Gəldik, gördük, sevdik!

"Formula-1" azarkeşləri Bakıdan maraqlı təəssüratlarla ayrılacaqlar

Paytaxtımızda "Formula-1" Qran-prisinin həyəcanı yaşanır. Bununla əlaqədar şəhərimizə gələn turistlərin sayı da nəzərəçarpacaq dərəcədə artıb. Hazırda Bakı Bulvarı, xüsusən də qədim İçərişəhər turistlərin daha çox olduğu ərazilərdir.

Ötən gün İçərişəhərdə gəzişən turistlərlə söhbətləşdik. Tarixi yerləri gəzən turistlər yol kənarlarındakı köşklərdə sərgilənən suvenirlər, milli mətbəximizə aid nümunələr, eləcə də əllə toxunan xalça və geyimlərlə maraqlanırdılar. Hər biri kiçik də olsa, nəsə almağa çalışırdı. Ən çox üzərində Azərbaycana, Bakıya aid elementlərin olduğu taxta, şüşə və ya gipsdən hazırlanan suvenirlər alınırdı. Milli Azərbaycan papaqlarını başlarına qoyub şəkil çəkdirənlərə də rast gəlirdik. Əhvalları öncəki günlərdən daha fərqli, daha coşqulu idi. Səbəbi isə yarışların artıq başlaması idi.

"Bakı həqiqətən Avropanın ən yaxşı şəhərlərindən biridir"

Sofia Papadakis, Yunanıstan:

- Hamı elə düşünür ki, "Formula-1" yarışları sadəcə kişilər üçün maraqlıdır. Bu qətiyyən belə deyil. Mən və rəfiqələrim pandemiyadan öncə çempionatın keçirildiyi ən azı üç ölkəyə səfər etmişik. İl boyu bu yarışları səbirsizliklə gözləyirik. Bu dəfə isə belə qərara gəldik ki, daha öncə adını eşitdiyimiz, lakin heç vaxt gəlmədiyimiz Bakının qonağı olaq. Artıq 3-cü gündür ki, şəhərinizdəyik. Bir saniyə belə olsa, seçimimizdən təəssüflənməmişik. Bakı həqiqətən Avropanın ən yaxşı şəhərlərindən biridir. Sevincimizin digər bir səbəbi isə yarışın ilk günündə dəstəklədiyimiz komandanın uğuru oldu. Digər günlər Bakının qədim tikililərinə, muzeylərinə baş çəkməyi planlaşdırırıq.

"Bakıdan xoş təəssüratlarla ayrılacağıma əminəm"

Robert Tomas, ABŞ:

- Ən yaxın dostum və tələbə yoldaşım Həmzənin təkidiylə Bakıya gəlmişəm. Uzun illər dostluq etsək də, dəfələrlə məni ölkəsinə dəvət etsə də, tərəddüd edirdim. Axır ki, bu il bunu gerçəkləşdirdim. Yaxşı ki, gəldim. Hər şeydən çox məmnunan. Ölkənizin müsbət tərəflərini saysam, bitməz. İnsanları, təbiəti, iqlimi, müasir dünyayla ayaqlaşmaq səviyyəsi - bir sözlə, dostum bu dəfə də məni yanıltmadı. Bura ilk səfərim olduğu üçün planlarım çoxdur. Gəzməli, görməli yerlər çoxdur. "Formula-1" yarışlarına gəldikdə isə, ümumilikdə bütün komandalara qarşı rəğbətim olsa da, "Ferrari"yə xüsusi simpatiyam var. Bakıdan xoş təəssüratlarla ayrılacağıma əminəm.

"Burada sanki sehrli bir qüvvə var"

Andrey Kuznetsov, Qazaxıstan:

- Bakıya birinci dəfədir ki, gəlirəm. Ölkəniz haqqında ancaq televiziya vasitəsilə eşitmişdim. Deyilənləri gözlərimlə görməyi, müasir və tarixi bir şəhəri ziyarət etməyi istədim. Ovqatım yüksəkdir, çünki hər şey gözlədiyimindən də möhtəşəmdir. Bakı valehedici şəhər imiş. Burada sanki sehrli bir qüvvə var. Bütün daşlar, divarlar insana doğma görünür. Bakını ziyarət etdiyim üçün özümü xoşbəxt hiss edirəm.

"Bakı dəyişilib, inkişaf edib, müasirləşib"

Hans Mulder, Almaniya:

- Uzun illər idmanla məşğul olmuşam, məşqçi işləmişəm. Səhhətim yol verdikcə çalışıram ki, müxtəlif önəmli çempionatlarda, yarışlarda tamaşaçı kimi iştirak edim. Azərbaycana ikinci gəlişimdir. İllər öncə, cavanlığımda ölkənizə iş üçün səfər etmişdim. Bu dəfə isə məqsədim istirahət etməkdir. Təyyarədən enəndə elə bildim ki, başqa ölkədəyəm, hətta bir anlıq səhv təyyarəyə mindiyimi düşündüm. Bakı çox dəyişib, inkişaf edib, müasirləşib. Gördüyüm və hiss etdiyim dəyişiklikləri sözlə ifadə etməkdə çətinlik çəkirəm. Bunu yarış ərazisində də aydın hiss etmək mümkündür. Treklər, küçələr, təhlükəsizlik tədbirləri - hər şey yüksək səviyyədədir. "Mercedes" komandasının pərəstişkarıyam. Yarışda pilotumuzun qalib olacağına inanıram.

"Yorğun iş fəaliyyətindən sonra tətilimi burada başladığım üçüm çox xoşbəxtəm"

Kerim Tuncer, Türkiyə:

- Azərbaycanda özümü qətiyyən qonaq kimi hiss etmirəm. Bura bizim ikinci Vətənimizdir, həmçinin Türkiyə də sizin üçün belədir. Biz qardaşıq. Yorğun və uzun iş fəaliyyətindən sonra tətilimi burada başladığım üçün çox xoşbəxtəm. Yarışların başlaması ilə əlaqədar əhvalım daha da yüksəlib. Dəstəklədiyim komanda və pilot ilk sərbəst yürüşün qalibi olub. "Formula-1" bitdikdən sonra gəzəcəyim, görəcəyim yerlərin siyahısını tutmuşam. Yolum Qəbələ, İsmayıllı istiqamətində olacaq. Oranın təbiəti, iqlimi, istirahət mərkəzləri haqqında çox tərif eşitmişəm. Necə deyərlər, yüz eşitməkdənsə, bir görmək yaxşıdır.

"Babam azərbaycanlıdır, qan çəkir bizi..."

Olqa Smirnova, Belarusiya:

- Şəhərinizə ilk dəfə gəlsəm də, əslində, bura mənim üçün yad deyil. Babam azərbaycanlıdır. Bu dünyadan tez köçdüyü üçün, təəssüf ki, onu görməmişəm. Əks halda, bura dəfələrlə gəlmiş olardım. Bakının mənə bu qədər doğma təsir bağışlamasının səbəbi də budur, necə deyərlər, qan çəkir. Əminəm ki, ilk gəlişim olsa da, son deyil. Bu tarixi torpaqlarda hələ çox gəzəcəyim, görəcəyim yerlər var. Bu dəfə yalnız 3 günlük yarışlara baxmağa gəlmişəm.

"Şəhərin eyni anda həm müasirliyi, həm də qədimliyi insana ruh verir"

Alfredo Ramirez, İspaniya:

- Hava limanına ayaq basan andan yüksək təşkilatçılığın və qonaqpərvərliyin şahidiyəm. "Formula-1"lə bağlı hazırlıqlar çox böyük peşəkarlıqla yerinə yetirilib. Bütün gözləntilərimiz özünü doğruldub. Bakı möhtəşəm şəhərdir. Buradakı gözəlliklər insanı yüksək əhvali-ruhiyyəyə kökləyir. Şəhərin eyni anda həm müasirliyi, həm də qədimliyi insana yüksək ruh verir. Küçələri, muzeyləri gəzdikcə, indiyədək bu şəhərə gəlmədiyimə görə çox təəssüflənirəm. Buraya ailəmlə gəlmişəm. İnanıram ki, geriyə yaxşı təəssüratlarla qayıdacağıq.

"Qarşılaşdığım hər kəs mənə salam verir, üzümə gülümsəyir"

Radolf Egger, Avstraliya:

- Azərbaycan əsrarəngiz təbiəti, gözəl yeməkləri, qonaqpərvər insanlarının olması ilə məni özünə vurğun etdi. Bakı tarixi və müasir arxitekturası olan valehedici şəhərdir. Burada insanlar çox mehribandırlar. Qarşılaşdığım hər kəs mənə salam verir, üzümə gülümsəyir. Bu da çox xoş təsir bağışlayır. "Formul-1"ə demək olar ki, Serxio Peres üçün tamaşa edirəm. Ona görə "Red Bull" komandasını dəstəkləyirəm. Ümid edirəm ki, yarışdan qalib ayrılacağıq.

"Mətbəxinizi, ədviyyatlarınızı bizimkilərə çox bənzətdim"

Paul Olsen, Meksika:

- Böyük bir dost qrupumuz var. Hər bir yarışı, sürəti, adrenalini çox sevirik. Elə bu hisslərimiz bizi hər il bir neçə ölkəyə aparır. Bu dəfə isə qərara gəldik ki, gəzəcəyimiz ölkə Azərbaycan olsun. "Formula-1" üçün hələ ki, Bakıdayıq. Yarış bitdikdən sonra ucqar rayonlarınıza, dağ kəndlərinizə getməyi planlaşdırırıq. Gəlməmişdən öncə internetdə araşdırmalar apardıq. Qədim məskənlərinizin, təbiətinizin gözəlliyi elə şəkillərdən bizi valeh etdi, həyəcanlandırdı. Təbii ki, gəlmişkən milli yeməklərinizin də dadına baxmağa fürsət tapdıq. Mətbəxinizi, ədviyyatlarınızı bizimkilərə çox bənzətdim. Bəlkə də bu bizi yaxınlaşdırır.

Ülkər XASPOLADOVA,

Azərbaycan.-2022.- 12 iyun.- S.3.