Azərbaycan dünyanı iki uğurla heyrətləndirib

Hərb meydanında və bərpa-quruculuq işlərində

İndi dünyada ciddi siyasi və iqtisadi proseslər gedir. Uzun illər Qərb tərəfindən müəyyənləşdirilən siyasi cizgiləri qəbul etməyən dövlətlərin sayı artmağa başlayır. Qərb öz mövqeyini qorumaq, onunla razılaşmayan ölkələr isə mövcud qaydaları yenidən qurmaq istəyir. Rusiya-Ukrayna, Çin-Amerika, Türkiyə-Yunanıstan arasında olan gərginliklərə də bu konteksdən yanaşmaq lazımdır.

44 günlük tarixi zəfərimizdən sonra Azərbaycanın dünya üçün əhəmiyyəti daha da artıb. Belə ki, ölkəmiz elə bir coğrafi məkanda yerləşir ki, hansı tərəfdə mövqe tutsa, o tərəf üstünlük əldə etmiş olur. Bunun başlıca səbəbi Azərbaycanın beynəlxalq əhəmiyyətli ticarət marşrutlarında açar ölkə olmasıdır. Məlumdur ki, indi iqtisadi faktor siyasi faktordan daha üstün mövqedədir.

Prezident İlham Əliyevin apardığı xarici siyasətin ana xətti tərəf tutmadan ölkəmizin milli maraqlarını müdafiə etməkdir. Son vaxtlar Azərbaycana müxtəlif dövlətlərin və beynəlxalq təşkilatların nümayəndələrinin səfər etməsi də ölkəmizin beynəlxalq aləmdəki nüfuzunu göstərir. Dövlətimizin başçısı bütün danışıqlarda milli maraqlarımızı təmin edən mövqe ortaya qoyur. Ermənistanla sülh danışıqları apararkən ölkəmizin ərazi bütövlüyü prinsipini əsas şərt kimi önə sürür. Bunun nəticəsidir ki, Avropa İttifaqının vasitəçilik etdiyi danışıqlarda "Dağlıq Qarabağın statusu" kimi cəfəng tezis aradan qalxıb. Lakin problemin 30 il həllinə mane olan qüvvələr hələ də ölkəmizi təsir dairəsində saxlamaq üçün bu məsələni yenidən dirçəltmək istəyir. Prezident İlham Əliyev oktyabrın 5-də BMT-nin Məskunlaşma Proqramı (UN-HABITAT) və Dövlət Şəhərsalma və Arxitektura Komitəsinin birgə əməkdaşlığı, ADA Universitetinin təşkilati dəstəyi ilə Ağdamda "Dayanıqlı İnkişaf Mədsəqləri və "Yeni Şəhər Gündəliyi" - postmünaqişə dövründə bərpa və yenidənqurmanın aparıcı qüvvəsi kimi" mövzusunda keçirilən forumda "status"u yenidən ortaya atan həmin beynəlxalq güclərə cavab olaraq demişdir: "Daxili işlərimizlə bağlı məsələləri heç vaxt beynəlxalq qurumlarla və ya böyüklüyündən və potensialından asılı olmayaraq, heç bir ölkə ilə müzakirə etmirik". Bu hamıya ciddi bir mesaj idi. Dövlətimizin başçısı açıq şəkildə bəyan edir ki, müharibə başa çatdı, indi quruculuq dövrüdür, kim əməkdaşlıq etmək istəyirsə, buyursun.

BMT-nin Məskunlaşma Proqramının tərəfdaş olduğu foruma dünyanın 44 ölkəsindən 130-dan çox nümayəndə, ümumilikdə isə 400 nəfərdən çox təşkilatçı qatılmışdı. Prezident İlham Əliyev bu tədbirdə çıxış edərkən dünyaya ölkəmizin qəti mövqeyini çatdırdı. Vurğuladı ki, Azərbaycan ədalətli sülh istəyir və ermənilər tərəfindən dağıdılan əraziləri bərpa edib soydaşlarımızı doğma yerlərinə qaytarmağa çalışır. Bunun üçün də müharibə başa çatandan sonra dərhal bərpa-quruculuq işlərinə başlanılıb. Artıq bu istiqamətdə mühüm işlər görülüb. Avtomobil və dəmir yolları tikilir, elektrik xətləri çəkilir, çətin coğrafi relyefə malik olan ərazilərdə ilboyu nəqliyyatın fəaliyyətini təmin etmək üçün yüksək dağ silsiləsində tunellər qazılır. Füzuli Beynəlxalq Hava Limanı səkkiz ayda tikilib istifadəyə veriləndə dünya heyrətə gəldi. Bu ay Zəngilan Beynəlxalq Hava Limanı istifadəyə veriləcək. Qısa bir zamanda işğaldan azad olunan ərazilərdə elektrik təchizatı bərpa olunub. Qarabağ və Şərqi Zəngəzur ərazisində ümumi uzunluğu 50 kilometrdən çox olan 33 tunel olacaq, uzunluğu 12 kilometr olan 84 yeni körpü tikiləcək.

Dövlət başçısı ermənilərin işğal altında olan ərazilərdə törətdiyi vandallıq barədə forum iştirakçılarına məlumat verdi. Bildirdi ki, bu ərazilərin dağılması gedən döyüşlərin nəticəsi deyil, onlar əraziləri döyüşlər getmədiyi vaxtda məqsədyönlü şəkildə talan ediblər. Bu yerlərdə ölkəmizə məxsus olan maddi, mədəni və dini abidələri qəsdən məhv edib, izimizi silmək istəyiblər.

Prezident İlham Əliyev Ermənistanın sülh müqaviləsinin imzalanmasından yayınması, məqsədyönlü şəkildə təxribatlar törətməsi barədə də fikrini açıq şəkildə bildirdi. Belə ki, onlar Azərbaycanın iradəsini və potensialını düzgün qiymətləndirmədilər. İkinci Qarabağ müharibəsi onlara dərs olmalıdır, bir daha belə səhvə yol versələr, bu düşmən üçün baha başa gələcək. Edilən qəti xəbərdarlıqdan yəqin ki, Ermənistan nəticə çıxaracaq.

Dövlət başçısı ölkəmizin postmüharibə dövründəki məramını bütün dünyaya bəyan edərək demişdir: "Beləliklə, biz artıq burada - Ağdamda bir neçə evin tikintisinə başlamışıq. Mən dünən burada idim və 3 kəndin - Xıdırlı, Kəngərli və Sarıcalının təməlqoyma mərasimlərində iştirak etmişdim. Maksimum iki ildən sonra bu kəndlərdə bir neçə min insan yaşayacaqdır. Ağdam şəhərində biz demək olar ki, min yerlik məktəb tikirik. Bu məktəb də ola bilsin bu il, ya da gələn il hazır olacaq. Xəstəxana və bir neçə yaşayış binası tikilir. Bu, sadəcə, Ağdamdır. Eyni işlər Füzulidə, Qubadlıda, Zəngilanda da görülür. İki ay bundan əvvəl qayıtdığımız Laçın şəhərini növbəti ilin sonuna kimi bərpa etməyi planlaşdırırıq. Çünki dediyim kimi, orada qeyri-qanuni məskunlaşma var idi. Heç də bütün binalar sökülməmişdir. Biz artıq bir qrup mütəxəssisi oraya göndərmişik. Beləliklə, biz Qarabağı və Zəngəzuru yenidən quracağıq. Buna heç bir şübhəmiz yoxdur. Necə bahalı olursa-olsun, bunu edəcəyik. Bu, bizim milli ideyamızdır. Əvvəllər bizim milli ideya torpaqlarımıza qayıtmaqdan, ədaləti və ərazi bütövlüyümüzü bərpa etməkdən ibarət idi və bütün Azərbaycan xalqı bu ideya ətrafında birləşmişdi, özünü buna hazırlamışdı. Canlarını qurban vermiş gənc nəsil, - müharibə zamanı demək olar ki, üç min nəfəri qurban verdik, - və Qələbəmizi qeyd edən minlərlə insan, bu, həqiqətən də müasir Azərbaycandır, bu, yeni Azərbaycandır. İndi artıq işğal damğasından azad olunmuş Azərbaycan yüksəlməkdədir və mən əminəm ki, Azərbaycan ən uğurlu ölkələrdən biri olacaq və söhbət təkcə bizim regiondan getmir".

Azərbaycan 2020-ci ildən bəri dünyanı iki dəfə heyrətləndirib. Birincisi, çətin dağlıq relyefdə 44 gün ərzində ildırım sürətli müharibə apararaq qələbə qazanmaqla. İkinci dəfə isə həmin çətin coğrafi məkanda sürətlə quruculuq-abadlıq işləri aparmaqla.

Rüstəm KAMAL,

Azərbaycan.-2022.- 8 oktyabr.- S.7.