İrəvan əhalisi küçə aksiyalarından bezib

Keçmiş hərbi xunta indi də uşaqları siyasi alətə çevirir

Ermənistanda davam edən etirazlar fonunda siyasi böhran gündən-günə kəskinləşir. Bu həm də sosial-iqtisadi vəziyyətin pisləşməsinə səbəb olub. Müxalifət partiyaları baş nazir Nikol Paşinyanı hakimiyyətdən uzaqlaşdırmaq üçün birləşsə də, hələ ki, heç bir nəticəyə nail ola bilmirlər.

Etirazlar bütün ölkəni əhatə etmir. Bəzi iqtidar saytları artıq insanların küçə aksiyalarından bezdiyini yazırlar. Erməni politoloqlarının fikrincə, bu, ondan xəbər verir ki, hələlik Ermənistanda baş naziri istefaya məcbur edə biləcək qüvvə mövcud deyil.

Aksiyaların növbəti günü etirazçılar İrəvanda prezident administrasiyasının binasını mühasirəyə alıblar. Hadisə yerində olan deputat Qeqam Manukyan bildirib ki, prezident Vaaqn Xaçaturyan öz səlahiyyətlərini yerinə yetirmir.

Bu arada aksiyaya azyaşlı uşaqların cəlb edilməsi diqqət çəkib. Müxalifyönlü saytlar bu anormal hadisəyə don geyindirməyə çalışaraq onu günün fotosu kimi təqdim edib. İqtidar saytları isə körpə uşaqların siyasi alətə çevrilməsini etirazçıların ən son variantlara əl atması kimi qiymətləndirib. Bütün dünyada qəbul olunan bir qayda var ki, heç kim sərbəst toplaşmaq azadlığından istifadə edib mitinq və ya yürüşlərə körpələri gətirməməlidir. Hətta əksər ölkələrdə buna görə valideynləri sərt cəza da gözləyir. Çünki icazəsiz aksiyalar, küçə yürüşlərinin 90 faizində hüquq-mühafizə orqanları əməkdaşları ilə toqquşma ehtimalı var. İrəvanda isə bunun əksini görürük. Bir balaca qarışıqlıq yaransa, kütlənin ayaqları altında qalaraq dünyasını dəyişəcək bu körpələrə görə məsuliyyəti dövlət yox, onu siyasi alətə çevirib foto çəkərək paylaşan məsuliyyətsiz valideynlər daşıyacaq. Qeyd edək ki, İkinci Qarabağ müharibəsi zamanı da ermənilər uşaqlardan öz məqsədlərinə çatmaq üçün istifadə edir, azyaşlıları hərbi əmliyyatlara cəlb edirdilər.

Ermənistan müxalifətinin "Müqavimət" hərəkatının koordinatoru, daşnak İxşan Saqatelyan çıxılmaz duruma düşüb. Yürüş zamanı jurnalist ona "artıq bir aydır ki, küçələrdə mübarizə aparırsınız, nə vaxt uğur qazanacaqsınız? Bir təxmininiz varmı" sualını verib. Saqatelyan isə küçə aksiyalarının effektivliyi barədə ümumi ifadələr işlətməklə sualdan yayınmağa çalışıb: "Biz heç vaxt son tarix təyin etməmişik. Aksiyalara başlamazdan əvvəl nə bir gün, nə bir həftə, nə də başqa bir tarix haqqında danışmamışıq. Amma uğura necə çatmağımız üçün bir düstur deyirik. Həmçinin aşkar şəkildə bəyan edirik ki, Paşinyanın daha bir gün də hakimiyyətdə qalması təhlükəlidir".

Bütün bunların fonunda siyasi ekspertlər hesab edirlər ki, müxalifətlə hakimiyyət arasında hansısa dialoq əsla mümkün deyil. Erməni politoloq Vazgen Xaçaturyanın sözlərinə görə, hakimiyyətin vəzifəsi təkcə polisə və qoşunlara əmr verməkdən ibarət deyil: "Yəni ölkədə hakimiyyət olması, əmrlərin yerinə yetirilməsi üçün cəmiyyət iqtidara inanmalıdır. İndi bu inam yoxdur. Ermənistan baş naziri legitimliyini itirməyə doğru gedir. Onsuz da onun legitimliyi yox idi. İndi o, nə xarici siyasəti, nə də daxili siyasəti müəyyənləşdirə bilir". Politoloqun fikrincə, siyasi partiyalar vəziyyətdən sui-istifadə etməyə can atmaq əvəzinə, böhrandan çıxış yolunu aramalıdırlar: "Problemin həlli N.Paşinyanın mövqeyində yox, cəmiyyətin konkret qərarlar qəbul etməsindədir. Cəmiyyət isə indiki hakimiyyətin iqtidardan getməsini tələb edir və bu hal Paşinyan komandasının durumunu daha da ağırlaşdırır".

Bu arada dünya iqtisadiyyatında yaranan qeyri-müəyyənliyin və çətinliklərin digər ölkələrlə müqayisədə Ermənistana daha çox dağıdıcı təsir göstərdiyi qeyd edilir. Xüsusən də Rusiyada rublun məzənnəsinin aşağı düşməsi Ermənistan iqtisadiyyatı üçün də böyük fəlakət sayılır. Əvvəlki illərlə müqayisədə 2021-ci ildə Ermənistanda xüsusilə ərzaq məhsullarının qiymətlərində 11,5 faiz artım qeydə alınıb. İnflyasiya ilə yanaşı, insanların gəlirləri mütənasib şəkildə artmayıb və bu, erməni əhalisini daha da yoxsullaşdırıb. Ötən ilin inflyasiyasını təkcə dünya bazarı deyil, həm də daxili amillər şərtləndirib. Ermənistan hökuməti kənd təsərrüfatı istehsalı və emalı kreditləri üzrə faiz dərəcələrinin subsidiyalaşdırılması üçün milyardlarla dram ayırsa da, 2021-ci ildə aqrar sektorda xeyli azalma müşahidə olunub.

Bütövlükdə bütün bunlar Ermənistanın böyük tənəzzül yaşadığını göstərir. Görünən budur ki, sülh müqaviləsinin imzalanmasının uzadılması fonunda İrəvan üzləşdiyi problemlərdən hələ uzun müddət xilas ola bilməyəcək.

Elçin CƏFƏROV

Azərbaycan.- 2022.- 26 may.- S.8.