Tarixə çevrilən "Anım günü"
yürüşü
2020-ci ilin 27 sentyabrı böyük Zəfərə gedən yolun başlanğıc nöqtəsi kimi tarixə yazıldı. Həmin gündən Vətən savaşının qələbə dolu əks-sədası eşidildi. Böyük qələbəmizə doğru ilk addımın atıldığı gün heç zaman unudulmayacaq. Qəhrəmanlıqları ilə dastana çevrilmiş Azərbaycan övladlarının Vətən savaşındakı şücaəti, əzmkarlığı nəsillərə örnək olacaq. Şəhidlərimizin əziz xatirəsi hər zaman anılacaq, onların igidlik hekayələri dillərdə dolaşacaq.
Xalqımız sentyabrın 27-də Ermənistan silahlılarının növbəti təxribatına cavab olaraq ordumuza hücum əmri verən və bununla regionda yeni bir reallıq yaradan Ali Baş Komandan İlham Əliyevin qətiyyəti, əsgər və zabitlərimizlə birgə Vətənə bəxş etdiyi tarixi Qələbə ilə daim qürur duyacaq.
Son bir neçə əsrlik tariximizdə buna bənzər zəfər olmayıb!
Prezident İlham Əliyev iki əsr ərzində yeganə ağır problemimiz olan Qarabağ münaqişəsini həll edə bildi. Yoluna qoyulması mümkün olmayan, hər dəfə yenidən alovlananda minlərlə insanın, ailənin faciəsi ilə nəticələnən, regionun bu günü və gələcəyi üçün ən böyük təhdid kimi qalan bu münaqişəni "dəmir yumruğ"un zərbəsi ilə cəmi 44 gündə həll etdi.
27 Sentyabr ölkəmizdə Anım günüdür! Bu, qürurun, fəxarətin iztirablara üstün gəldiyi, xalqımızın keçmişinə boylanaraq öz böyüklüyünü bütün əzəməti ilə dərk etdiyi gündür.
Vətən müharibəsində qəhrəmancasına döyüşmüş, bayrağımızı işğaldan azad olunan torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, eləcə də bütün şəhidlərimizə dərin ehtiram əlaməti olaraq Azərbaycan Respublikası Prezidentinin 2 dekabr 2020-ci il tarixli sərəncamı ilə "Anım günü" təsis edilmişdir.
Müzəffər Ali Baş Komandan İlham Əliyevin, ölkəmizin Birinci vitse-prezidenti Mehriban xanım Əliyevanın iştirakı ilə ötən il Bakıda təşkil olunmuş möhtəşəm "Anım yürüşü"nün keçirilməsinin ildönümüdür. Düz bir il əvvəl səhər saatlarında Bakının əsas prospektlərindən olan Neftçilər prospektində yaşanan mənzərə bu görüntüləri izləyənləri riqqətə gətirmişdi.
Ali Baş Komandan və ölkəmizin Birinci vitse-prezidenti Mehriban xanım Əliyeva ali hərbi məktəblərin gənc kursantları və hərbçilərimizlə birgə əllərində Vətən müharibəsi şəhidlərinin fotoları əks olunmuş plakatları qaldıraraq qətiyyətli addımlarla irəliləyirdilər. Yürüşdə Azərbaycan Respublikası Müdafiə Nazirliyinin Heydər Əliyev adına Azərbaycan Ali Hərbi Məktəbinin və Bakı qarnizonunda yerləşən hərbi hissələrin 3000 nəfərdən çox kursant və hərbi qulluqçusu iştirak edirdi. Hər şəhidimizin yerini onun fotosunu ucalara yüksəltmiş bir Azərbaycan övladı tutmuşdu. Yürüşün insanı duyğulandıran mənzərəsi, yaratdığı məna yüksək təşkilatçılıqdan, hər detalın diqqətlə düşünüldüyündən xəbər verirdi. Azərbaycan bu "Anım günü" yürüşü ilə Vətən uğrunda qurban getmiş insanlara ehtiramın, onların müqəddəs xatirəsinin yad edilməsi anlarının da mükəmməl örnəyini yaratdı. Qürurun, güclü bir dövlətə aidlik duyğusunun, bu dövlətin Ali Baş Komandanından başlamış sıravi vətəndaşına qədər öz igid qəhrəmanlarına verdiyi dəyərin ifadəsi idi.
Bir igidin yerinə
min igid gəlir
İstənilən
müharibə münaqişələrin həlli
üçün sonuncu çarədir. Çünki
bütün müharibələrdə itkilər, ölümlər,
insan faciələri labüd olur. Bütün
bunların qisası döyüş meydanında alınsa da,
hər biri təkrarolunmaz olan ömürləri geri qaytarmaq,
onların itkisinin qəlbimizdəki dərin yarasını
ovutmaq mümkün deyil. Üstəlik, biz
humanizm hissindən tamamilə məhrum, adi insani duyğulardan
xali, müharibənin qayda-qanunları ilə bağlı
heç bir normaya məhəl qoymayan vəhşixislətli
azğın düşmənlə üz-üzə idik.
Məlum idi ki, münaqişənin həlli
üçün hərb yolundan başqa əlac qalmasa, hər
iki tərəfdən xeyli itkilər olacaq. Məhz elə buna görə Azərbaycan illər
boyu səbirlə, təmkinlə sülh
danışıqlarına sadiq qaldı, məsələnin
müharibəsiz, itkilərsiz həlli üçün
bütün imkanları dəyərləndirdi. Düşmənin 2020-ci ilin yayında əsəbləri
tarıma çəkən təxribatları daha hərbdən
başqa heç bir yolun qalmadığını göstərdi.
Şanlı ordumuz əks-hücuma keçərək
torpaqlarımızı cəmi 44 günün içində
işğaldan azad etdi. Ermənistan ordusu
bu döyüşlərdə darmadağın edildi.
Yada salaq ki, 44 günlük Vətən
müharibəsi zamanı Azərbaycandan 2907 nəfər şəhid
olmuş, 7 nəfər itkin düşmüş, Ermənistanın
dinc əhaliyə qarşı cinayətləri nəticəsində
94 mülki şəxsimiz həlak olmuş və onlara da şəhid
statusu verilmişdi. Düşmənin hədəf
aldığı Gəncə şəhərinin, Ağdam,
Ağcabədi, Bərdə, Füzuli, Goranboy, Tərtər
rayonlarının dinc sakinləri əzizlərini, evlərini
itirsələr də, ən ağır günlərində Vətən
uğrunda əzmkarlıq və birlik nümayiş etdirirdilər.
Şəhidlərimizin qisasının
döyüş meydanında alınmasını,
torpaqlarımızın işğaldan azad olunmasını,
illərdir Vətənin köksündə qövr edən bu
yaranın birdəfəlik sağalmasını istəyirdilər.
Dövlətimizin ərazi
bütövlüyü uğrunda şəhid olmuş igidlərimizin,
itkin düşən hərbçilərimizin, eləcə də
Ermənistan dövləti tərəfindən törədilən
insanlıq əleyhinə və müharibə cinayətləri
nəticəsində qətlə yetirilmiş mülki əhalimizin
hər birinin fotoları ilə edilən bu yürüş
xalqımızın birliyinin daimi və
sarsılmazlığının, Vətənə sevginin,
şəhidlərimizə ehtiramın əbədiliyinin nümayişi
idi.
Bu yürüş həm də
onu göstərirdi ki, Azərbaycan xalqının Vətən
uğrunda canını fəda etmiş hər igidinin yerinə
minlər gəlirlər. Şəhadət zirvəsinə ucalmış qəhrəmanlarımızın
cismani yoxluğu sıralarımızı əksiltmir ki,
artırır, onların yaratdığı örnək, Azərbaycana
sevgi nümunəsi bu Vətən üçün hər an mübarizəyə qalxan, fədakarlıq
göstərməyə hazır olan minlərlə igid
yetişdirir. Ötən il Anım
günü münasibətilə xalqa müraciətində Azərbaycan
Respublikasının Prezidenti dedi: "Biz Birinci Qarabağ
müharibəsindəki məğlubiyyətlə
barışmadıq, güc topladıq, bütün gücləri
səfərbər etdik, ordumuzu gücləndirdik, ölkə
iqtisadiyyatını gücləndirdik, ölkəmizin
nüfuzunu qaldırdıq və öz tarixi missiyamızı
şərəflə yerinə yetirdik. Biz
düşməni torpaqlarımızdan qovduq və ədaləti,
beynəlxalq hüququ bərpa etdik. Biz
milli ləyaqətimizi bərpa etdik. Bu
gün Azərbaycan xalqı müzəffər xalq kimi
yaşayır. Bu gün Azərbaycan
dövləti qalib dövlət kimi yaşayır. Biz
bundan sonra müzəffər xalq və qalib dövlət kimi əbədi
yaşayacağıq...
Bu Qələbəni bizə
bəxş edən qəhrəman əsgər və zabitlərimiz
bizim qürur mənbəyimizdir. Onların qəhrəmanlığı,
onların şücaəti, fədakarlığı artıq
dastana çevrilib".
44 günlük Vətən
müharibəsinin hər günü böyük bir tarix oldu!
İki fotonun hekayəsi
Ali Baş Komandan bir il
əvvəlki "Anım günü"
yürüşündə şəhid Adil Asəm oğlu
İbrahimlinin fotosu əks olunmuş plakatı aparırdı.
Müdafiə Nazirliyinin hərbi hissəsinin zabiti, baş
leytenant Adil İbrahimli 2020-ci il noyabrın
7-də Xocavənd rayonu ərazisində gedən hərbi əməliyyatlar
zamanı həlak olub. O, Şuşa istiqamətində
aparılmış döyüş əməliyyatlarında
xüsusi tapşırıqların yerinə yetirilməsində
şəxsi igidlik göstərib. Azərbaycan
Respublikasının Prezidenti İlham Əliyev Adil
İbrahimlini "Vətən Müharibəsi Qəhrəmanı"
adı, "Vətən uğrunda", "Kəlbəcərin
azad olunmasına görə", "Şuşanın azad
olunmasına görə", "Xocavəndin azad
olunmasına görə" medalları ilə təltif edib.
Birinci vitse-prezident Mehriban
xanım Əliyeva isə yürüşdə şəhid
Narin Teymur qızı Xalıqovanın fotosu əks olunmuş
plakatla irəliləyirdi. Narin Xalıqova 2019-cu il
dekabrın 17-də Gəncə şəhərində
doğulub. Ailənin tək övladı olan
Narin 5 illik həsrətin sonunda dünyaya göz
açmışdı. O, 2020-ci il oktyabrın 17-də
Ermənistan silahlı qüvvələrinin Gəncəni
raket atəşinə tutması nəticəsində anası
Sevil Əsgərova, həmçinin yaxın qohumları
Suliddin Əsgərov, Bəxtiyar Əsgərov, Nigar Əsgərova
ilə birlikdə həlak oldu. Nazirlər
Kabinetinin qərarına əsasən, Narinə də şəhid
statusu verildi.
Yan-yana irəliləyən
bu iki foto həm də ibrətamiz bir hekayəni nəql edirdi. Adil İbrahimli kimi igidlərimiz
Vətən müharibəsində ona görə
canlarını qurban verdilər ki, xalqımızın bir daha
körpə Narinlər, müharibədən əvvəl ermənilərin
bəşəri cinayətləri nəticəsində snayper
gülləsi ilə qətlə yetirilmiş Zəhralar,
Farizlər, Xocalıda öldürülən körpələr
kimi itkiləri olmasın. Fidan ömürlü
körpələrimizin ömrü yarıda
qırılmasın. Azğın
düşmən birdəfəlik məhv edilsin,
ölümsaçan zəhərli nəfəsini Azərbaycandan
çəksin. Bu yurdun körpələri,
gələcək nəsillərimiz əzəli-əbədi
yurdlarımızda xoşbəxt, qayğısız, sülh və
əmin-amanlıq içində böyüyüb həyatlarını
doya-doya yaşasınlar.
"Anım günü"
yürüşü həmin gün Ali Baş Komandanın təməlini
qoyduğu Vətən Müharibəsi Memorial Kompleksinin və
Zəfər Muzeyinin inşa olunacağı əraziyə qədər
davam etdi.
Birlik mənzərəsi
Vətən müharibəsində
qazandığımız qələbə həm də milli
birliyimizin qələbəsi oldu, bizi həyatımızdakı
30 illik natamamlıq kompleksindən qurtardı. İllərlə
ürəyimizdə gəzdirdiyimiz ağır yükdən
xilas olduq. Ömrümüzdəki
boşluq qələbə ruhu, nigaran yurdlarımıza
qovuşmağın vüsalı ilə doldu. Bu
müharibədə həyatlarını Azərbaycanın ərazi
bütövlüyü, haqq-ədalət uğrunda qurban vermiş şəhidlərimiz
milli ruhumuzu, qürurumuzu özümüzə qaytardı. Onların arasında Azərbaycanın bütün
bölgələrinin, ölkəmizdə yaşayan
xalqların nümayəndələrinin burada - şəhadət
zirvəsində təmsil olunduğunu görərik.
Milli yaddaşımızda qan qardaşı, insanların əhd
bağlaması kimi bir inanc var.
Nağıllarımızın, dastanlarımızın qəhrəmanları
bəzən bu ayini yerinə yetirərək həmişə
bir-birinə, ümumi ideallarına, addımladıqları
birgə yola sadiq qalacaqlarına and içər və andlarına
heç vaxt xilaf çıxmazdılar.Vətən müharibəsi
zamanı da müxtəlif ailələrdən, evlərdən,
obalardan olan şəhidlərimizin Azərbaycan torpaqlarına
qarışan qanları ilə bu xalq bir-birinə daha da
doğmalaşdı, birliyimiz möhkəmləndi, mətinləşdi.
"Anım günü"
yürüşündə ucalara qaldırılan şəhid
fotoları arasında müxtəlif xalqların təmsiçilərinin
şəkilləri vardı. Həmin gün şəhidlərimizin
əziz xatirəsi məscidlərdə olduğu kimi kilsələrdə,
sinaqoqlarda, məbədlərdə də anılırdı,
Tanrıya onların ruhuna müxtəlif dillərdə dualar
oxunurdu. Bölgəmizdə və
bütövlükdə dünyada əbədi sülhün bərqərar
olması arzusu dilə gətirilirdi. Bununla bir daha
göstərilirdi ki, Vətən müharibəsindəki qələbəmiz
kimliyindən asılı olmayaraq bu torpaqları özünə
doğma yurd bilən, dövlətçilik dəyərlərimizə
hörmət bəsləyən və Azərbaycanın
bütövlüyü, dəyərləri uğrunda
vuruşmağa hər an hazır olan, eyni zamanda əbədi
sülh istəyən, gələcək nəsillərin təhlükəsizliyini
təmin etməyə özünü mənən borclu bilən
bütün insanların zəfəridir. Ali
Baş Komandan İlham Əliyevin rəhbərliyi ilə Azərbaycan
Ordusu Vətən müharibəsində xalqımızın
belə bir milli qürur tarixini yazdı.
Vaxtilə işğal
altında olan, düşmən tərəfindən viran edilən
torpaqlarımızda indi yenidən həyat canlanır,
insanlarımız dogma yurdlara qayıdırlar. Bu gün azad
torpaqlarımızda üst-üstə hörülən hər
kərpic, əkilən hər ağac, yaradılan hər
abadlıq nişanəsi qanı bu torpaqlara
qarışmış igidlərimizin xatirəsinə bir abidədir,
onların əbədiyyət ömrünün rəmzləridir.
Azərbaycan xalqı şəhidlərini
heç zaman unutmayacaq, onlar qəlblərdə, yaddaşlarda,
xatirələrdə hər zaman nur çöhrələri,
sevgi, qürur, təbəssüm dolu baxışları ilə
əbədi qalacaqlar.
Müzəffər ordumuzun şəhidlərin canı-qanı bahasına bu gün yazdığı tarix davam edir. Reallıq göstərir ki, Azərbaycan müstəqillik dövründə dövlətçilik dəyərlərimizə bağlı, tarixi yaddaşı qoruyub saxlayan, vətənpərvər və əzmkar bir nəsil yetişdirib. Bu nəsil ölkəmizin milli maraqlarının pozulmasına heç zaman yol verməz. Haqqımız olanın əlimizdən alınması ilə barışmaz. Azərbaycan Prezidentinin yetişdirdiyi gənclik Vətən müharibəsində misilsiz qəhrəmanlıq, şücaət göstərərək dünyanı heyrətə gətirdi. Anım günü bizə həm də bu həqiqəti xatırladır.
İradə ƏLİYEVA
Azərbaycan.- 2022.- 27 sentyabr.- S.15.