Naftalan: “Expo 2020 Dubai” beynəlxalq sərgisində

“Expo 2020 Dubai” beynəlxalq sərgisində Azərbaycanın sağlamlıq turizminin mərkəzi sayılan və öz təbii müalicəvi nefti ilə dünyada məşhur olan Naftalan da yer alıb.

Beynəlxalq sərgidə Naftalanı təmsil edən “Garabagh Resort & Spa”, “Chinar Hotel & SPA Naftalan”, “Gashalti Health Hotel Naftalan” hotellərinin stendləri və digər vəsaitləri “Azərbaycan” pavilyonunda, Dayanıqlı İnkişaf tematik zonasında yerləşdirilib. Dünyanın müxtəlif ölkələrindən gələn ziyarətçilər ilk dəfə naftalan neftinin nə olduğunu öyrənib və əyani olaraq onun müalicəvi effektivliyindən şəxsən əmin olublar.

Ziyarətçilərə naftalan neftinin müalicəvi xüsusiyyətlərindən, onun təbii komponentlərinin unikallığından danışılıb. Oynaq, dayaq hərəkət sistemi, dermatoloji, uroloji və digər 70-dən artıq xəstəliyin Naftalan nefti ilə müalicəsinin mümkünlüyü xüsusi vurğulanıb.

Ziyarətçilərə Naftalan şəhərində müasir, dünya standartlarına cavab verən avadanlıqlarla təchiz edilmiş turizm sağlamlıq mərkəzlərində şəfaverici neftilə müalicə prosedurlarından keçə biləcəkləri bildirilib.

S.ƏLİYEV

Azərbaycan.- 2022.-15 yanvar.- S.6.