Belarusun Baş naziri “Caspian Agro 2022” sərgisini ziyarət edib

Bakı Ekspo Mərkəzində 15-ci yubiley Azərbaycan Beynəlxalq Kənd Təsərrüfatı (Caspian Agro 2022) sərgisi davam edir. Sərginin ikinci günündə Belarusun Baş naziri Roman Qolovçenkonun rəhbərlik etdiyi nümayəndə heyəti “Caspian Agro 2022” və “InterFood Azerbaijan” sərgiləri ilə tanış olub.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən ZƏRTAC-a bildirilib ki, Azərbaycanın kənd təsərrüfatı nazirinin müavini Elçin Zeynalov qonaqlara sərgi haqqında məlumat verib. Diqqətə çatdırılıb ki, sərgidə ümumilikdə 24 ölkədən 449 şirkət iştirak edir. Bu il “Caspian Agro” sərgisi Ağıllı kənd, süni intellekt, İT xidmətləri, pilotsuz uçuş aparatları (dronlar) kimi bölmələri əhatə edən “Smart Agro” istiqamətini təqdim edir.

Belarus Baş nazirinin rəhbərlik etdiyi nümayəndə heyətinə Azərbaycanda kənd təsərrüfatı sahəsində həyata keçirilən tədbirlər, aqrar sahəyə dövlət dəstəyi ilə bağlı ətraflı məlumat verilib. Sərginin ziyarətçiləri aqrar sahə ilə bağlı innovativ həllər və nailiyyətlərin nümayiş olunduğu Kənd Təsərrüfatı Nazirliyinə məxsus pavilyonu, müxtəlif ölkələrin milli stendlərini ziyarət edib, yerli və xarici şirkətlərin təqdim etdiyi məhsul və xidmətlərlə tanış olublar.

Sərgidə Belarus Respublikasının milli pavilyonu fəaliyyət göstərir. Eyni zamanda, sərgiyə Belarus Respublikasının həm kənd təsərrüfatı, həm də qida sənayesi sahələrində fəaliyyət göstərən 42 şirkəti qatılıb. Belarus şirkətləri tərəfindən kənd təsərrüfatı texnikaları, qida sənayesinin müxtəlif sahələri üçün avadanlıqlar, qida məhsulları, istehsalın avtomatlaşdırılması üçün həll variantları, qablaşdırma materialları və digər məhsullar təqdim edilir.

Sərgi öz işini mayın 20-də də davam etdirəcək.

Azərbaycan.-2022.- 20 may.- S.5.