Siyasi iradə və iqtisadi gücün yaratdığı reallıq

İlham Əliyev Qarabağ və Şərqi Zəngəzurda quruculuq, abadlıq işlərini planlı şəkildə həyata keçirir

Azərbaycan xalqı dostluq, həmrəylik və yüksək mənəviyyat bayramı olan Novruzu öz ərazi bütövlüyünü “Dəmir yumruq”la bərpa etmiş qalib xalq kimi qeyd etdi. Özü də daha coşqulu, daha təmtəraqlı…

Müzəffər Ali Baş Komandan kimi işğaldan azad edilən torpaqlarımızda ilk Novruz tonqalını Şuşada qalayan İlham Əliyev ikinci bayram tonqalını Suqovuşanda alovlandırdı. Düşmənin bağrını yaran bayram tonqalının istisi bütün Qarabağa yayıldı.

Qarabağda ikinci Novruz tonqalı

Artıq Azərbaycan xalqının hər bayramda səsləndirdiyi “Gün o gün olsun ki, Novruz tonqalları Qarabağda alovlansın!” arzusu reallığa çevrilib. Bu gün Qarabağ və Şərqi Zəngəzurda bayramlarımız coşqu ilə qeyd edilir. 30 illik Qarabağ həsrəti sona çatan keçmiş məcburi köçkünlərimiz indi səbirsizliklə böyük qayıdışı gözləyirlər.

Martın 20-də Tərtər rayonunun Suqovuşan qəsəbəsində bayram tonqalı alovlandırıb xalqa ünvanladığı təbrikdə İlham Əliyev vurğuladı ki, artıq bu, bir ənənəyə çevrilib. Bundan sonra işğaldan azad edilmiş torpaqlarımızda həm tikinti-quruculuq işləri daha da sürətlənəcək, həm də milli bayramlarımız təntənəli şəkildə qeyd ediləcək. Çünki bu torpaqlar qədim Azərbaycan yurdudur, bunu tarixi faktlar, reallıqlar da təsdiqləyir. Qarabağ, onun tarixi Azərbaycan xalqının adı ilə bağlıdır. Ermənilər tarixi saxtakarlıqlara əl atsalar da, zaman və tarix həqiqəti üzə çıxartdı. 30 ildən sonra tarixi ədalət bərpa edildi.

30 il ərzində Azərbaycan misli görünməmiş ikişaf yolu keçdi. Ölkəmizin iqtisadi və siyasi gücü artdı. Avrasiya geosiyasi arealında sözü eşidilən ölkəyə, etibarlı tərəfdaş dövlətə çevrildi. İlham Əliyevin hücum diplomatiyası erməni uydurmalarını, saxtakarlıqlarını ifşa etdi. Lakin buna baxmayaraq işğalçıya heç bir təzyiq göstərilmədi. Ermənistan silahlı birləşmələrinin işğal edilən Azərbaycan ərazilərini tərk etmələri ilə bağlı qətnamələr kağız üzərində qaldı.

Müzəffər Ali Baş Komandan, xalqın birliyi və ordunun gücü “dəmir yumruq” yaratdı. 2020-ci ildə tarixi missiya yerinə yetirildi və illər sonra düşmən tapdağı altında inləyən torpaqlarımız azadlığa qovuşdu.

Müharibədən sonra baş verən hadisələr bu torpaqların kimə məxsus olduğunu bir daha təsdiqlədi. 30 il ərzində daşı daş üstündə qoymayan erməni vandallarının faşist xislətini dünya gördü.

Azərbaycan dövləti cəmi il yarım ərzində Qarabağ və Şərqi Zəngəzurda gerçəkləşdirdiyi layihələrlə dünyanın diqqətini cəlb edir. Bütün Qarabağ və Şərqi Zəngəzur bölgəsində çox genişmiqyaslı abadlıq işləri aparılır, şəhərlər yenidən qurulur, kəndlər salınır.

2 açılış, 3 təməlqoyma mərasimləri, 1 təqdimat

Suqovuşana səfəri zamanı Prezidentin açılışını etdiyi, təməlini qoyduğu, tikinti işləri ilə tanış olduğu obyektlər də bunu bir daha təsdiqləyir.

Dövlət başçısı Suqovuşan qəsəbəsində Müdafiə Nazirliyinin yeni yaradılmış “N” saylı hərbi hissəsinin açılışını edib, eləcə də Azərbaycan Kanoe və Avarçəkmə Federasiyası tərəfindən təşkil edilən ilk avarçəkmə təlim-məşq toplantısının rəsmi açılış mərasimində olub.

Dövlət başçısı turizmin inkişafı konsepsiyası əsasında yaradılacaq turizm kompleksinin, yeni tikiləcək məscidin, orta məktəb binasının təməllərini qoydu. “Azərişıq” ASC tərəfindən Azərbaycanda ilk dəfə Suqovuşan qəsəbəsinə çəkilmiş 35 kilovoltluq müasir izolyasiyalı, kənar təsirlərdən mühafizəli və istismar xərcləri daha az olan kabel xəttinin təqdimatında iştirak etdi.

Suqovuşan Turizm Kompleksində işlər cari ilin sonunadək başa çatdırılacaq, növbəti mövsümdə turistlərə xidmət göstərəcək. Görülən işlər sübut edir ki, çox füsunkar, təkrarolunmaz təbiəti olan və tarixi abidələrlə zəngin Qarabağ bölgəsi tezliklə Azərbaycanın əsas turizm zonalarından birinə çevriləcək.

Göründüyü kimi, abadlıq və quruculuq işləri Suqovuşan qəsəbəsində də geniş vüsət alıb. Prezident də xüsusi olaraq qeyd etdi ki, Suqovuşan qəsəbəsində yaşayış binalarının bərpası, turizm zonalarının yaradılması, Bütövlükdə həm Qarabağda, həm də Şərqi Zəngəzurda quruculuq, abadlıq işləri planlı şəkildə aparılır: “Biz elə etməliyik ki, qısa müddət ərzində ancaq böyük səmərə ilə və böyük keyfiyyətlə 10 min kvadratkilometrdən çox olan ərazini yenidən quraq. Çünki mənfur düşmən işğal dövründə bütün şəhərlərimizi, kəndlərimizi yerlə-yeksan edib, bütün tarixi abidələrimizi dağıdıb, təhqir edib. Biz isə qurub-yaradan xalqıq”.

Həqiqət göz önündədir. İlyarım öncə işğaldan azad edilən ərazilərimizə səfər edərkən hər kəs ürəkdağlayan mənzərəyə şahidlik edirdi. Bu gün isə Azərbaycan dövləti yalnız öz hesabına, heç kimdən, yəni heç bir maliyyə təşkilatından yardım almadan bu torpaqlarda xariqələr yaradır. Hava limanları, dəmir və avtomobil yolları, yaşayış məskənləri, körpü və tunellər, eləcə də Zəngəzur dəhlizinin bərpası dövlətin qüdrətinin göstəricisidir.

Müharibədən cəmi bir ildən bir qədər çox vaxt keçməsinə baxmayaraq Azərbaycan qurub-yaradır. Bütün bunlar hər kəsdə əminlik yaradır ki, tezliklə bütün planlar, nəzərdə tutulmuş məqsədlər reallaşacaq və dünya Azərbaycanın iqtisadi qüdrətinə bir daha şahidlik edəcək.

Prezident bildirdi ki, Azərbaycanin reallıqları göz önündədir. Bu günkü güclü Azərbaycan bütün işləri görməyə qadirdir. Ortada siyasi iradə, iqtisadi güc və milli həmrəylik var. Şanlı zəfər hər birimiz üçün qürur mənbəyidir.

İstənilən xalq və onun yaratdığı dövlət siyasi, iqtisadi və digər cəhətlərdən nə qədər möhkəm, qüdrətli olarsa, onun həyata keçirdiyi siyasətin müstəqillik elementləri də o dərəcədə güclü olar. Bu gün Azərbaycan müharibədən sonra yaranmış yeni reallıqlara uyğun addım atmaqla dünyaya gücünü, qüdrətini, nəyə qadir olduğunu nümayiş etdirir.

Müzəffər Ali Baş Komandan İlham Əliyev 2022-ci ildə də Qarabağı və Şərqi Zəngəzuru quruculuğun baş meydanına çevirib. Qlobal böhranın dünya iqtisadiyyatına mənfi təsir etdiyi dönəmdə belə Azərbaycan öz gücünə işğaldan azad edilən torpaqlarında yenidənqurma, tikinti-quruculuq işləri aparır, həmçinin digər bölgələrində də dövlət proqramında əksini tapmış layihələri gerçəkləşdirir.

Bütün proseslərə nəzarət edən Prezident mütəmadi olaraq Qarabağ və Şərqi Zəngəzur iqtisadi rayonlarında həyata keçirilən layihələrə şəxsən nəzarət edir, müxtəlif yeni obyektlərin təməlini qoyur.

İlham Əliyevin Suqovuşanda Novruz tonqalını yandırması düşmənə bir daha gözdağı verdi, hər birimizin ürəyini dağa döndərdi.

Rəşad BAXŞƏLİYEV,

Azərbaycan. - 2022.-30 mart.- S.1; 5.