Dünya birliyi İlham Əliyevin qlobal liderliyini qəbul edir

Güclü siyasi xadimlər, beynəlxalq dairələr Azərbaycan Prezidentinin xarici diplomatiyasını daim yüksək qiymətləndirirlər

Son illərdə Azərbaycanın mühüm geosiyasi uğurlarından biri də dünya birliyində güclü mövqeyə malik olması, beynəlxalq aləmdə söz sahibinə çevrilməsidir.

Prezident İlham Əliyevin həyata keçirdiyi uğurlu siyasət Azərbaycanı yeni inkişaf mərhələsinə çıxarmaqla yanaşı, regional və beynəlxalq miqyasda nüfuzunu da artırıb. Azərbaycan dünyanın sayılıb-seçilən, hörmət olunan, etimad göstərilən dövlətinə çevrilib. Ona görə bir sıra dövlətlər Cənubi Qafqazın lider dövləti olan Azərbaycanla strateji tərəfdaş olduqlarını elan ediblər. Dünyanın böyük siyasi və iqtisadi dairələri Azərbaycanın regiondakı liderliyini və qlobal siyasətdə rolunu daim yüksək qiymətləndirirlər.

Liderlər İlham Əliyev haqqında

İki il əvvələ qədər Azərbaycan dünyada Cənubi Qafqazın iqtisadi və hərbi gücü, nəhəng enerji və nəqliyyat infrastrukturlarının müəllifi, regionda söz sahibi olan aparıcı dövlət kimi tanınırdı. 2020-ci ilin Vətən müharibəsində isə bunların sırasına biri də əlavə olundu - Cənubi Qafqazın qalib dövləti. 44 günlük müharibədə qazanılan qələbə Azərbaycana dünyada olan ehtiramı gücləndirdi, dövlətimizin nüfuzunu daha da artırdı.

Ümumiyyətlə, Azərbaycan hər zaman qonşu olan və olmayan dövlətlərlə həm ikitərəfli, həm də çoxtərəfli əsasda bərabər və qarşılıqlı əlaqələrin genişləndirilməsinə daim böyük önəm verir.

Məhz İlham Əliyev tərəfindən milli mənafelərin qorunmasına xidmət edən xarici siyasət kursunun məqsədyönlü şəkildə həyata keçirilməsi bu əlaqələrin düzgün qurulmasına imkan yaradıb.

Eyni zamanda Azərbaycan Prezidentinin irəli sürdüyü müxtəlif məzmunlu təşəbbüslər, həyata keçirdiyi layihələr dünya liderləri, müxtəlif dövlət və hökumət başçıları tərəfindən ən yüksək səviyyədə təqdir edilib. Onların bir neçəsinə diqqət edək:

ABŞ Prezidenti Co Bayden:

"Mən Azərbaycanın tam potensialına nail olunması, o cümlədən şaxələndirilmiş iqtisadiyyatın təşviqi, bərpa olunan enerji mənbələrinə investisiyaların yatırılması ilə iqlim dəyişikliyinə qarşı mübarizədə qlobal məqsədlərə töhfənin verilməsi, qanunun aliliyi və hesabatlılığın möhkəmləndirilməsi, Azərbaycan xalqının yaşayış standartlarının yüksəldilməsi istiqamətində sizin davamlı addımlarınızı alqışlayıram. Amerika Birləşmiş Ştatları bizim davamlı tərəfdaşlıq və əməkdaşlığımıza sadiqdir".

Türkiyə Prezidenti Rəcəb Tayyib Ərdoğan:

"Qarabağla əlaqədar çox ciddi mübarizə aparan və bu mübarizəni hazırda infrastrukturun qurulması ilə ən yüksək səviyyədə davam etdirən qardaşım İlham Əliyevin iki ildə bu sahədə nələr bacardığını, nələri ortaya qoyduğunu görürük. Dəfələrlə həmin ərazilərdə tədbirlərə qatılmaq, həyata keçirilən işləri yerində görmək imkanım oldu. Bu işləri yerində gördükdə bir türk olaraq iftixar hissi keçirdim. Çox qısa müddətdə bu qədər nailiyyət həqiqətən bizim üçün qürur mənbəyidir".

Serbiya Prezidenti Aleksandar Vuçiç:

"Dostumuz İlham Əliyevin iştirakı olmasaydı, bizim hər birimiz üçün qaz, eləcə də elektrik enerjisi təchizatının şaxələndirilməsinə ümid etmək asan olmazdı. Əziz dostum, görürəm ki, indi siz Avropada çox məşhurlaşmısınız. Mən sizinlə əlaqə saxlamaq istəyirəm. Mən onunla dəfələrlə danışmışam. O, Avropada çox məşhurlaşıb. Bu arada, bilmirəm o nə edib, amma etiraf edim ki, bunun sirrini mən də bilmək istərdim".

Qazaxıstan Prezidenti Kasım-Jomart Tokayev:

"Dövlətlərimiz Qərb ilə Şərqi, Şimal ilə Cənubu birləşdirir. Buna görə də hazırkı keçid dövründə nəqliyyat və tranzit kommunikasiyalarının, xüsusən də üç qardaş dövlətin - Qazaxıstan, Azərbaycan və Türkiyənin ərazisindən keçən Trans-Xəzər Beynəlxalq Nəqliyyat Marşrutunun (TBNM) inkişaf etdirilməsi xüsusi önəm qazanır".

Macarıstanın Baş naziri Viktor Orban:

"Mən qardaşım Prezident İlham Əliyevə minnətdarlığımı bildirmək istəyirəm. Çünki Azərbaycan bizim üçün yeganə real şaxələndirmə şansıdır. Qardaşım İlham Əliyevə, həmçinin bizim Azərbaycan üçün "yaşıl enerji"ni Azərbaycan, Gürcüstan, Rumıniya və Macarıstan əməkdaşlığına gətirmək təşəbbüsümüzü tamamilə dəstəklədiyi üçün təşəkkürümü bildirmək istəyirəm. Mən bu əməkdaşlığa çox ümid bəsləyirəm".

İlham Əliyev haqqında həqiqi və xoş sözlər söyləyən liderlərin sayını istənilən qədər artırmaq olar. Bütün bunlar bir daha göstərir ki, Azərbaycan Prezidenti tam müstəqil siyasət yürüdən, həmçinin sözünə, vədinə, prinsiplərinə sadiq olan liderdir.

Uğurlu diplomatik gedişlər, təşəbbüslər

2019-cu ildən Azərbaycan 120 ölkəni bir araya gətirən, BMT-dən sonra ikinci ən böyük beynəlxalq təsisat olan Qoşulmama Hərəkatına sədrlik edir. Ölkəmizin sədrliyi bir daha yekdil qərarla 2023-cü ilin sonuna qədər uzadılıb.

Bu, ilk olaraq Azərbaycanın mövqeyinə və siyasətinə yüksək səviyyəli dəstəyi və rəğbəti nümayiş etdirir. Eyni zamanda bu, İlham Əliyevin diplomatiyasına verilən yüksək qiymətin təzahürüdür.

Azərbaycanın Hərəkata sədrliyi dönəmində İlham Əliyevin BMT Baş Assambleyasının COVID-19-a həsr olunmuş xüsusi sessiyasının keçirilməsinə dair təşəbbüsünə dünyanın 130-dan çox dövlətinin dəstək verməsi çox önəmli hadisədir, diplomatiyamızın böyük uğurudur. Dövlət başçısının bu təşəbbüsünün dəstəklənməsi beynəlxalq miqyasda Azərbaycana olan böyük etimadın və hörmətin, ölkəmizin dünya birliyində nüfuzunun artmasının daha bir göstəricisidir.

Ümumiyyətlə, İlham Əliyevin həyata keçirdiyi tam müstəqil siyasət Azərbaycana bir çox sahədə dividendlər qazandırıb. Ölkəmiz etibarlı tərəfdaş olmaqla yanaşı, həm də Qafqazın güc və beyin mərkəzi statusuna sahiblənib. Ölkəmiz həmçinin Avropanın enerji təhlükəsizliyinə öz töhfəsini verən regional güc kimi qəbul edilməkdədir.

İlham Əliyevin uğurlu diplomatik gedişləri nəticəsində Azərbaycan tam müstəqil xarici siyasət yürüdən ölkə kimi tanınmaqla yanaşı, bərabərhüquqlu və qarşılıqlı əməkdaşlıq əsasında xoşniyyətli tərəfdaşlar üçün unikal məkana çevrilib. Bu siyasətin təntənəsi Azərbaycanın ictimai-siyasi sabitliyində, iqtisadi gücündə, sosial rifahında, güclü ordusunda və uğurlu xarici siyasətində də öz təsdiqini tapır.

Rəşad BAXŞƏLİYEV

Azərbaycan.- 2022.-13 noyabr.- S.7.