Ermənistan riyakarlığından əl çəkmir

İşğalçı ölkə öhdəsinə götürdüyü müddəaları yubatmağa yönəlik mövqe nümayiş etdirir, ard arda təxribatlar törədir

Ötən ayın 31-də Brüsseldə Avropa İttifaqı Şurasının prezidenti Şarl Mişelin təşəbbüsü ilə keçirilən növbəti - dördüncü görüş də əvvəlki üç görüşdə olduğu kimi, Zəfər komandanı İlham Əliyevin diplomatik üstünlüyü ilə başa çatdı. Brüsseldəki digər görüşlərdə olduğu kimi, son görüşdə də rəsmi Bakının maraqlarına uyğun olaraq, "Qarabağ", "Minsk qrupu", "status" ifadələri işlədilmədi. Baxmayaraq ki, Brüsseldəki danışıqlarda erməni tərəfi müqavimət göstərirdi və real nəticələrin əldə olunmasının qarşısını almaq üçün cəhdlər edirdi. Lakin onların bu cəhdləri də həmişəki kimi uğursuz oldu.

Bu, görüşdən sonra Ermənistanın baş naziri Nikol Paşinyanın artıq bölgədəki mövcud reallıqları qəbul etməsi ilə bağlı açıqlamalarından da aydın sezilir.

Cənubi Qafqazda sülhün təminatçısı Azərbaycandır

Xüsusi vurğulayaq ki, Qalib Komandan İlham Əliyev sözügedən Brüssel görüşünə böyük üstünlüklə yollanmışdı. Ermənistanın növbəti təxribatına cavab olaraq "Qisas" cavab əməliyyatının keçirilməsi və ordumuzun Qırxqız yüksəkliyi, həmçinin Kiçik Qafqaz dağ silsiləsinin Qarabağ silsiləsi boyu Sarıbaba və bir sıra digər əhəmiyyətli hakim yüksəkliklərin nəzarətə götürülməsi buna bariz nümunədir. Eləcə də yeni Laçın avtomobil yolunun vaxtından xeyli əvvəl istifadəyə verilməsi ilə Laçın şəhəri, Zabux, Sus kəndlərinin boşaldılması bu prosesin tərkib hissəsi idi.

Bütün bu sadalananlar isə Azərbaycan tərəfinin 10 noyabr üçtərəfli Bəyanatda nəzərdə tutulmuş bütün öhdəlikləri vaxtından əvvəl reallaşdırdığını, Cənubi Qafqazda sülhün bərqərar olmasına hər cür töhfə verdiyini təsdiqləyirdi.

Aİ Şurasının prezidenti Şarl Mişelin də üçtərəfli görüşdən sonra verdiyi bəyanatdan məlum olur ki, bu müzakirədə Azərbaycan və Ermənistan arasında dövlətlərarası münasibətləri tənzimləyən sülh müqaviləsi üzrə irəliləyiş üçün prosesin gücləndirilməsi haqqında hər iki tərəflə razılaşma əldə edilib.

Ermənistanın bitməyən təxribatları

Ermənistan da dördüncü Brüssel görüşündə sülh müqaviləsi üzrə irəliləyiş üçün prosesin gücləndirilməsi ilə bağlı razılığını verib. Amma sonuncu üçtərəfli görüşün üzərindən ötən qısa zamanda Azərbaycana qarşı yeni təxribatlara əl atması bu işğalçı ölkənin növbəti riyakarlığını ortaya qoydu.

Belə ki, sentyabrın 2-də Ermənistan Təhlükəsizlik Şurasının katibi Armen Qriqoryanın Xankəndiyə qanunsuz səfər etməsi Ermənistan tərəfinin növbəti təxribatıdır.

Qanunsuz səfərlə bağlı Azərbaycan Xarici İşlər Nazirliyi tərəfindən də bildirilib ki, Azərbaycan və Ermənistan liderləri arasında Brüsseldə baş tutan növbəti görüşdən dərhal sonra Ermənistan rəsmisi tərəfindən məqsədyönlü şəkildə atılan bu qanunsuz addım görüş zamanı əldə edilmiş razılıqlara kölgə salmaqla yanaşı, Ermənistan tərəfinin normallaşma prosesində səmimi olmadığını açıq nümayiş etdirir: "Bu qanunsuz səfər Ermənistanın Azərbaycana qarşı ərazi iddiasının olmadığı, suverenlik və dövlət sərhədləri prinsiplərini qəbul etdiyinə dair bəyanatlarının səmimiyyətdən uzaq olduğunu göstərir. Bu həmçinin rəsmi Yerevan tərəfindən beynəlxalq vasitəçilərin səylərinə hörmətsizlikdir".

Onu da qeyd edək ki, sözügedən tarixdə bu ölkə daha bir təxribata əl atıb. Ermənistan silahlı qüvvələrinin bölmələri dövlət sərhədinin Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Kəlbəcər rayonunun Yellicə yaşayış məntəqəsi istiqamətində yerləşən ordumuzun mövqelərini, həmçinin qeyd olunan mövqelərimizə təminat daşıyan 2 hərbi nəqliyyat vasitəsini atəşə tutub.

Göstərdiyimiz faktlar da bunu ortaya qoyur ki, işğalçı Ermənistan üçtərəfli görüşlərdə sülh üçün yalançı razılıq verərək, beynəlxalq aləmin gözü qarşısında hansısa rol oynayır. Pərdə arxasında isə əsl xislətini ortaya qoyaraq təxribat törətməkdən əl çəkmir.

İşğalçının mina terroru

Laçında aşkarlanan xeyli sayda piyada əleyhinə minalar da bu ölkənin 10 noyabr üçtərəfli razılaşmasına riyakarlığını və üzərinə götürdüyü öhdəlikləri pozduğunu göstərir.

Müdafiə Nazirliyi və Minatəmizləmə Agentliyinin beynəlxalq humanitar hüquqa zidd olaraq Laçında aşkarlanan PMN-E növlü minalarla bağlı birgə bəyanatında da məlumat verilir ki, Laçın rayonu ərazisində piyada əleyhinə mina sahələrindən cari ilin 15 avqust tarixindən 31 avqust tarixinədək 1318 ədəd PMN-E növlü minalar aşkar edilib. Aşkar olunan minalar Vətən müharibəsindən sonra 2021-ci ildə Ermənistanda istehsal olunan minalardır.

Bəyanatda o da vurğulanır ki, beynəlxalq humanitar hüquqa əsasən, 1997-ci ildə qəbul edilmiş Ottava müqaviləsi piyada əleyhinə minaların istehsal edilməsi, saxlanılması, daşınması və istifadəsini qadağan edir: "Həmçinin Ermənistan işğaldan azad olunmuş ərazilərdə piyada əleyhinə minalar basdırmaqla 1949-cu il tarixli Cenevrə konvensiyalarının I Əlavə Protokolunun tələblərini pozur və bunu rəsmi şəkildə bəyan etməklə beynəlxalq ictimaiyyətə açıq hörmətsizlik nümayiş etdirir. Ermənistanın basdırdığı piyada əleyhinə mina sahələrinin miqyası və kütləviliyi mina terrorunun təzahürüdür. Bütün bunlar regionda sülhə və təhlükəsizliyə, ətraf mühitə qarşı qəsdən törədilmiş cinayətdir. Bununla isə Ermənistan düşmənçilik niyyətini bir daha sübut edir".

Tarixi torpaqlarımıza qayıdışı ləngidən əsas səbəb

30 il ərzində Azərbaycanın əzəli torpaqlarını işğalda saxlayan ermənilər ərazilərimizdə külli miqdarda mina basdırıblar. Qarabağı və Şərqi Zəngəzuru mina tarlasına çevirərək, yollara, həyətlərə, evlərə, demək olar ki, hər daşın-qayanın altına piyada və tank əleyhinə mina döşəyiblər. Erməni faşistləri bu partlayıcı qurğular sayəsində dinc azərbaycanlılara, texnikaya, əraziyə mümkün qədər çox ziyan vurmaq məqsədi güdüblər.

Buna görədir ki, 44 günlük Vətən müharibəsi sayəsində torpaqlarımızı işğaldan azad edəndən sonrakı müddətdə tarixi ərazilərimizdə düşmənin basdırdığı mina təhlükəsi ilə qarşı-qarşıya qalmışıq. Üçtərəfli Bəyanatın imzalanmasından sonra Ermənistan tərəfindən Azərbaycanın işğaldan azad olunan ərazilərinə döşənmiş minaların partlaması nəticəsində xeyli sayda vətəndaşımız həlak olub, ciddi xəsarət alıb. Onların arasında KİV nümayəndələri də var.

İşğalçı Ermənistanın Qarabağ və Şərqi Zəngəzur ərazisində saysız mina basdırması keçmiş məcburi köçkünlərimizin dədə-baba yurdlarına qayıdışı prosesini ləngidir. Çünki belə geniş ərazilərin minalardan təmizlənməsi olduqca böyük zaman və resurs tələb edir. Hazırda Azərbaycanın qarşısında duran əsas problemlərdən biri işğaldan azad edilmiş ərazilərin minalardan təmizlənməsidir.

Elə əvvəlki üçtərəfli görüşlərdə olduğu kimi, dördüncü Brüssel görüşündə də müzakirə mövzularından biri işğaldan azad edilmiş ərazilərimizdə mina probleminin həlli ilə bağlı idi.

Azərbaycana qarşı bütün təhlükələr yerindəcə məhv ediləcək

Görünən odur ki, Vətən müharibəsinin üzərindən ötən müddət ərzində Ermənistan öhdəliyinə götürdüyü və qeyd-şərtsiz əməl etməli olduğu müddəaların icrasını yubatmağa, pozmağa yönəlik mövqe nümayiş etdirir, təxribatlar törətməkdən əl çəkmir. Necə deyərlər, zaman dəyişir, amma erməninin faşist xisləti dəyişmir.

Brüsseldə Ermənistanın baş naziri iki dövlət arasında sülhə razı olduğunu bildirir, paralel olaraq, ölkəsi tərəfindən Azərbaycana qarşı ardıcıl təxribatlar törədilir.

Qəribə paradoksdur, deyilmi?!

Həm də Ermənistanın iç üzünü ortaya qoyan bariz nümunələrdir.

Əslində, Ermənistanın əsl simasını Prezident İlham Əliyev bir müddət əvvəl səsləndirdiyi fikirlərlə dəqiq ifadə edib: "Biz heç vaxt indiki hakimiyyətin xoş sözlərinə aldanmamalıyıq. Heç vaxt unutmamalıyıq ki, biz hansı qonşu ilə qonşuluqda yaşayırıq... Biz onu da bilməliyik ki, istənilən sülh müqaviləsi Ermənistan üçün sadəcə kağız parçası ola bilər... Biz istəyirik ki, müharibə dövrü başa çatsın, istəyirik ki, normal əlaqələr yaradılsın, Ermənistan Azərbaycanın ərazi bütövlüyünü, nəhayət, tanısın. Biz bunu istəyirik. Amma əgər biz görsək ki, dediyim kimi, bizim üçün təhlükə var, o təhlükə elə yerindəcə məhv ediləcək...".

Bəli, Ermənistan istəsə də, istəməsə də Azərbaycan onu regionda sülhə mənfi təsir göstərən təxribatçı əməllərinə son qoymağa məcbur edəcək və işğalçı ölkənin hansı mövqe tutmasından asılı olmayaraq, öz maraqlarını qətiyyətlə qoruyacaq.

Yasəmən MUSAYEVA

Azərbaycan.- 2022.- 6 sentyabr.- S. 5.