İrəvanda etirazlara məğlub ordunun hərbçiləri də qoşulur

Ermənistan növbəti "rəngli inqilab" astanasındadır

İrəvanda Nikol Paşinyana qarşı təşkil edilən etiraz aksiyalarında polisin müdaxiləsi nəticəsində 100-dək insan yaralanıb. Onlardan bəzilərinin vəziyyəti ağırdır. Hazırda baş verənlərdən belə məlum olur ki, yaxın tezlikdə Ermənistanda vəziyyət daha acınacaqlı xarakter alacaq. Çünki xalq N.Paşinyanın baş nazir kimi ölkə idarəçiliyini davam etdirməsini istəmir.

Dünən müxalifət tərəfdarları yenidən "Fransa" meydanından yürüşə çıxıblar. Yürüş iştirakçılarının hədəfi Baqramyan prospekti və Moskovyan küçələrini tutmaqla paytaxtın nəqliyyat sistemini iflic etmək olub. Hadisələrin bu səpkidə inkişafı baş nazirə ciddi şəkildə qorxu yaşadıb. Aksiyalara polislər növbəti dəfə müdaxilə etmək məcburiyyətində qalıblar, hətta qadınlara qarşı zorakılıq tətbiq edilib.Yayılan videogörüntülərdə polisin bu davranışından sonra erməni qadınların güc strukturu əməkdaşlarının üzərinə hücum etməsi də əks olunub.

Etiraz aksiyalarında iştirak edənlər sırasında keçmiş hərbi xuntanın Qarabağ müharibəsində iştirak etmiş zabitləri, eləcə də İkinci Qarabağ savaşında yaralanmış keçmiş hərbçilər də olub. Müharibədə yaralanan Manvel Sarukyanın atası qeyd edib ki, 44 günlük müharibədə əlil olmuş, amma tibbi-sosial ekspertiza zamanı hüquqlarının pozulmasından şikayət edən xeyli sayda hərbçi var. Müharibədə ağır yaralanmış həmin şəxslər şikayət edirlər ki, sözügedən ekspertizanın gedişində ekspert komissiyalarının qərarı anormal qaydalarla verilir. Yəni onlar 1-ci qrup olsalar da, 3-cü qrup əlillik alırlar. Bir çoxu isə, ümumiyyətlə, əlil statusu ala bilmir.

N.Paşinyanın göstərişi ilə İrəvan küçələrinə əlavə hərbi və polis qüvvələri cəmləşdirilib. Erməni hərbi ekspert Ayk Nahapetyan ölkədə "rəngli inqilab"ın təşkil edildiyini vurğulayıb. Qeyd edilir ki, Ermənistan paytaxtında günlərdir küçələrə faktiki nəzarət edən etirazçıların məqsədi hakimiyyəti və əlbəttə ki, ölkənin xarici siyasət kursunu dəyişdirməkdir. Bu da öz növbəsində "rəngli inqilab"a aparır. Etirazçılar başqa ölkələrdə "rəngli inqilab" təşkilatçılarının metodları ilə hərəkət edirlər. "Rəngli inqilab"ın emissarları Ermənistanda hakimiyyətdən yığılıb qalmış narazılıqlardan istifadə etməyə çalışırlar.

Göründüyü kimi, İrəvanda etirazlar səngimək bilmir. N.Paşinyan isə ona qarşı yönəlmiş təhdidləri güc yolu ilə aradan qaldırmağı düşünür. Bu isə o deməkdir ki, Ermənistanı qarşıda ağır günlər gözləyir.

Elçin CƏFƏROV

Azərbaycan.- 2022.- 8 may.- S.15.