Lənkəranda Birinci Qarabağ müharibəsi şəhidi yad edilib

Azərbaycanın ərazi bütövlüyünün qorunması, tarixi torpaqlarımızın işğaldan azad edilməsi uğrunda döyüşlərdə şəhidlik zirvəsinə ucalmış Asif Fəzail oğlu Xəlilovun xatirəsini yad etmək üçün onun təhsil aldığı və hazırda adını daşıdığı Lənkəran rayonunun Vel kənd tam orta məktəbində anım tədbiri keçirilib.

İcra strukturlarının nümayəndələri, şəhid ailələrinin üzvləri, qazilər, ziyalılar, məktəbin müəllimləri və ağsaqqalların iştirak etdikləri tədbirdə şəhidlərin xatirəsi bir dəqiqəlik sükutla yad olunduqdan sonra məktəbin direktor müavini Sevinc Talıbova Asif Xəlilovun keçdiyi döyüş yolu barədə ətraflı məlumat verib. Bildirilib ki, Asif Xəlilov 1973-cü ildə Vel kəndində anadan olub. 1980-1991-ci illərdə kənd məktəbində orta təhsil alıb. 1992-ci ilin iyun ayında könüllü olaraq cəbhəyə yollanıb. İyulun 30-da Ağdərə istiqamətində gedən döyüşdə qəhrəmancasına həlak olub. Ölümündən sonra Asif Xəlilovun xatirəsini əbədiləşdirmək məqsədilə Vel kənd tam orta məktəbinə onun adı verilib, məktəbin həyətində abidəsi qoyulub.

Tədbirdə çıxış edənlər şəhid Asif Xəlilovun ailə üzvlərinə belə qəhrəman övlad böyütdükləri üçün minnətdarlıqlarını bildiriblər.

Şamil Xəlilov qardaşının xatirəsini əziz tutduqları üçün ailəsi adından tədbirin təşkilatçılarına və iştirakçılarına təşəkkür edib.

Sonda şəhidin məzarı ziyarət olunub, üstünə gül-çiçək dəstələri düzülərək ruhuna dualar oxunub.

Ağaddin BABAYEV

Azərbaycan.- 2022.- 30 iyul.- S.5.