Azərbaycan Pelosinin gözyaşlarına inanmır…

"Qışqıra-qışqıra danışmaq bu xalqın xəstəliyidir. Özgə millətləri də özlərinin xeyrinə qışqırmağa, yalan informasiya yaymağa cəlb edə bilirlər".

Yazıçı Jemçuynikovun erməni xislətini dəqiq izah edən bu iki cümləsi də sübut edir ki, erməni bədnamlığı, fitnəsi, riyası nə dünənin, nə bugünün, nə də sabahın problemidir… Erməni məkri bu dünyanın çözülməsi çox müşkül olan əbədi problemidir.

Daim "biçarə" obrazında olan bu riyakarlar maskalanaraq dünyanın gözündə əzilən, çətinliyə düçar olan "zavallı" xalq rolunu məharətlə ifa edirlər…

Kimisi "məzlum" ermənilərin bu tamaşalarına inanır, onlara yazıqları gəlir, kimisi də erməni xislətinə bələd ola-ola onların bu riyakarlıqlarından öz mənafeləri üçün məharətlə istifadə edirlər...

Sentimental hisslər üzərindən erməni lobbisinə "hücum"

Elə Cənubi Qafqazda vəziyyətin çox həssas olduğu bir dönəmdə Ermənistana səfər edən ABŞ Konqresi Nümayəndələr Palatasının spikeri Nensi Pelosi kimi. Vəzifəsinin müddətinin başa çatmasına cəmi iki ay qalan Nensi Pelosi regiondakı vəziyyətdən öz xeyrinə yararlanmaq üçün, necə deyərlər, fürsəti fövtə vermədi və Ermənistana yola düşdü. Nə təsadüfdür ki, Pelosinin nümayəndə heyətinə üç nəfər də ermənipərəst konqres üzvü daxil edilmişdi.

Gözlənildiyi kimi, Ermənistanda xanım Pelosi dünyada, xüsusilə də ABŞ-da yaşayan ermənilərin xoşuna gələcək və bölgədəki vəziyyəti təhrif edən açıqlamalar verdi. Azərbaycana qarşı əsassız və ədalətsiz ittihamlar irəli sürdü.

N.Pelosi Ermənistanda hətta emosional obraza bürünərək, - bunu həm də sentimental hisslər üzərindən "hücum" da adlandırmaq olar, - özünü bir-iki damla gözyaşı axıtmağa da məcbur etdi...

Bir sözlə, Nümayəndələr Palatasının spikeri ABŞ Konqresinə keçiriləcək aralıq seçkilərdən öncə oradakı erməni lobbisinin dəstəyini qazanmaq və şəxsi maraqlarına xidmət edəcək bütün mümkün variantlardan istifadə etdi.

N.Pelosinin bu canfəşanlığının işə yarayıb-yaramayacağı, onun erməni yalanlarına həqiqət donu geydirmək cəhdinin erməni lobbisinin xoşuna gəlib-gəlməyəcəyi isə cəmi iki aydan sonra bəlli olacaq...

Amma bütün bunların, Ermənistanda sərgilənən şou xarakterli məzhəkənin bizim üçün heç bir əhəmiyyəti yoxdur. Bütün bu olanlar ABŞ-dakı erməni lobbisi ilə N.Pelosi arasında olan şəxsi məsələdir... Özləri bilər...

Azərbaycan həqiqətlərini bilə-bilə ölkəmizə qarşı əsassız ittihamlar irəli sürdü

Bizi maraqlandıran əsas məsələ ABŞ Konqresi Nümayəndələr Palatasının spikeri Nensi Pelosinin Azərbaycan həqiqətlərini bilə-bilə ölkəmizə qarşı əsassız ittihamlar irəli sürməsidir.

Axı iki əsrə yaxındır ki, Azərbaycan xalqı erməni faşistlərinin qaniçən əməlləri ilə üz-üzədir. Zaman-zaman erməni qatillərinin törətdikləri faciələrin qurbanına çevrilmişik, onların törətdiyi 1918-ci il Mart soyqırımı, 1992-ci il 26 Fevral - Xocalı soyqırımı, əsir götürdükləri soydaşlarımızın başına gətirdikləri müsibətlər heç kəsin yadından çıxmayıb, dünya durduqca erməni adının qarşısında qara ləkə kimi qalacaq.

Şovinist erməni milliyyətçilərinin işğalçılıq siyasəti nəticəsində yüz minlərlə soydaşımız tarixi dədə-baba yurdlarından məcburən çıxarılıb, qaçqına, məcburi köçkünə çevrilib. 30 il müddətində Qarabağı və ətraf rayonları işğal altında saxlayan erməni vandalları bu ərazilərdə daşı daş üstündə qoymayıblar, tarixi, dini, mədəni irsimizi yerləyeksan edib, bu yerlərdə "yanmış torpaq" siyasəti həyata keçiriblər.

Ola bilsin ki, bir çoxları mənfur ermənilərin Azərbaycan xalqının başına gətirdiyi bu faciələrdən bixəbərdir, amma məhz xanım Pelosi şəxsən bu həqiqətləri bilir...

Mətbuatda yer alan məlumatlardan oxuyuruq ki, 1998-ci ilin yayında Ermənistan və Azərbaycana səfər edən ABŞ Konqresinin nümayəndələri arasında Nensi Pelosi də olub. Həmin vaxt Azərbaycana səfər zamanı Nensi Pelosi və digər konqresmenlər helikopterlə məcburi köçkün şəhərciyinə gedirlər və Pelosi məcburi köçkünlərin yaşayış şəraitini görəndə gözyaşlarını saxlaya bilmir...

Bəli, Nensi xanım işğalçı ermənilər tərəfindən öz dədə-baba yurdlarından didərgin düşərək acınacaqlı şəraitlərdə yaşamağa məhkum olan azərbaycanlıların faciəsinə laqeyd qala bilməmişdi...

Amma görünür, spikerin ürəyindəki vəzifə eşqi, onu bu faciəvi mənzərəni yaddaşından, qəlbindən silməyə vadar edib və buna görədir ki, hələ də erməni seçicilərin səslərinə görə, erməni lobbisinin əsas fiquru olmaqdan vaz keçə bilmir, ikili oynayır, haqqı nahaqqa qurban verir...

Azərbaycan milli maraqlarını qətiyyətlə özü təmin edir

Əslində, Azərbaycan 30 ildir ki, ABŞ-ın, Qərbin bəzi dairələrinin ikili standartları ilə qarşı-qarşıyadır. Buna bariz faktlardan biri 1992-ci ildə erməni lobbisinin təşəbbüsü ilə ABŞ Konqresi tərəfindən "Azadlığa Dəstək" Aktına qəbul edilən və Azərbaycana Amerikanın birbaşa dövlət yardımını yasaqlayan düzəlişin olmasıdır.

Buna bariz nümunələrdən biri artıq tarixin arxivinə gömülmüş ATƏT-in Minsk qrupunun 30 il müddətində ölü qurum kimi fəaliyyət göstərməsidir.

Buna bariz misallardan biri BMT-nin Azərbaycan torpaqlarının işğalı ilə bağlı qəbul etdiyi 4 qətnaməni icra etməməsidir.

Və bu 4 qətnaməni Azərbaycanın özünün icra edərək Vətən müharibəsində parlaq zəfər qazanmasıdır.

İndən belə isə xanım Pelosi hər nə qədər ermənilərin özlərini düşürdüyü bu acı aqibətlərinə gözyaşları töksə də, hər nə qədər Azərbaycana qarşı qərəzli açıqlamalar versə də, bütün bunlar "politika" baxımından bir qara qəpiyə dəyməyəcək.

N.Pelosinin Ermənistan səfəri ABŞ qanunvericiliyinə görə əhəmiyyətli bir səfər hesab olunmur. Çünki xarici siyasətdə istər spiker, istərsə də konqres çox məhdud rol oynayır və diplomatiyada əsas funksiya Prezidentə məxsusdur.

İndi Cənubi Qafqaz regionunda baş verən hadisələrin siyasi məcrada axınının nəticəsi isə belə olacaq: işğalçı Ermənistan nə qədər hay-küy salsa da, özünə güclü havadarlar axtarsa da, faydası olmayacaq. Azərbaycanın haqlı şərtlərinə əməl etməyə, sülh bağlamağa məcbur olacaq, ya öz xoşu ilə, ya da ki zorla!

Yasəmən MUSAYEVA

Azərbaycan.- 2022.- 20 sentyabr.- S.3.