Azərbaycan haqlı mübarizəsini bir an belə dayandırmır

Ordumuz tərəfindən hakim yüksəkliklərin və yolların nəzarətə götürülməsinin mühüm hərbi-siyasi əhəmiyyəti var

Bir neçə gün əvvəl Laçın rayonunun Cağazur və Zabux kəndləri arasında yerləşən bir neçə hakim yüksəklik, əsas və yardımçı yollar, eləcə də sərhədboyu geniş sahələr nəzarətimizə götürülüb. Bundan öncə isə Azərbaycan Ordusunun bölmələri tərəfindən ermənilərin qeyri-qanuni fəaliyyətlərinin qarşısını almaq üçün Laçın yolunun şimalında lokal nəzarət tədbirləri həyata keçirilib. Ordumuz tərəfindən yüksək peşəkarlıqla həyata keçirilən bu əməliyyatlardan sonra Laçın-Xankəndi yoluna nəzarət imkanları genişlənib.

Bununla bağlı Milli Məclisin deputatlarının fikirlərini öyrəndik. Deputatların sözlərinə görə, son əməliyyat tədbirləri Azərbaycanın öz məqsədlərinə çatmaq üçün mübarizəsini bir an belə dayandırmadığını sübut edir.

Azərbaycan zəfərini davam etdirir

Milli Məclisin İnsan hüquqları komitəsinin sədri Zahid Oruc deyib ki, Azərbaycan Vətən müharibəsindən sonra əraziləri üzərində suveren və konstitusion hüquqlarını bərpa etməyə yönəlmiş tədbirlərini bir an belə dayandırmayıb: "Burada söhbət təkcə diplomatik siyasi məkanda aktivlikdən getmir, dövlətimiz azad olunmuş ərazilərin hər bir strateji nöqtəsində möhkəmlənmək üçün işləri dayandırmır, əlavə mövqelər qazanmaq, orada tank, top, texnika və texnologiya, müxtəlif avadanlıqlar, qurğu və insan resurslarını yerləşdirir. Yəni məsələ yalnız hərbi tədbirlərin reallaşdırılması ilə məhdudlaşmır. Düşünürəm ki, bu mənada düşmənin, özünü separatçı rejimin xarici siyasətinə məsul adam kimi təqdim edən Roman Babayan adlı şəxsin mövqeyini xatırlatmaq yerinə düşər. O deyir ki, Azərbaycan Prezidenti İlham Əliyevin postmüharibə dövründə həyata keçirdiyi iqtisadi, ekoloji, aqrar, yol və infrastruktur layihələrinin hər biri müharibənin tərkib hissəsidir. Doğrudan da, burada doğruluq payı var, o mənada ki, Azərbaycan hələ də mübarizəsini dayandırmayıb".

Komitə sədrinin sözlərinə görə, biz dinc erməniləri Xankəndidə girov kimi saxlayan, sadə xalqa təhlükə yaradan dünya erməniçiliyinin qarşısını almağa davam edirik. Reallaşdırdığımız və planlaşdırdığımız bütün tədbirlər, hərbi əməliyyatlar Azərbaycan ərazisində yaşayan dinc ermənilərin əleyhinə deyil, lehinə hesablanıb.

"Laçın rayonunun Cağazur və Zabux kəndləri arasında yerləşən bir neçə hakim yüksəkliyin, əsas və yardımçı yolların, eləcə də sərhədboyu geniş sahələrin nəzarətimizə keçməsi mühüm hərbi-siyasi nəticələr doğurur. Bu o deməkdir ki, Azərbaycan Vətən müharibəsindəki zəfərin nəticələrini sadəcə mexaniki olaraq qəbul etməyib. Bu zəfərin davamı gəlir, hər addımımızda Ali Baş Komandan İlham Əliyevin strateji iradəsi güclü formada təqdim olunur. Həyata keçirilən tədbirlər müharibənin dinc davamıdır. Həmin 44 gün yalnız gerçək baş vermiş hərbi toqquşmaların zaman müddətidir. Yəni əslində ötən 2,5 ildə mübarizəsiz günümüz olmayıb. Diplomatik, siyasi-iqtisadi, informativ, mədəni-mənəvi, sosial, ekoloji və digər müstəvilərdə müharibə hələ də davam etdirilir", - deyə komitə sədri vurğulayıb.

Zahid Oruc qeyd edib ki, Azərbaycanın həyata keçirdiyi əməliyyat tədbirləri təkcə regional deyil, qlobal faydalarını da göstərir. Avropada çirkli pulların dövriyyəsinə səbəb olan erməni separatizmi ilə ciddi mübarizə aparılır, aylardır ki, Laçın-Xankəndi yolunda ekoaksiya keçirilir. Azərbaycan müəyyən tədbirlər həyata keçirməklə güclü strateji mövqeyini ortaya qoyur. Hayastanla sərhəddə yeni mövqelər qazanır, həmçinin Hayastanın daxilindəki hərbi proseslərə nəzarət imkanı əldə edir. Bütün bunlar Azərbaycanın sülh danışıqlarındakı mövqeyini gücləndirdiyi halda, düşmənin mövqelərini hər keçən gün daha da zəiflədir".

Komitə sədri vurğulayıb ki, Azərbaycan yaxın gələcəkdə bütün coğrafiyası üzərində hüquqlarını bərqərar edəcək: "Son əməliyyatlar da bu mənada ümidlərimizi artırır. Hesab edirəm ki, uğurlu əməliyyat tədbirləri nəticəsində Zəngəzur dəhlizinin açılması ilə bağlı da yeni imkanlar yaranır. Bu da faktiki olaraq onu deməyə əsas verir ki, biz artıq yekun əməliyyatlar mərhələsindəyik. Laçın yolunun sonunda nəzarət-buraxılış məntəqəsinin açılması artıq qaçılmazdır. Ermənilər də gec-tez başa düşəcəklər ki, Azərbaycan Ordusunu nümayəndələri ilə əhatələnmək mühasirəyə alınmaq deyil, əksinə, Azərbaycan əsgəri elə ən etibarlı təhlükəsizlik sipəridir".

Hayastan müxtəlif bəhanələrlə münasibətlərin normallaşdırılmasından yayınır

Milli Məclisin deputatı Tural Gəncəliyev bildirib ki, yeni Laçın yolunun istifadəyə verilməsi ilə bağlı bir neçə hakim yüksəkliyin, əsas və yardımçı yolların nəzarətimizə keçməsi əhəmiyyətli hadisədir: "Azərbaycan Ordusunun Laçın yolu yaxınlığında son mövqe dəyişikliyi Hayastanda böyük səs-küylə qarşılanıb. Ümumiyyətlə, ordumuzun suveren ərazilərimizdə mövqelərini dəyişdirməsi ilə bağlı erməni təbliğat maşınında, KİV-də yer alan ajiotaj anlaşılan deyil. Azərbaycanın beynəlxalq şəkildə tanınmış sərhədləri çərçivəsində mövqe dəyişikliyi Hayastanı niyə bu qədər narahat edir?! Buradan yalnız bir nəticə hasil olur ki, Hayastan Azərbaycanın ərazi bütövlüyünü tanımaqdan imtina edir, suveren ərazilərimizdə hər-hansısa addım atmağımızı qəbul edə bilmir. İkincisi isə, bu, bir daha göstərir ki, rəsmi İrəvan yekun sülh sazişinin imzalanmasında və münasibətlərin normallaşmasında hələ də maraqlı deyil. İndi Hayastan Azərbaycan Ordusunun öz ərazilərindəki yüksəklikləri nəzarətinə götürməsinə qıcıqlanır".

Deputatın sözlərinə görə, Azərbaycan 44 günlük Vətən müharibəsində torpaqlarını işğaldan azad etdikdən sonra hələ də həll olunmayan məsələlərin məhz diplomatiya yolu ilə tənzimlənməsi ilə bağlı sülh sazişi layihəsini Hayastana təqdim edib. Əgər rəsmi İrəvan da postmüharibə dövründə normallaşma prosesində maraqlı olsaydı, təkliflərimizə konstruktiv şəkildə cavab verər, "e-mail diplomatiyası" yürütməzdi. Açıq-aydın ortadadır ki, Hayastan müxtəlif bəhanələr altında münasibətlərin normallaşmasını ləngidir, sülh müqaviləsini imzalamaqdan hər vəchlə boyun qaçırır. Bunun nəticəsidir ki, Azərbaycan Ordusunun mövqe dəyişikliyinə, yüksəklikləri nəzarətə götürməsinə görə səs-küy salır. Ordumuz tərəfindən həyata keçirilən bütün uğurlu əməliyyatlar isə bizim gücümüzün göstəricisidir.

"Hayastan əsas məqsədindən imtina edə bilmir, davamlı olaraq "qurban" rolunu oynayır, dünya ictimaiyyətinə guya "Azərbaycanın təcavüzünə məruz qalmış Ermənistan" imicini təlqin edir. Bütün bunların reallaşmasında isə erməni diasporu və Aİ-nin Hayastandakı missiyası ciddi rol oynayır. Təsadüfi deyil ki, Hayastanın son zamanlar atdığı bütün addımlar onların sülhə maraqlı olmadıqlarını, yalnız revanşizm duyğuları ilə yaşadıqlarını, ölkəmizə qarşı yeni ərazi iddialarının, yeni təxribat planlarının olduğunu göstərir", - deyə T.Gəncəliyev qeyd edib.

Deputat deyib ki, rəsmi İrəvan Azərbaycan Ordusunun suveren ərazilərində yerdəyişməsini səs-küylə qarşılamaq əvəzinə, qanunsuz hərbi dəstələrini, silahlı qurdurlarını Qarabağdan çıxarmaq öhdəliyini yerinə yetirməlidir.

Nəzrin QARDAŞXANOVA,

Azərbaycan.- 2023.-1 aprel.- S.5.