Gəncədə Türkiyə Cümhuriyyətinin yaranmasının 99-cu ildönümü qeyd olunmuşdur

Gəncədə Türkiyə Cümhuriyyətinin elan olunmasının 99-cu ildönümü münasibətilə tədbir keçirilmişdir.

Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Zeki Öztürk, Gürcüstanın Gəncədəki Baş konsulu Nikoloz İaşvili, Samux və Göygöl rayon rəhbərlərinin, şəhər ictimaiyyəti nümayəndələrinin iştirak etdikləri tədbir Türkiyə Cümhuriyyətinin qurulması, eləcə də Azərbaycanın müstəqilliyi və ərazi bütövlüyü uğrunda həlak olmuş şəhidlərin xatirəsinin birdəqiqəlik sükutla yad edilməsi, Azərbaycan və Türkiyənin Dövlət himnlərinin səsləndirilməsi ilə başlamışdır.

Sonra Zeki Öztürk tədbir iştirakçılarını Türkiyə Prezidenti Rəcəb Tayyib Ərdoğanın Cümhuriyyətin 99-cu ildönümü ilə əlaqədar Türkiyənin xarici ölkələrdəki diplomatik nümayəndəliklərinə göndərdiyi məktubun mətni ilə tanış etmişdir. Baş konsul çıxışında türk xalqının istiqlal mübarizəsindən, Türkiyə Cümhuriyyətinin bugünkü inkişaf və tərəqqisindən danışmış, Azərbaycan və Türkiyə arasında olan tarixi dostluq, qardaşlıq münasibətlərindən söz açmışdır.

Niyazi Bayramov isə çıxışında 99 il ərzində Türkiyənin böyük və şərəfli yol keçdiyini bildirmişdir: "Bu gün Türkiyə dünyanın siyasi xəritəsində mühüm yer tutur. Ölkələrimiz arasındakı əlaqələr Azərbaycan Respublikasının Prezidenti İlham Əliyevin və Türkiyə Cümhuriyyətinin Prezidenti Rəcəb Tayyib Ərdoğanın qardaşlıq və dostluq münasibətləri əsasında gündən-günə daha da inkişaf edir".

Çıxış edən digər qonaqlar da Türkiyə Cümhuriyyətinin son illər keçdiyi inkişaf yolundan, Vətən müharibəsində Türkiyənin Azərbaycana göstərdiyi qardaşlıq dəstəyindən danışmış və əminlik ifadə edərək demişlər ki, qardaş ölkə bundan sonra da öz dövlətçilik ənənələrinə və prinsiplərinə sadiq qalaraq müstəqillik, demokratiya və iqtisadi yüksəliş yolu ilə inamla irəliləyəcək.

Tədbir Türkiyə Cümhuriyyətinin elan edilməsinin 99-cu ildönümünə həsr olunan videoçarxın nümayişi və geniş konsert proqramı ilə davam etmişdir.

Sabir ƏLİYEV

Azərbaycan.- 2022.- 1 noyabr.- S.9.