bp-nin regional prezidenti Bakı Ali Neft Məktəbində olub

bp şirkətinin Azərbaycan, Gürcüstan və Türkiyə üzrə regional prezidenti Qəri Counz Bakı Ali Neft Məktəbində (BANM) olub, məktəbin kampusunda bp və tərəfdaşlarının BANM-ə hədiyyə etdiyi laboratoriyaya baş çəkib.

Qonağı görməkdən məmnunluğunu ifadə edən BANM-in rektoru Elmar Qasımov bildirib ki, ali məktəb fəaliyyətə başlayandan bp şirkəti daim dəstəyini göstərib. BANM-lə bp arasındakı əməkdaşlığın ən yüksək səviyyədə olduğunu deyən rektor qeyd edib ki, bp ilə uğurlu əməkdaşlığın göstəricilərindən biri də hər il onlarca tələbənin bu şirkətdə təcrübə keçməsidir: "Hazırda bp-də kifayət qədər BANM məzunu çalışır. bp əməkdaşları BANM-də tədrisdə iştirak edir, bizim müəllimlər bp-nin layihələrinə qatılırlar. Ali məktəbimizə bp və tərəfdaşlarının göstərdiyi dəstəkdən çox məmnunuq".

BANM-də əmək bazarının tələblərinə uyğun ixtisaslarda kadrlar hazırlandığını bildirən rektor bərpaolunan enerji üzrə də kadr yetişdirilməsinin planlaşdırıldığını, Azərbaycanda bu sahədə ingilis və Azərbaycan dillərində yeganə dərsliyin ali məktəb tərəfindən dərc ediləcəyini vurğulayıb. Elmar Qasımov siqnal nüsxəni Qəri Counza təqdim edib.

Professor-müəllim heyəti və tələbələr qarşısında çıxış edən Qəri Counz BANM-in fəaliyyətini və bu tədris ocağı ilə sıx əməkdaşlığı yüksək qiymətləndirib, şirkətin Azərbaycanda fəaliyyətinin 30 illiyi münasibətilə və əməkdaşlığın inkişafına göstərilən dəstəyə görə ali məktəbin kollektivinə "Təşəkkürnamə" təqdim edib. Qeyd edilib ki, bu "Təşəkkürnamə" ilk olaraq BANM-ə təqdim olunur.

Bakı Ali Neft Məktəbinin ölkənin ən nüfuzlu ali təhsil müəssisələrindən olduğunu qeyd edən bp-nin regional prezidenti bildirib ki, burada tələbələr beynəlxalq standartlara uyğun təhsil alaraq peşəkar kadr kimi yetişirlər.

O, tələbələrə bp-nin Azərbaycandakı 30 illik fəaliyyəti, mühüm enerji layihələrinin operatoru olaraq həyata keçirdiyi işlər, enerjinin gələcəyi, gələcək trendlər, tələb edilən bacarıqlar barədə məlumat verib.

"Azəri-Çıraq-Günəşli", "Şahdəniz" və digər neft-qaz layihələrinin operatoru olaraq bp-nin Azərbaycanda 30 ildir layihələri təhlükəsiz və etibarlı şəkildə həyata keçirdiyini bildirən Qəri Counz işğaldan azad olunmuş ərazilərdə günəş enerjisinin tikintisi layihəsi, ümumilikdə Azərbaycanın bərpaolunan enerji mənbələri üzrə potensialı, bp-nin enerji siyasəti, bərpaolunan enerji üzrə peşəkar mütəxəssislər yetişdirilməsi üçün dərslik hazırlanmasına dəstək və "yaşıl enerji"yə keçiddə əməkdaşlıqdan danışıb, tələbələrə tövsiyələrini verib, onların suallarını cavablandırıb.

Azərbaycan.- 2022.-17 may.- S.9.