Şirvanda Əməkdar bədən tərbiyəsi və idman xadimi Vaqif Gözəlovun 80 illik yubileyi qeyd olunub

Şirvan Şəhər Mədəniyyət Mərkəzində ömrünün 60 ilini idmanın inkişafına həsr etmiş, “Əməkdar bədən tərbiyəsi və idman xadimi” fəxri adına və “Tərəqqi” medalına layiq görülmüş məşqçi-müəllim Vaqif Gözəlovun 80 illik yubileyi qeyd olunub.

Yubiley tədbirində şəhər icra hakimiyyətinin, təhsil şöbəsinin, gənclər və idman idarəsinin, Şirvan Dövlət İqtisadiyyat və Humanitar Kollecinin və ictimaiyyətin nümayəndələri, incəsənət adamları iştirak ediblər. Bildirilmişdir ki, Vaqif Gözəlov Şirvan şəhərində boks idman növünün təməlini qoyub və ömrünün çox hissəsini idmanın bu növünə həsr edib. Onun yetirmələri respublika və dünya çempionatlarında mükafatlara layiq görülüblər.

Çıxışlardan sonra V.Gözəlovun həyat yolunu əks etdirən videoçarx nümayiş olunub, Şirvan Şəhər Musiqi Məktəbinin müəllim və şagirdlərinin ifasında musiqi nömrələri səslənib.

Seyran CAVADOV

Azərbaycan.- 2022.- 20 mart.- S.10.