10 ilin ASAN yolu

İlham Əliyevin yaratdığı milli brend ictimai xidmətlər sahəsində mükəmməl nümunə, təkmil örnəkdir

Tarix 2003-cü il 15 oktyabr.

Azərbaycan xalqı ölkədə keçirilən prezident seçkilərində Ulu Öndər Heydər Əliyevin layiqli varisi İlham Əliyevə yüksək etimad mandatı verərək özünə lider seçir. Xalqın inandığı, güvəndiyi dövlət başçısı yürütdüyü uğurlu diplomatiya və milli maraqlara əsaslanan müstəqil siyasətlə nəinki göstərilən etimadı doğruldur, hətta 200 illik münaqişəyə, 30 illik müharibəyə son qoyaraq Müzəffər Komandan kimi könüllərdə heykəlini ucaldır.

Prezident kimi fəaliyyət göstərdiyi 19 ildə İlham Əliyev Azərbaycanı tarixinin ən qüdrətli dövlətinə çevirir. Dünyada ən islahatçı, humanist və müstəqil siyasət yürüdən lider kimi tanınır. Azərbaycanın sosial-iqtisadi inkişafı üçün misli görünməmiş layihələr reallaşdırır. Məhz bu layihələrlə Azərbaycan dünyaya milli "Made in Azebaijan" kimi brendlər çıxarır.

O milli brendlərdən biri də "ASAN xidmət"dir.

Prezidentin sözü ilə desək "ASAN xidmət"in yaradılması Azərbaycanda aparılan ciddi islahatların təzahürüdür. Bu, yeni sistemdir. Bu, Azərbaycan brendidir".

10 il öncə - 2012-ci ildə Vətəndaşlara Xidmət və Sosial İnnovasiyalar üzrə Dövlət Agentliyi və onun tabeliyində "ASAN xidmət" mərkəzləri yaradılmasını və onların gələcək fəaliyyətini dəyərləndirərkən Prezident İlham Əliyevin söylədiyi bu fikirlər bu gün bir daha öz təsdiqini tapır.

Siyasətinin mərkəzində Azərbaycan vətəndaşı dayanan İlham Əliyevin ölkəyə rəhbərlik etdiyi 19 ildə xalqın rahatlığı naminə həyata keçirdiyi islahatlar bu gün öz mükəmməl nəticəsini verməkdədir. Prezidentin ictimai xidmətlər sahəsində reallaşdırdığı islahatların nəticəsidir ki, bu gün vətəndaş-dövlət münasibətləri yüksək səviyyədədir.

10 ildə 24 "ASAN xidmət" mərkəzi yaradılıb

Bu, bir həqiqətdir ki, İlham Əliyev fəaliyyətə başladığı ilk gündən dövlət orqanları qarşısında əhalinin problemlərinin operativ öyrənilməsini və səmərəli həllini ən vacib vəzifə kimi müəyyənləşdirib. Həmçinin bu sahədə ən mükəmməl nümunəni yaratmaqla rəsmi strukturların xalqın xidmətçisi funksiyası daşıdıqlarını daim təbliğ edib.

Elə prinsipləri operativlik, şəffaflıq, nəzakətlilik, məsuliyyətlilik, etik davranış qaydalarına nəzarət və rahatlıq olan "ASAN xidmət" sisteminin yaradılması da bu islahatların real nümunəsidir.

Bu gün "ASAN xidmət" dünyada bu sahədə ən təkmil örnək kimi qəbul edilən Azərbaycan modelidir. İctimai xidmətlər sahəsində "ASAN xidmət"in xətti ilə aparılan islahatlar nəinki bu sahəni nümunəvi edib, eyni zamanda cəmiyyətdəki münasibətlərə də çox müsbət təsir göstərib.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və onun tabeliyində "ASAN xidmət" mərkəzləri dövlət başçısının 2012-ci il 13 iyul tarixli 685 nömrəli fərmanı ilə yaradılsa da, qurum həmin ilin 29 dekabr tarxindən fəaliyyətə başlayıb.

Hazırda 24 "ASAN xidmət" mərkəzi fəaliyyət göstərir. Onlardan 7-si Bakı şəhərində, 2-si Gəncədə, 2-si Sumqayıtda olmaqla, digərləri Sabirabad, Bərdə, Qəbələ, Masallı, Quba, Mingəçevir, İmişli, Şəki, Şamaxı, Kürdəmir, Tovuz, Ağcabədi və Balakəndədir.

Lənkəran, Salyan və Naxçıvanda isə ilk "ASAN xidmət" mərkəzləri inşa olunur.

Bir mərkəzdə 320-dən çox xidmət

"ASAN xidmət" mərkəzlərində müxtəlif dövlət orqanları, həmçinin özəl şirkət və müəssisələr tərəfindən ümumilikdə 325-dən çox xidmət göstərilir.

"ASAN Kommunal" mərkəzlərində isə "Azərişıq" ASC, "Azərsu" ASC və "Azəriqaz" İB tərəfindən 55 növ xidmət mövcuddur.

Bu günədək "ASAN xidmət" mərkəzlərinə 8 milyon 236 mindən çox vətəndaşın 57 milyona yaxın müraciəti daxil olub.

Keçirilən rəy sorğularına əsasən vətəndaşların xidmətlərdən məmnunluq əmsalı 99,5 faiz təşkil edir.

Ümumiyyətlə, sirr deyil ki, İlham Əliyevin müəllifi olduğu "ASAN xidmət"in yaradılması ictimai xidmətlər sahəsində inqilabi dəyişiklik kimi qəbul edilir. Eyni zamanda bu, yeni davranış qaydalarının tətbiqidir.

Əvvəllər xidmət sektoru problemli sahə idi. Həm pozuntular olurdu, həm diqqətsizlik, həm də vətəndaşlara bir çox hallarda hörmətsizlik edilirdi, laqeyd münasibət göstərilirdi. Vətəndaşlar onlara çatacaq sənədləri, arayışları günlərlə, həftələrlə ala bilmirdilər, yaxud da onlardan nə isə tələb olunurdu, qanunsuz tələblər irəli sürülürdü. Bu gün isə məmnunluq əmsalı 100 faizə yaxın olan "ASAN xidmət" mərkəzləri ölkə ictimaiyyətinin ən çox etibar etdiyi, inandığı, güvəndiyi mərkəz kimi fəaliyyət göstərir.

Könüllü ordusu, 10 səyyar "ASAN xidmət" avtobusu və 1 "ASAN qatar"

Regionlarda 10 səyyar "ASAN xidmət" avtobusu və səyyar "ASAN qatar" vasitəsilə vətəndaşlara səyyar formada xidmətlərin göstərilməsi davam etdirilir. 2013-cü ilin iyun ayından etibarən 2 milyon 686 mindən çox vətəndaşa səyyar xidmət göstərilib.

Könüllülər "ASAN xidmət"in fəaliyyətə başladığı ilk gündən etibarən bu konsepsiyanın bir komponentidir. Bu prosesə 30 mindən çox könüllü gənc qoşulub. Bu günə kimi könüllülər tərəfindən 5 mindən çox təlim, 750-dən çox yerli və beynəlxalq layihə keçirilib və 3 minə yaxın könüllü "ASAN Kadr" portalı vasitəsilə işlə təmin olunub.

Dövlət Agentliyi və tabeliyində olan qurumlar öz fəaliyyəti çərçivəsində 15 ölkə və 2 beynəlxalq təşkilatla müqavilə imzalayıb.

Bu çərçivədə İtaliya, Böyük Britaniya, Türkiyə, Monteneqro, Estoniya, Koreya, İndoneziya, Mərakeş, Özbəkistan, Uqanda və digər ölkələrin müvafiq sahələr üzrə fəaliyyət göstərən qurumları ilə anlaşma memorandumları imzalanıb.

Eyni zamanda UCLG Afrika və ICESCO təşkilatları ilə anlaşma memorandumları imzalanıb.

İndoneziya, Monteneqro, Özbəkistan, Türkmənistan, Rusiya Federasiyası və bir sıra ölkələrin müvafiq sahələr üzrə fəaliyyət göstərən qurumlarının nümayəndələrinə Dövlət Agentliyinin ekspertləri tərəfindən təlimlər keçirilib.

Həmçinin bir neçə ölkədən "ASAN xidmət" təcrübəsinin öz ölkələrində tətbiqi ilə əlaqədar müraciətlər daxil olub. Hazırda danışıqlar davam etdirilir.

Göründüyü kimi, milli brendimiz olan "ASAN xidmət" fəaliyyətini getdikcə daha da şaxələndirir. "ASAN xidmət"də çalışan hər bir əməkdaş öz işi ilə həm vətəndaş məmnunluğunun daha da yüksəlməsi, həm də Azərbaycanın beynəlxalq nüfuzunun, siyasi çəkisinin artması üçün operativlik, şəffaflıq, nəzakətlilik, məsuliyyətlilik prinsiplərinə sadiqlik nümayiş etdirir.

Rəşad BAXŞƏLİYEV,

Azərbaycan.-2022.- 15 oktyabr.- S.19.