Daha bir erməni vandallığı

Hayastanda keçirilən Avropa çempionatının açılış mərasimində Azərbaycan Bayrağının yandırılması bu ölkənin təxribatçı simasının əyani təzahürüdür

2015-ci ildə Bakıda keçirilən I Avropa Oyunlarında Prezident İlham Əliyevin Ukraynanı təmsil edən gümüş medal qazanmış erməniəsilli boksçunu şəxsən özünün təltif etməsi və o zaman auditoriyanı sakitləşdirməsi yaddaşlara xoş xatirə, eləcə də Azərbaycan tolerantlığına bariz nümunə kimi həkk olunan unudulmaz tarixdir.

Amma bunun qarşılığında 2023-cü il aprelin 14-də Hayastanda keçirilən ağır atletika üzrə Avropa çempionatının açılış mərasimində dünyanın gözü qarşısında Azərbaycanın Dövlət Bayrağı yandırıldı.

Beynəlxalq idman yarışları idmançıların öz performanslarını dünya səviyyəli arenalarda sərgiləmələri üçün təşkil olunur, həm də bu yarışların keçirilməsi dünyada barışı, sülhü, dostluğu simvolizə edir. Və yuxarıda misal çəkdiyimiz beynəlxalq idman yarışlarında baş verən bir-birinə zidd iki nümunənin timsalında da açıq-aydın görünür ki, Azərbaycan hər zaman sülhün, barışın, Hayastan isə müharibənin, təxribatların tərəfdarıdır.

Hayastanın ölkəmizə qarşı təxribatları intensivləşib

İrəvan şəhərində sözügedən yarışın açılış mərasimində Azərbaycan Bayrağının rəsmi akkreditasiya olunmuş şəxs tərəfindən nümayişkaranə şəkildə yandırılması ilə bağlı Gənclər və İdman Nazirliyi və Milli Olimpiya Komitəsi birgə bəyanat yayıb.

Bəyanatda deyilir ki, Ermənistanın baş nazirinin iştirak etdiyi mərasimdə belə bir barbarlıq əməlinin törədilməsi və bunun Ermənistan ictimaiyyəti tərəfindən alqışlanması, həmin əməli törədən şəxsin qəhrəman kimi qələmə verilməsi bu ölkədə etnik nifrətin, rasizmin, ksenofobiyanın, Azərbaycanofobiyanın bariz nümunəsi olmaqla yanaşı, həm də xalqlar arasında sülhü, qarşılıqlı anlaşmanı təbliğ edən idmanın nəcib məqsəd və prinsipləri ilə tam ziddiyyət təşkil edir. İdmanın siyasiləşdirilməsi qətiyyən yolverilməzdir.

Əlbəttə ki, Ermənistanda belə bir nifrət mühitinin hökm sürdüyü, təhlükəsizliyin təmin edilmədiyi bir şəraitdə psixoloji təzyiqlərə görə Azərbaycan idmançılarının yarışlarda normal şəkildə iştirakı mümkünsüzdür. Bütün bunlar nəzərə alınaraq, Azərbaycan idmançılarının vətənə qayıtması barədə qərar qəbul edilib. Ermənistan onların təhlükəsiz şəkildə qayıtmasını təmin etməlidir. Bəyanatda deyilir: "Biz beynəlxalq ictimaiyyəti, beynəlxalq idman təsisatlarını bu barbarlıq əməlini kəskin şəkildə pisləməyə çağırırıq. Biz həm də Avropa Ağır Atletika Federasiyasını Ermənistana qarşı sanksiya tətbiq etməyə çağırırıq. Hesab edirik ki, baş vermiş bu hadisə Ermənistanın beynəlxalq idman yarışlarını keçirmək, idmançıların təhlükəsizliyini təmin etmək iqtidarında olmadığını göstərir".

Ümumiyyətlə, son dövrlər Hayastanın ölkəmizə qarşı açıq təxribatları intensivləşib. Elə aprelin 11-də hayların Azərbaycana qarşı törətdikləri növbəti təxribat da bölgədə vəziyyəti gərginləşdirmək, barışığa mane olmaq üçün həyata keçirilən daha bir məkrli plan idi. Amma həmin gün hərbi qulluqçularımızın sayıqlığı nəticəsində düşmən təxribatının qarşısı qətiyyətlə alındı, atəş mövqeləri susduruldu.

Vətən müharibəsindən sonra müxtəlif təxribatçı əməllərlə sülh müqaviləsini bağlamaqdan yayınmağa cəhd edən və 10 noyabr üçtərəfli Bəyanatı ilə üzərinə götürdüyü öhdəliklərini yerinə yetirməkdən boyun qaçıran Hayastan Laçın-Xankəndi yolundan təyinatına uyğun olmayaraq hərbi məqsədlər və ölkəmizə qarşı təxribat əməlləri törətmək üçün istifadə edib. Ötən il dekabrın 12-dən etibarən Laçın yolunda ekoaksiya keçirən vətəndaş cəmiyyətimizin üzvlərinin tələbləri arasında bu yoldan yalnız humanitar məqsədlərlə istifadə edilməsi də var. Hayastan tərəfinin beynəlxalq ictimaiyyəti çaşdırıcı vay-şüvənlərinin əksinə, sözügedən yoldan mülki maşınların keçidi üçün heç bir əngəl yoxdur. Hətta aksiya iştirakçılarına yaxınlaşaraq onlardan kömək istəyən bir erməniəsilli şəxsə kömək göstərilməsi ilə bağlı videogörüntülər də hər kəsin yaddaşındadır. Aprelin 4-də isə azərbaycanlı həkimlər Xankəndi-Laçın yolunda Qarabağda yaşayan erməniəsilli vətəndaşlara tibbi yardım göstərərək həyatlarını xilas etdilər və onlarla bərabər Xankəndiyə yollanaraq oradakı xəstəxanamızda da həkimlik missiyalarını layiqincə yerinə yetirdilər.

O da vurğulanası məqamdır ki, Azərbaycanda yaşayan erməni sakinlərin cəmiyyətimizə reinteqrasiya prosesi ilə bağlı rəsmi Bakı əməli fəaliyyət göstərir, bu məsələdə qərarlı olduğunu göstərir.

Haylar beynəlxalq idman yarışlarını da məkrli siyasətlərinin alətinə çeviriblər

Lakin müharibənin qalib tərəfi olmasına baxmayaraq, Azərbaycanın rəsmi İrəvana təkmil sülh modeli təklif etməsinə, iki ölkə arasında normallaşmaya nail olunması üçün atdığı və bəzi örnəklərini misal çəkdiyimiz humanizm addımlarına baxmayaraq, Hayastan beynəlxalq havadarlarına güvənərək ölkəmizə qarşı təxribatçı mövqeyindən əl çəkmir.

Bir neçə gün əvvəl Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan Ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülüb.

Erməni mediasında yayılmış videogörüntülərdə əsir götürülmüş Axundov Hüseyn Əhliman oğluna qarşı fiziki işgəncə və qeyri-insani rəftar halları əks olunub. Hayların etnik zəmində azərbaycanlılara qarşı törətdikləri növbəti zorakılıq faktını özündə əks etdirən bu görüntülərdən də aydın olur ki, ermənilər əsgərimizi möhkəm döyərək ona fiziki işgəncə veriblər.

Hayların əsir əsgərimizə qarşı törətdikləri bu cinayət əməlləri beynəlxalq hüquqa ziddir və bir daha təkzibolunmaz şəkildə təsdiqləyir ki, ermənilər xalqımıza qarşı vəhşiliklərini davam etdirirlər.

Aprelin 14-də İrəvanda Azərbaycanın Dövlət Bayrağını yandırmaları da onu göstərdi ki, Hayastan hətta beynəlxalq idman yarışlarını da məkrli siyasətinin alətinə çevirib.

Yasəmən MUSAYEVA

Azərbaycan.- 2023.-16 aprel.- S.1; 5.