə boş zona yaratmamağa çalışmalıdır. Bu oyun planı işə düşərsə, komandamız rəqibə qarşı üstün olmağı bacaracaq. Burada isə daha çox iş Yankoviç və Almeydaya düşəcək. Abdulla Zubirin və İbraima Vadjinin isə tez-tez cinahları dəyişməsi "Sürix"in müdafiə xəttində balansın pozulmasına da səbəb ola bilər. Bu boşluqlardan Kadi Borqes fərdi ustalığı sayəsində yararlanmaq imkanına sahib olar.

Müdafiənin cinahlarında daha sayıq görünən İsveçrə çempionu mərkəzdə heç də uğurlu deyil. Çünki matçın müəyyən hissələrində bəzən sağ və ya sol cinah müdafiəçiləri hücuma qoşularkən itirilən toplardan sonra geriyə qayıtmada ciddi problem yaşayırlar. Belə ki, hücumda çoxalarkən, müdafiə olunmaqda say baxımından geri qalan "Sürix"i komandamız səbirli, həyəcana yol vermədən, hətta məğlub edib Azərbaycan adına daha bir zəfərə imza ata bilər.

Çətin sınaq olsa da, "Qarabağ"ın avrokubok təcrübəsinin də kifayət qədər olduğunu deməliyik.

Bir sözlə, vurduğun qol olsun, "Qarabağ!"

Elçin CƏFƏROV,

Azərbaycan.-2022.- 27 iyul.- S.8.