Daha möhtəşəm
zirvələrə doğru
Türk Dövlətləri
Təşkilatının çətiri
altında birləşən
qardaş ölkələr
arasında münasibətlər
getdikcə daha da möhkəmlənir
"Türk
dünyası 200 milyondan
çox insanın yaşadığı geniş
bir coğrafiyanı əhatə edir və böyük iqtisadi potensiala, enerji resurslarına, nəqliyyat yollarına və müasir hərbi imkanlara malikdir. Türk dünyası böyük
bir ailədir. Bir-birimizin milli maraqlarını nəzərə alaraq bundan sonra da
qarşılıqlı dəstək
və həmrəylik
göstərməliyik. Siyasi, iqtisadi, ticari, mədəni, nəqliyyat, energetika, rəqəmsal transformasiya,
kənd təsərrüfatı,
turizm sahələri ilə yanaşı, təhlükəsizlik, müdafiə,
müdafiə sənayesi
kimi sahələrdə
də əməkdaşlığımızı
fəallaşdırmalıyıq".
Noyabrın 11-də Səmərqənddə
keçirilən Türk
Dövlətləri Təşkilatının
IX Zirvə görüşündə
Prezident İlham Əliyevin səsləndirdiyi
bu fikirlər bir daha təsdiq
etdi ki, Azərbaycan 2009-cu ildən,
yəni qurum yarandığı gündən
bu istiqamətdə çox mühüm addımlar atıb. Azərbaycan həm Türk Dövlətləri Təşkilatı
çərçivəsində, həm də ikitərəfli əsasda quruma üzv dövlətlərlə sıx
əməkdaşlıq edir.
Bu xüsusda Prezident
İlham Əliyevin Türkiyə, Qırğızıstan,
Qazaxıstana və
son 7 ayda Özbəkistana
üç səfəri
müstəsna əhəmiyyət
kəsb edir.
Naxçıvandan başlanan
13 illik uğurlu yol
Türk Dövlətləri
Təşkilatı (əvvəlki
adı - Türkdilli Dövlətlərin Əməkdaşlıq
Şurası. red) türkdilli
ölkələrin dövlət
başçılarının 2009-cu il oktyabr ayının
3-də Naxçıvanda keçirilən
Zirvə görüşündə
imzalanmış "Türkdilli
Dövlətlərin Əməkdaşlıq
Şurasının yaradılması"
haqqında sazişə
əsasən təsis
edilib.
Ötən ilə qədər Türk Şurası adlandırılan Türk Dövlətləri Təşkilatı
(TDT) son 13 ildə böyük
inkişaf yolu keçib. İllər öncə imzalanmış
sazişə əsasən
şuranın məqsədi
türk dövlətləri
arasında qarşılıqlı
dostluğun möhkəmləndirilməsi,
regionda və ümumilikdə dünyada
sülhün qorunması,
siyasi, ticari-iqtisadi, hüquq-mühafizə, təbiətin
mühafizəsi, mədəni,
elmi-texniki, hərbi-texniki,
təhsil, enerji, nəqliyyat və ümumi maraq kəsb edən digər sahələrdə
səmərəli regional və
ikitərəfli əməkdaşlığın
edilməsi, bütün
sahələrdə qarşılıqlı
əlaqənin və ölkələr arasında
təmasların təşviqi
və sairdir.
Bu dövrdə
üzv dövlətlər
şuranın məqsəd
və prinsiplərinə
uyğun olaraq əməkdaşlığın yeni formatlarını qurublar. Belə ki, Türkdilli Ölkələrin
Parlament Assambleyası
(TÜRK PA), Beynəlxalq Türk
Akademiyası, Beynəlxalq
Türk Mədəniyyəti
və İrsi Fondu, Türkdilli Dövlətlərin Ticarət
və Sənaye Palatası və Türk Biznes Şurası kimi qurumların yaradılması
nəticəsində TDT çərçivəsində
üzv ölkələr
arasında əlaqələr
sürətlə genişlənib.
Azərbaycan TDT-nin fəaliyyətini hər zaman dəstəkləyir və
təşkilatın çətiri
altında qardaş xalqlar arasında münasibətlərin daha
da möhkəmləndirilməsi
üçün qlobal
təşəbbüslər irəli sürür. Münasibətlərin inkişafı ilə bağlı Azərbaycanın
hər zaman irəli sürdüyü
təkliflər türkdilli
dövlətlərin birliyinin
daha da gücləndirilməsini
şərtləndirib.
Azərbaycan türk
dövlətlərinin birliyinə
mühüm töhfələr
verib
Hazırda bütün dövlətlər
sülhün və sabitliyin qorunması, eləcə də sosial-iqtisadi rifahın və mədəni zənginliyin təmin olunması kimi müasir çağırışlarla
üzləşirlər. Ona görə
də ortaq mədəni və mənəvi dəyərlərlə
bir-birinə bağlı
olan türk dövlətlərinin daha
da möhkəmlənmələri,
dünyada cərəyan
edən proseslərə
təsir göstərə
bilmələri, öz
milli maraqlarını
müdafiə etmələri
baxımından təşkilatlanmaları
olduqca vacibdir.
Azərbaycan türk cümhuriyyətləri
ilə əlaqələrində
məhz bu mövqedən çıxış
edir və daim bu prinsiplərə
sadiq qalır. Xarici siyasət
konsepsiyasında türkdilli
dövlətlərlə əlaqələrin
bütün sferalar üzrə inkişaf etdirilməsinin təşəbbüskarı
olan Azərbaycan türkdilli dövlətlərin
səylərinin birləşdirilməsini
bu cür çağırışların vaxtında və effektiv cavablandırılması
üçün önəmli
vasitə hesab edir.
Səmərqənddə keçirilən IX Zirvə
görüşündə İlham Əliyev bildirdi ki, Türk
Dövlətləri Təşkilatına
üzv ölkələrlə
əlaqələrin bütün
sahələrdə möhkəmləndirilməsi
Azərbaycanın xarici
siyasətinin əsas prioritetlərindən biridir. Azərbaycan həmişə
türk dünyasının
sıx birləşməsinə
öz töhfəsini
verib və bundan sonra da
türk dünyasının
birliyi amallarına sadiq qalacaq. 2009-cu ildə Naxçıvan
Zirvə görüşündən
başlayaraq təşkilat
böyük inkişaf
yolu keçib.
Dövlətimizin başçısı
vurğulayıb ki, türk dünyası təkcə müstəqil
türk dövlətlərindən
ibarət deyil, onun coğrafi sərhədləri daha genişdir: "Hesab edirəm ki, Türk Dövlətləri
Təşkilatının üzvləri
olan ölkələrdən
kənarda yaşayan soydaşlarımızın hüquqlarının,
təhlükəsizliyinin, milli
kimliyinin qorunması, onların assimilyasiyaya uğramaması kimi məsələləri artıq
təşkilat çərçivəsində
daimi əsasda diqqətdə saxlamağın
vaxtı gəlib çatmışdır".
İlham Əliyev
türk dövlətlərinin
başçılarını Qarabağa və Şərqi Zəngəzura
dəvət etdi
Prezident həmçinin İkinci Qarabağ müharibəsindəki
böyük Zəfərimizin
ikinci ilinin təkcə ölkəmizdə
deyil, qardaş ölkələrdə də
qeyd edildiyini vurğuladı. Erməni vandalizminin ağır fəsadlarından söz açan dövlət başçısı son iki
ildə Azərbaycanın
yalnız öz qüdrəti hesabına Qarabağda və Şərqi Zəngəzurda
reallaşdırdığı layihələr barədə
ətraflı məlumat
verdi.
Azərbaycanın işğaldan azad olunmuş ərazilərdə
genişmiqyaslı quruculuq
işləri apardığını
deyən Prezident keçmiş məcburi köçkünlərin öz
doğma yurdlarına dönüşü üçün
Böyük qayıdış
proqramının icrasına
başlanıldığını və bu prosesdə
Türkiyə şirkətlərinin
podratçı kimi bir çox infrastruktur layihələrində
fəal iştirak etdiyini diqqətə çatdırdı. Həmçinin bildirdi ki, Türkiyə Prezidenti Rəcəb Tayyib Ərdoğan azad edilmiş torpaqlara üç dəfə səfər edib, Şuşada, Füzulidə,
Zəngilanda və Cəbrayılda olub.
İlham Əliyev
digər türk dövlətlərinin başçılarını
da Qarabağa və Şərqi Zəngəzura dəvət
etdi və eləcə də işğaldan azad edilmiş Füzuli rayonunda Özbəkistan tərəfindən tikiləcək
məktəbə və
Qazaxıstan tərəfindən
inşa olunacaq yaradıcılıq mərkəzinə
görə Özbəkistan
Prezidenti Şavkat Mirziyoyevə və Qazaxıstan Prezidenti Kasım-Jomart Tokayevə minnətdarlığını bildirdi. Qeyd etdi ki, bunlar Azərbaycan-özbək
və Azərbaycan-qazax
xalqları arasında
olan qardaşlığın
təzahürüdür.
Qarabağ münaqişəsinin başa
çatdığını bir daha söyləyən
İlham Əliyev regionda yeni yaranmış
reallaqların türk
dövlətlərinin iqtisadiyyatına
da böyük dividendlər gətirə
biləcəyini vurğuladı. Bu xüsusda açılacaq
Zəngəzur dəhlizinin
əhəmiyyətini bir
daha diqqətə çatdırdı. Prezident
dedi ki, İkinci Qarabağ müharibəsinin nəticələri
bölgə üçün
yeni imkanlar açır. Azərbaycan Zəngəzur dəhlizinin
yaradılmasını fəal
şəkildə təşviq
edir və dəhlizlə bağlı
öz ərazisində
genişmiqyaslı fəaliyyət
həyata keçirir.
Qeyd edildi ki, Zəngəzur
dəhlizinin açılmasından
bütün region ölkələri
faydalanacaq.
Zirvə görüşünün
sonunda Türkiyə Prezidenti Rəcəb Tayyib Ərdoğanın səsləndirdiyi fikirlər
isə Azərbaycanın
iqtisadi qüdrətini
bir daha dünyaya nümayiş etdirmiş oldu: "Qarabağla əlaqədar
çox ciddi mübarizə aparan və bu mübarizəni
hazırda infrastrukturun
qurulması ilə ən yüksək səviyyədə davam etdirən qardaşım İlham Əliyevin iki ildə bu
sahədə nələr
bacardığını, nələri
ortaya qoyduğunu görürük. Dəfələrlə həmin ərazilərdə
tədbirlərə qatılmaq,
həyata keçirilən
işləri yerində
görmək imkanım
oldu. Bu işləri
yerində gördükdə
bir türk olaraq iftixar hissi keçirdim. Çox qısa müddətdə
bu qədər nailiyyət, həqiqətən,
bizim üçün
qürur mənbəyidir".
Bütün bunlar, əlbəttə ki, İlham Əliyevin türk dövlətlərinin birliyinin
daha da güclənməsinə
verdiyi töhfələrin
və qardaş ölkələrin Azərbaycana
münasibətlərinin bariz
təcəssümüdür. Görünən odur ki, Türk
Dövlətləri Təşkilatının
üzvləri arasındakı
əlaqələr getdikcə
daha da güclənir.
Rəşad BAXŞƏLİYEV
Azərbaycan.- 2022.-12 noyabr.- S.3.