Azərbaycan regional nəqliyyat mərkəzinə
çevrilir
“Şimal-Cənub nəqliyyat dəhlizi” ölkəmizin
geosiyasi əhəmiyyətini
artırır
"Biz iki dəhliz üzərində yerləşirik - Şimal-Cənub və Şərq-Qərb. Əlbəttə, bu, Azərbaycanın geosiyasi əhəmiyyətini artırır və yeni iş yerlərinin yaradılmasına imkan verir. Biz "Şimal-Cənub nəqliyyat dəhlizi"nin "Şərq-Qərb dəhlizi" qədər vacib olacağı qənaətindəyik. Bizim üçün onlar bərabər dərəcədə əhəmiyyətlidir. Çünki hər iki dəhliz bizim ərazimizdən keçir".
Bu sözləri Prezident İlham Əliyev Çernobbio şəhərində İtaliyanın "İl Sole 24 Ore" qəzetinə müsahibəsində deyib. Dövlət başçısı qeyd edib ki, Azərbaycan Xəzər dənizinin şərq sahillərindən neft və digər yük daşıyan hər növ gəmilər inşa edə bilir: "Biz dəmir və avtomobil yolları tikmişik. Çin və Mərkəzi Asiya ölkələrindən Azərbaycan vasitəsilə ixrac artmaqdadır və zənnimcə, artım 20 faiz səviyyəsindədir. Bütün bu işlər Rusiya-Ukrayna müharibəsindən əvvəl görülüb. Rusiya-Ukrayna müharibəsi Xəzərin şərq sahilindəki şirkətlər üçün bir siqnal oldu ki, bu marşrut daha da yaxından nəzərdən keçirilməlidir".
"Şimal-Cənub nəqliyyat dəhlizi"nin əhəmiyyəti
artmaqdadır
Prezident İlham Əliyev vurğulayıb ki, Azərbaycan tərəfdaş ölkələrə yaxşı tariflər irəli sürür və bütün zəruri logistika dəstəyi təmin edir. Yəni açıq dənizə çıxışı olmayan ölkə olaraq Azərbaycan bu gün regional nəqliyyat mərkəzinə çevrilir.
Dövlət başçısı həmçinin "Şimal-Cənub nəqliyyat dəhlizi"ndən də söz açıb və bildirib ki, bu dəhliz də Azərbaycandan keçir, başqa marşrut variantı yoxdur. Həmin dəhliz, məsələn, Rusiya şirkətləri üçün əhəmiyyətli olur, çünki bu gün sanksiyalar səbəbindən onlar Avropa məntəqələrinə yük daşıya bilmirlər. Yəni Azərbaycandan keçərək İrana və Fars körfəzi sahillərinə gedən marşrut Rusiya şirkətləri üçün cəlbedici olur.
Azərbaycan bu gün iqtisadi yüksəliş dövrünü yaşamaqla yanaşı, bir çox ölkənin müxtəlif sahələrdə əsas təchizatçısıdır. Ölkəmiz Avropanın enerji təhlükəsizliyinin təmin olunmasında böyük rol oynayır, həmçinin dünyanın tranzit ölkəsinə çevrilir. Zaman göstərir ki, "Şərq-Qərb nəqliyyat dəhlizi" kimi, artıq "Şimal-Cənub nəqliyyat dəhlizi"nin də əhəmiyyəti artmaqdadır. Eyni zamanda bu beynəlxalq dəhlizdən istifadə imkanlarının genişləndirilməsi də gündəmdədir. Təbii ki, bu dəhliz vasitəsilə daşınmaların həcminin artması region ölkələri kimi, Azərbaycan üçün də böyük əhəmiyyət daşıyır. Bununla dövlət gəlirləri artır, həmçinin Azərbaycan bir çox ölkənin əsas tərəfdaşlarından birinə çevrilir.
Qeyri-neft sektorundan
daxilolmaların artmasına
imkan yaranacaq
"Şimal-Cənub
nəqliyyat dəhlizi"nin
əhəmiyyəti barədə
qəzetimizə açıqlama
verən Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bildirib ki, bu
nəqliyyat dəhlizi
Azərbaycan, bütövlükdə region üçün
vacib layihələrdən
biri hesab olunur.
Deputat qeyd edir ki,
burada söhbət şimaldan başlayaraq yüklərin Hindistana qədər daşınmasından
gedir. Bu da
kifayət qədər
böyük coğrafiyanı
əhatə edir.
"Şərq-Qərb nəqliyyat dəhlizi"
kimi, bu dəhliz vasitəsilə də çoxlu yüklərin daşınacağı
proqnozlaşdırılır. Nəzərə alsaq ki, Hindistanın ixrac imkanları artıb, eyni zamanda kifayət
qədər böyük
məhsullar idxal edən ölkələrdən
biridir, onda bunun əhəmiyyətini
başa düşmək
olar. Tək Hindistan deyil,
regionda yerləşən
digər ölkələr
də "Şimal-Cənub
nəqliyyat dəhlizi"ndən
aktiv şəkildə
istifadə etmək niyyətindədirlər.
Vüqar Bayramov deyir ki, istər "Şərq-Qərb", istərsə
də "Şimal-Cənub"
dəhlizləri Azərbaycan
üzərindən keçir. Ölkəmiz
Şimal-Cənub dəhlizinin
reallaşmasında maraqlıdır:
"Azərbaycan yalnız
layihəni dəstəkləmir, həmçinin
onun reallaşması üçün İranda
infrastruktura invesitisiya
yatırır. Bu da ondan xəbər verir ki, Azərbaycan "Şimal
Cənub nəqliyyat dəhlizi"nin reallaşmasına
sərmayə qoyuluşları
ilə dəstək verən ölkələrdəndir".
Deputatın sözlərinə görə,
sərmayə qoyuluşu
layihənin daha tez reallaşması, region
ölkələrin bundan
gəlir əldə etməsi baxımından vacibdir.
"Şimal-Cənub
nəqliyyat dəhlizi"nin
reallaşmasının Azərbaycanın
dövlət gəlirlərinin
artmasına imkan verəcəyini də vurğulayan deputat bu ilin birinci
yarısında Azərbaycan
üzərindən daşınan
yüklərin həcmində
30 faiz artımın da qeydə alındığını
söyləyir. İlin sonuna
kimi bu rəqəmin
daha yüksək olacağı gözlənilir.
Vüqar Bayramovun fikrincə, hazırda Azərbaycan üzərindən daşınan
yüklərin həcmi
artır. Bu da ondan xəbər verir ki, bir
tərəfdən infrastrukturun
genişləndirilməsi, digər
tərəfdən Azərbaycanın
qonşu ölkələrlə,
xüsusən Gürcüstan
və Qazaxıstanla birgə tarif siyasəti, beynəlxalq yük daşımalarla bağlı koordinasiya edilmiş fəaliyyətin həyata
keçirilməsi regiona
marağı artırır.
Buna görə, məhz
"Şimal-Cənub nəqliyyat
dəhlizi" Azərbaycana
valyuta gətirən layihələrdəndir.
Deputat sonda bildirib ki, bu nəqliyyat
dəhlizi xüsusən
qeyri-neft sektorundan daxilolmaların həcminin
artmasına imkan verəcək.
Qeyd edək ki, dünya
iqtisadiyyatının üzləşdiyi
çətin dönəmdə
Azərbaycan iqtisadiyyata
mənfi təsirləri
azaltmaq istiqamətində
aktiv siyasət yürüdür. Bununla yanaşı, ölkəmiz
Avropanın, həmçinin
bəzi nəhəng ölkələrin əsas
tərəfdaşına və
xilaskarına çevrilərək,
müxtəlif beynəlxalq
əhəmiyyətli layihələrin
təşəbbüskarı, dəstəkçisi rolunda
çıxış edir.
Həmçinin dünyada gedən müəyyən siyasi qütbləşmələr Azərbaycanın
tranzit imkanlarına da maraqları artırıb. Bu da
ölkəmizin beynəlxalq
nəqliyyat dəhlizlərindəki
xüsusi əhəmiyyətini
bir daha təsdiq edir.
Əsmər QARDAŞXANOVA
Azərbaycan.-
2022.-9 sentyabr.- S.9.