Yurda sahiblik hissi ilə
Birinci Qarabağ
müharibəsinin şəhidi Sahib Qadaşov Qax şəhərində
1973-cü il avqustun
1-də sadə, zəhmətkeş bir ailədə
dünyaya göz
açmışdı. Məktəb yaşı çatanda atası Cuma Qadaşov onu şəhərdəki
rus məktəbinə
yazdırmışdı. Sahib 7-ci sinfə
kimi orada oxumuşdu.
Lakin futbola olan həvəsi onu rayondakı idman təmayüllü məktəbə gətirmişdi. 1991-ci ildə orta məktəbi bitirən Sahib hərbi komissarlığın xətti ilə Bişkek şəhərindəki hərbi məktəbə imtahan vermişdi. Lakin qəbul ola bilməyib rayona qayıtmışdı.
...Artıq erməni
faşistləri torpaqlarımıza təcavüz edirdilər.
Müharibə qığılcımları ətrafa
yayılırdı. Şuşada
özünümüdafiə batalyonları
yaradılmışdı. Malıbəyli hadisələri isə
Azərbaycanın vətənpərvər
oğullarının böyük hiddətinə
səbəb olmuşdu. Bu zaman on yeddi yaşı yenicə tamam olan Sahib də
cəbhəyə can atır.
Ailəsi nə qədər
etiraz etsə də, onu inadından
döndərə bilmir.
- Mən
Bakıda işləyirdim. Sahib mənim yanıma gəldi. Malıbəyli hadisələri hər
ikimizi hiddətləndirmişdi.
Ailələrimizə xəbər vermədən
Qarabağa yollandıq.
Şuşa özünümüdafiə batalyonuna yazıldıq.
Batalyonda
uşaqların əksəriyyəti
şuşalılar və
kərkicahanlılar idi.
Qaxdan mən, Sahib, Kamil və Etibar da bu batalyonda
döyüşürdük. İlk döyüşümüz
1992-ci il yanvarın 11-də Şuşa
ilə Xankəndi arasında yerləşən
Kərkicahan kəndi uğrunda oldu. Sahib elə bu
döyüşdə özünü
əsl cəngavər
kimi göstərdi. Baxmayaraq ki, hamımızdan kiçik idi. Hələ
18 yaşı tamam olmamışdı. Üç ay cəbhə yoldaşı
kimi bir yerdə döyüşdük.
Martın 31-də Kərkicahan
uğrunda ağır
döyüşlərin birində
Sahib şəhid oldu. Sahib bu müharibədə Qaxın
ilk şəhidi idi.
Onun ölümü batalyondakı
yoldaşlarını daha
da hiddətləndirdi.
Aprelin
2-də nəşini döyüş
bölgəsindən götürə
bildik. Çox təəssüf ki, Sahibi tez itirdik...
Onun döyüş yolu çoxları üçün
əsl hünər yolu oldu. Yaşasaydı, bəlkə Milli
Qəhrəmanlardan biri
olacaqdı. - Bu sözləri
Əmircan kənd sakini, Sahiblə birlikdə Qarabağa
yollanan Müşfiq Muxtarov söylədi.
Müşfiq Muxtarov,
Kamil Məmmədov və Etibar Muradov da Şuşa batalyonunda
döyüşən qaxlı
gənclər idi. Onlar Şuşanın işğalına - 1992-ci il mayın 8-nə kimi Şuşa özünümüdafiə batalyonunda
döyüşmüşlər.
Sahibin cəhbə
yoldaşı Kamil Məmmədov söyləyir
ki, Sahib çox
gənc idi. Biz ondan 1-2 yaş
böyük idik.
Hamımız cəbhəyə könüllü getmişdik,
Qarabağa - torpaqlarımızın
müdafiəsinə. Amma Sahibin qəlbindəki Vətən sevgisi, intiqam hissi bir
başqa idi. Mən düşünürdüm ki,
o, əsl qəhrəmandır.
Gözündə ölüm qorxusu
yox idi. Həmişə deyərdi:
"Erməni kimdir ki, bizə meydan
oxuyur. Onlara qan udduracam".
Biz bunu döyüş
zamanı görürdük.
Sahib Vətəni, milləti
üçün ölməyi
də bacaran oğullarımızdan idi.
Bu il
şəhidliyinin 30 ili
tamam olur. Şuşa özünümüdafiə batalyonunun
sağ qalan döyüşçüləri dostlarının xatirəsini
anmaq üçün
onun doğulduğu şəhərə - Qaxa
toplaşmışdılar. Nə az,
nə çox, düz 30 nəfər idilər. Sahibin ata ocağına
üz tutan batalyon üzvləri ən əvvəl Qax Şəhidlər xiyabanında Vətən uğrunda canından keçən qaxlı igidlərin, o cümlədən
Sahib Qadaşovun məzarını
ziyarət etdilər, ehtiramlarını bildirdilər.
Sonra Sahibgilin küçəsində Şuşa özünümüdafiə
batalyonunun üzvləri
ilə rayon ictimaiyyəti
birgə anım mərasimi keçirdilər.
Mərasimdə çıxış
edən Qax RİH başçısının müavini,
İctimai-siyasi və
humanitar məsələlər
şöbəsinin müdiri
Vəfa Heydərova, keçmiş batalyon üzvləri, əslən
kərkicahanlı Nazim
Mirzəyev, Mürvət
Əliyev (rota komandirinin müavini), Zaur Mirzəyev (Zaur bu gün
Zəngilanda ərazilərin
minadan təmizlənməsində
iştirak edir), Rasim Mirzəyev və qaxlı Müşfiq Muxtarov Sahib haqqında xatirələrini
danışdılar. Qeyd etdilər
ki, torpaq uğrunda şəhid olanlar heç vaxt unudulmur. İllər keçsə də, onların adları ehtiramla çəkiləcək.
Çünki bu gün torpaqlarımızın
işğaldan azad edilməsində hər bir şəhidin payı var. İstər Birinci Qarabağ, istərsə də 44 günlük Vətən müharibəsində şəhid
olan Azərbaycan oğulları ən böyük ehtirama, alqışa layiqdirlər.
Onlar Vətəni, milləti üçün
canlarından keçiblər.
Anım mərasimində şəhidimizin
anası Zərifə
Qadaşova ötən
illər ərzində
oğlunu yaddan çıxarmayan döyüş
dostlarına minnətdarlığını
bildirdi.
Zərifə ana ilə həmsöhbət
olduq. Öyrəndik ki, bu ailədə iki qız və iki oğul böyüyüb.
Sahib üçüncü
övlad olub. Zərifə xanım onu da dedi
ki, analar övladlarına fərq qoymaz. Amma övladlar fərqli
olurlar. Sahib də bir başqa idi. Onda hələ körpəliyindən
vardı Vətən sevgisi. Özünü dərk edəndən
ermənilərin "Qarabağ
sevdası" onu tamam dəyişmişdi.
Məktəbi bitirən kimi
getmişdi hərbi komissarlığa ki, onu əsgər aparsınlar. Elə bil
nəyə isə tələsirdi. Dəfələrlə müraciət etsə də, onu hərbi
xidmətə aparmadılar.
Bizdən xəlvət getmişdi
Qarabağa. Hərbi
komissarlıqdan çağırış
vərəqi alanda
Sahib artıq cəbhədə idi. Oğul itirmək ağır dərddir. Lakin onun Vətən
uğrunda şəhid
olması təsəllimiz
olub. Bəlkə elə bu təsəllidir məni yaşadan. Bu günə kimi kimsənin qapısını
döyməmişəm. Sağ olsun dövlətimiz, Prezidentimiz.
Bilirəm ki, tək mənim oğlum deyil, bütün şəhid oğullarımız
həmişə ehtiramla
yad olunacaqlar.
Xavər ƏFƏNDİYEVA,
Qax rayonunda
çıxan "Şəlalə" qəzetinin
redaktoru
Azərbaycan.- 2022.- 27 sentyabr.- S.17.