Otuz bir il əvvəl şəhid olan Məhərrəm Abbasov torpağa tapşırılıb

Otuz bir il əvvəl Şuşada - Daşaltı uğrunda gedən döyüşlərdə şəhid olan Məhərrəm Abbasov paytaxtın Nizami rayonunun Keşlə qəsəbəsində Şəhidlər xiyabanında torpağa tapşırılıb.

AZƏRTAC xəbər verir ki, dəfn mərasimində şəhidin ailə üzvləri, yaxınları ilə yanaşı, hökumət, Müdafiə Nazirliyi və Nizami rayon ictimaiyyətinin nümayəndələri, o cümlədən döyüş yoldaşları, rayon sakinləri, qazilər, media nümayəndələri iştirak ediblər.

Şəhid Məhərrəm Abbasov əsgəri ənənələrə uyğun olaraq yaylım atəşi və Azərbaycan Respublikasının Dövlət Himninin sədaları altında torpağa tapşırılıb.

Dəfn mərasimində şəhidlərimizin ruhuna dualar oxunub, xalqımıza və dövlətimizə sülh və əmin-amanlıq arzulanıb, şəhidin məzarına tər güllər düzülüb, əklil qoyulub.

Şəhidin nəşinin büküldüyü üçrəngli bayraq oğlu İlkin Abbasova təqdim olunub.

Atamı son dəfə görəndə 5 yaşım var idi...

Şəhidin övladı İlkin Abbasov jurnalistlərə müsahibəsində otuz bir ildir atasının qəbrini ziyarət etmək üçün məzarının olmamasının onlar üçün çox ağır olduğunu deyib: “Atamı son dəfə görəndə 5 yaşım var idi. Şəhid olduğunu bilirdik. Onun yoxluğu bizim üçün nə qədər acı olsa da, sarılıb ağlayacaq, dərdimizi bölüşəcək məzarının olmaması idi. Çox şükür ki, nəşinin qalıqları tapıldı və biz onu qəhrəman kimi dəfn edə bildik. Onun nəşinin qalıqlarının tapıldığını eşidəndə çox sevindik. Vətən müharibəsində əldə edilən Qələbə, şəhidlərimizin, qazilərimizin göstərdikləri qəhrəmanlıq sayəsində inanıram ki, atam Məhərrəm Abbasov kimi ərazi bütövlüyümüz uğrunda canından keçən igidlərin ruhu şaddır. Allah bütün şəhidlərimizə rəhmət eləsin. Qazilərimizə cansağlığı, Ordumuzun hərbi qulluqçularına güc-qüvvət arzulayıram”.

Mən bu dünyada ad qoymadan getməyəcəyəm...

Şəhidlə bağlı xatirələrini bölüşən qardaşı Azad Abbasov deyib: “Məhərrəm məndən iki yaş böyük olsa da, onunla dost kimi idik. Bilmirəm, təsadüfdür ya qismət, onun doğum tarixi fevralın 26-na, şəhadət tarixi isə yanvarın 26-na təsadüf etdi. Özündən sonra elə bir ad qoydu ki, uzun illər danışılacaq. Əsasən Şuşa, Malıbəyli, Quşçular istiqamətində döyüşlərdə çox qəhrəmanlıqlar nümayiş etdirib. Yaralananda üstündə olan əşyaları, saatını, hərbi biletini, övladlarının şəklini yaxın dostuna verib və bunları oğluna çatdırmağı vəsiyyət edib. O da gətirib vermişdi. Ayağındakı yarası o qədər ağır imiş ki, Daşaltıdan Şuşaya çıxmağı mümkünsüz imiş. Məhərrəm daxil yeddi yaralı döyüşçü Daşaltıda qalmışdı. Daşaltıda yeddi nəfərin nəşinin qalıqlarının tapıldığını eşidəndə onlardan birinin Məhərrəm olduğunu yəqin etdik. Bilmirik sevinək, ya kədərlənək, hisslərimiz çox qarışıqdır. Bircə onu bilirəm ki, Məhərrəm kimi qəhrəmanların ruhu uzun illərdən sonra sakitlik tapıb. Onun ruhu azad Şuşanın səmasında dolanır. Arzulayıram ki, bütün itkinlər tapılsın və doğmalarının gözləri yollarda qalmasın”.

Məhərrəm əsir düşməmək üçün özünü güllələyib

Şəhidin döyüş yoldaşı Sərxan Mehdiyev Məhərrəmlə tanışlığının ordumuzun yeni formalaşdığı dövrlərə - 1991-ci ilin noyabrına təsadüf etdiyini deyib. O, Məhərrəmi vətənpərvər, döyüşkən, qəhrəman, mərd, cəsarətli döyüşçü kimi xatırladığını diqqətə çatdırıb: “Onunla eyni istiqamətdə döyüşmüşəm. Son görüşümüz 1992-ci il yanvarın 25-də oldu. Bu dəfə hər birimiz müxtəlif istiqamətlərdə Daşaltı əməliyyatına göndərildik. Bu, Azərbaycan Ordusunun ilk hücum əməliyyatı idi və çox təəssüf ki, uğursuzluqla nəticələndi. Əməliyyata gedəndə bilirdik ki, oradan sağ çıxmaq şansımız azdır. Lakin hər şeyi gözə alaraq döyüşə atıldıq. Təəssüf ki, Məhərrəm kimi cəsur döyüşçü yoldaşlarımızı itirdik. Hətta şəhidlərimizin bir neçəsinin nəşini ərazidən çıxara bilmədik. Sonradan öyrəndik ki, ağır yaralanan Məhərrəm əsir düşməmək üçün özünü güllələyib. Şükürlər olsun ki, 31 ildən sonra onu adına layiq şəkildə dəfn edə bildik. Vətən müharibəsində Azərbaycan Ordusunun əldə etdiyi parlaq Qələbə həm bizim - Birinci Qarabağ müharibəsi qazilərinin illərdir çəkdiyi iztiraba son qoydu, həm də şəhidlərimizin narahat ruhlarını şad etdi”.

Qeyd edək ki, şəhid Məhərrəm Abbasov Şuşa rayonunun Daşaltı kəndi ərazisində qalıqları aşkar edilmiş yeddi nəfərdən biridir.

Azərbaycan.- 2023.- 24 avqust.- S.8.