Azərbaycanlı akrobatlardan bürünc medal

XXVIII Dünya Çempionatı

Bakıda keçirilən Akrobatika Gimnastikası üzrə XXVIII Dünya Çempionatının birinci gününə yekun vurulub. Yarışda ölkəmizi gənclər arasında Avropa çempionları Daniel Abbasov və Murad Rəfiyev kişi cütlüklərin yarışında təmsil edirlər.

Qarışıq cütlüklər tərkibində isə beynəlxalq turnirlərin qalibləri Sabir Ağayev və Mehriban Salamova, Avropa çempionatının gümüş və bürünc mükafatçıları Ağasif Rəhimov və Raziyə Seyidli mübarizə aparırlar.

Birinci yarış gününün nəticələrinə əsasən idmançılarımız 3 finala vəsiqə qazanıblar.

Daniel Abbasov və Murad Rəfiyevdən ibarət kişi cütlüyümüz balans hərəkəti üzrə təsnifat mərhələsində 27,520 xalla üçüncü olub və finala vəsiqə əldə edib.

Medallar uğrunda keçirilən yarışlarda Daniel Abbasov və Murad Rəfiyevdən ibarət kişi cütlüyümüz bürünc medala sahib olub. Cütlüyümüzün qarışıq hərəkət üzrə final mərhələsində çıxışı 28,270 xalla qiymətləndirilib.

Yarışın qalibi ABŞ akrobatları olub - 28,400 xal. Qazaxıstanlı cütlük 28,330 xalla yarışı ikinci pillədə başa vurub.

Martın 13-də keçiriləcək finalda Azərbaycan komandası ilə yanaşı, ABŞ, Qazaxıstan, Portuqaliya, Almaniya və Özbəkistan gimnastları da medallar uğrunda yarışacaqlar.

Bu gün (martın 12-də) isə akrobatlarımız temp hərəkəti yarışının finalında ABŞ, Qazaxıstan, Portuqaliya, Almaniya və İspaniya idmançıları ilə mübarizəyə qoşulacaqlar.

Ağasif Rəhimov və Raziyə Seyidlidən ibarət cütlüyümüz balans hərəkətində 28,760 xalla birinci olub və finala vəsiqə qazanıblar. Sabir Ağayev və Mehriban Salamovadan ibarət digər cütlüyümüz isə 26,890 xalla səkkizinci pillədə qərarlaşıb.

Sabah (martın 13-də) təşkil olunacaq final mərhələsində Azərbaycan ilə yanaşı, Böyük Britaniya, Belçika, Almaniya, İsrail və Portuqaliya akrobatları da qələbə uğrunda mübarizə aparacaqlar.

Son olaraq qadın cütlüklərin temp hərəkətində finalçıların adlarına aydınlıq gətirilib. Təsnifat mərhələsində uğurla çıxış edən Portuqaliya, Macarıstan, Qazaxıstan, ABŞ, Böyük Britaniya və Avstraliya cütlükləri martın 13-də keçiriləcək finalda medallar uğrunda yarışacaqlar.

Yarışların ikinci günündə Ağasif Rəhimov və Raziyə Seyidlidən ibarət qarışıq cütlüyümüz dünya çempionatının finalına vəsiqə qazanıb.

Akrobatlarımız temp hərəkətində təsnifat mərhələsində hakimlərdən 29,090 xal alıb və ikinci olub. Bu nəticə ilə komandamız həlledici mərhələdə yer alıb.

Martın 12-də təşkil olunacaq final mərhələsində Azərbaycan ilə yanaşı, Böyük Britaniya, Belçika, İsrail, İspaniya və Portuqaliya cütlükləri də qələbə uğrunda yarışacaqlar.

Sabir Ağayev və Mehriban Salamovadan ibarət digər cütlüyümüz 26,340 xalla doqquzuncu olub və finala düşə bilməyib.

Dünən həm də komanda hesabında qaliblər müəyyənləşib. Belçika çempionatın qızıl medalına sahib olub. Portuqaliya idmançıları gümüş medal, Böyük Britaniya komandası bürünc medal qazanıblar.

Qeyd edək ki, çempionatda 17 ölkədən 170 gimnast iştirak edir. Martın 13-dək davam edəcək yarışlarda idmançılar qadın, kişi və qarışıq cütlükləri, eləcə də qadın və kişi qrupları proqramlarında balans, temp və qarışıq hərəkətlər üzrə mübarizə aparacaqlar.

Rizvan CƏFƏROV

Azərbaycan.- 2022.- 12 mart.- S.7.