Ermənistan yeni müharibəyə hazırlaşır?

Məğlub ölkə hərbi-siyasi təxribatlarından, məkrli oyunlarından əl çəkmək istəmir

Ermənistanın son bir aydakı hərbi-siyasi təxribatları göstərir ki, məğlub ölkə sülh müqaviləsi bağlamaqda qətiyyən maraqlı deyil. Sözdə Azərbaycanın ərazi bütövlüyünü rəsmən tanıdığını bəyan edən Ermənistan rəhbərliyinin əməldəki oyunları bunu bir daha təsdiqləyir.

BMT Təhlükəsizlik Şurasındakı biabırçı məğlubiyyətdən sonra ölkə ictimaiyyəti qarşısına çıxmağa üzü olmayan İrəvan rəsmiləri yenə də köhnə variantlara əl atırlar. Qarabağ və Şərqi Zəngəzurda hərbi təxribatlar törətməklə, sadəcə, diqqəti yayındırmağa çalışan rəsmi İrəvan bunu vəziyyətdən çıxış yolu kimi görür. Xalqı aldatmağa çalışanlar iddia edirlər ki, guya, Qarabağdakı separatçılara dəstək verməyin səbəbi yeni müharibəyə hazırlıqdır. Erməni xalqı isə yaxşı anlayır ki, İkinci Qarabağ müharibəsi dövründə olduğu kimi, bu gün də Ermənistanın Azərbaycan Ordusu qarşısına çıxara biləcək hansısa güclü qüvvəsi yoxdur. Sadəcə olaraq, Ermənistan yenə də havadarlarına "güvənərək" Azərbaycanı qıcıqlandırmağa çalışır. Demək olar ki, hər gün Qarabağ və Şərqi Zəngəzur istiqamətində mövqelərimiz atəşə tutulur və ya hansısa təxribatlar törədilir.

Son günlər ərzində separatçıların "fəaliyyəti"nə diqqət etsək, görərik ki, haylar ya Azərbaycan ərazisində müvəqqəti yerləşən Rusiya sülhməramlı kontingentinin müşayiəti ilə müxtəlif ərazilərə silah-sursat daşıyır, ya ordumuzun mövqeləri qarşısında fortifikasiya qurğuları quraşdırmağa cəhd göstərir, ya da mövqelərimizi atəşə tuturlar.

Təkcə son 3 gündə Azərbaycan Müdafiə Nazirliyinin yaydığı rəsmi məlumatlar əsasında separatçıların təxribatlarına nəzər yetirək.

Avqustun 21-i saat 07:05-dən 07:20-dək Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri ordumuzun Xocalı rayonu istiqamətində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Ordumuzun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb. Bundan başqa, səhər saatlarında Ermənistan silahlı qüvvələrinin bölmələri Basarkeçər rayonunun Yuxarı Şorca və Yuxarı Zağalı yaşayış məntəqələri istiqamətlərində yerləşən mövqelərindən ordumuzun Kəlbəcər rayonunun Zəylik və Bəzirxana yaşayış məntəqələri istiqamətlərində yerləşən mövqelərini müxtəlif çaplı atıcı silahlardan atəşə tutublar. Bölmələrimiz tərəfindən qeyd olunan istiqamətlərdə cavab tədbirləri görülüb.

Həmin gün Ermənistan tərəfindən mülki aviasiya vasitələrimizə yenidən radiomaneələr tətbiq olunub. Nazirliyin yaydığı məlumatda qeyd edilir ki, Azərbaycanın hava məkanından istifadə etməklə uçuşlar yerinə yetirən yerli və xarici aviaşirkətlərinin sərnişin təyyarələrinin GPS peyk naviqasiya sistemlərinə qarşı Rusiya sülhməramlı kontingentinin müvəqqəti yerləşdiyi ərazilərimizdəki qeyri-qanuni erməni silahlı dəstələri tərəfindən radiomaneələrin tətbiqi yenidən intensivləşib. Hava məkanımızdan keçən uçuşların təhlükəsizliyinə təhdid yaratmaq məqsədilə qanunsuz silahlı birləşmələr növbəti təxribata əl atıblar. Belə ki, avqustun 21-i saat 10:15-dən 10:23-dək Füzuli-Bakı marşrutu üzrə uçuş yerinə yetirən Azərbaycan Hava Yollarının ATR-45 tipli sərnişin təyyarəsinə radiomaneələrin tətbiqi nəticəsində GPS peyk naviqasiya sistemlərində fasilə yaranmışdı. Müdafiə Nazirliyi tərəfindən faktla bağlı Rusiya sülhməramlı kontingentinin komandanlığı məlumatlandırılsa da, heç bir tədbir görülməyib.

Qeyd edək ki, mülki aviasiyanın təhlükəsizliyinə radiotexniki müdaxilə qəbuledilməzdir və Beynəlxalq Mülki Aviasiya Təşkilatının müəyyən etdiyi qaydalara ziddir.

Avqustun 21-i saat 10:25-dən 10:30-dək Kəlbəcər rayonunun Yellicə yaşayış məntəqəsi istiqamətində yerləşən mövqelərimiz atıcı silahlardan atəşə tutulub. Hərbçilərimiz tərəfindən cavab tədbirləri görülüb. Axşan saat 19:45 radələrində erməni silahlı dəstələrinin ordumuzun Şuşa rayonu istiqamətində yerləşən mövqeləri ilə üzbəüz mövqelərini gücləndirmək məqsədilə "Ural" markalı hərbi nəqliyyat vasitəsində yerdəyişmə fəaliyyəti müşahidə edilib. Bölmələrimizin sayıqlığı nəticəsində qeyd olunan istiqamətdə qəti tədbirlər görülüb, yerdəyişmənin qarşısı alınıb.

Həmin gün axşam saat 22:50-dən avqustun 22-si saat 02:05-dək Dəvəli rayonunun Birəli, Qarakilsə rayonunun Saybalı yaşayış məntəqələri istiqamətlərində yerləşən mövqelərindən Naxçıvan Muxtar Respublikasının Sədərək rayonunun Qaraağac və Laçın rayonunun Minkənd yaşayış məntəqələri istiqamətlərində yerləşən mövqelərimiz müxtəlif çaplı atıcı silahlardan fasilələrlə atəşə tutulub. Bundan başqa, avqustun 22-si saat 06:15-dən 07:20-dək qeyri-qanuni erməni silahlı dəstələri Azərbaycan Ordusunun Tərtər, Xocalı və Ağdam rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstərsələr də, ordumuzun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.

Nazirliyin digər məlumatında qeyd edilir ki, Rusiya sülhməramlı kontingentinin müvəqqəti yerləşdiyi ərazilərimizdə qeyri-qanuni erməni silahlı dəstələri ordumuzun bölmələrinə qarşı terror-təxribat fəaliyyətlərini həyata keçirmək məqsədilə Qarabağ iqtisadi rayonunda təminat yolları və döyüş mövqelərimizə yaxın ərazilərdə texniki müşahidə və dinləmə vasitələri quraşdırıb. Hərbi qulluqçularımızın təhlükəsizliyinin təmin edilməsi məqsədilə görülən tədbirlər nəticəsində qeyri-qanuni erməni silahlı dəstələrinə məxsus 30-dək texniki müşahidə və dinləmə vasitəsi sıradan çıxarılıb.

Avqustun 22-də Ermənistan tərəfinin törətdiyi təxribat zamanı Azərbaycan Ordusunun hərbi qulluqçusu yüngül yaralanıb. Yaralı hərbi qulluqçumuza dərhal ilkin tibbi yardım göstərilib və o, hərbi tibb müəssisəsinə təxliyə edilib.

Avqustun 22-də ordumuzun Kəlbəcər rayonunun Yellicə və Gədəbəy rayonunun Daryurd yaşayış məntəqələri istiqamətlərində yerləşən mövqeləri atıcı silahlardan fasilələrlə atəşə tutulub. Həmin gün separatçılar Xocalı rayonu istiqamətində yerləşən mövqelərimizin qarşısında uzunmüddətli fortifikasiya qurğularını quraşdırmağa cəhd göstəriblər. Ordumuzun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.

Avqustun 23-ü saat 02:10 radələrində Kəlbəcər rayonunun Zəylik yaşayış məntəqəsi istiqamətində yerləşən mövqelərimiz atıcı silahlardan atəşə tutulub. Hərbçilərimiz tərəfindən qeyd olunan istiqamətdə cavab tədbirləri görülüb.

Bütün bu faktlar bir daha təsdiqləyir ki, düşmən öz xislətindən əl çəkmir. Lakin Ermənistan rəhbərliyi unudur ki, bu çirkinlikləri ilə heç nəyə nail ola bilməyəcək. Əslində, rəsmi İrəvana bəllidir ki, Azərbaycanla yenidən müharibəyə cəhd göstərsə, aqibəti yaxşı olmayacaq. Lakin sülh müqaviləsinin imzalanmasından yayınmaq üçün təxribatlar törətməyə məcburdurlar. Düşmən anlamalıdır ki, bunun da sonu olmalıdır.

Müzəffər Ali Baş Komandan İlham Əliyev bu barədə onlara öz mesajını göndərib.

Revanşistlər unutmamalıdırlar ki, bu gün Azərbaycan Bayrağı Ağdamda, Füzulidə, Cəbrayılda, Qubadlıda, Zəngilanda, Kəlbəcərdə, Laçında, Şuşada, Hadrutda, Talışda, Suqovuşanda və neçə-neçə yüzlərlə kənddə dalğalanır. O bayrağa uzaqdan baxmağa da qorxurlar. Bir gün gözlərini açıb Azərbaycan Bayrağını öz başları üzərində görə bilərlər. Qarabağın erməni əhalisinin isə iki seçimi var - ya Azərbaycan Bayrağı altında yaşamalı, ya da ki çıxıb getməlidirlər.

Ali Baş Komandanın bu fikri, əlbəttə ki, İrəvana, revanşistlərə ciddi xəbərdarlıqdır. Həm Hayastan rəhbərliyi, həm də erməni xalqı yaxşı bilir ki, İlham Əliyev söz dedisə, gec-tez onu reallaşdırır. Sözü imzası qədər keçərli olan qalib Sərkərdə müharibədən öncə nə demişdisə, onların hamısını gerçəkləşdirdi. İndi isə İlham Əliyev deyir ki, bir gün haylar gözlərini açıb başları üzərində Azərbaycan Bayrağının dalğalanacağını görəcəklər. Bundan sonra ermənilərin özləri də etiraf etdilər ki, İlham Əliyevin bu fikirləri çox keçməz Hayastan KİV-inin manşet xəbərlərinə çevrilər.

Rəşad BAXŞƏLİYEV

Azərbaycan.- 2023.- 24 avqust.- S.9.