Seçkilərin nəticəsi 20 ilin uğurlarına söykənəcək

Xalq Azərbaycanı tarixinin ən qüdrətli dövlətinə çevirən, torpaqlarımızı işğaldan azad edən və erməni separatizminə son qoyan siyasətin davamına səs verəcək

Prezident İlham Əliyevin sərəncamı ilə 2024-cü il fevralın 7-də respublikamızda növbədənkənar prezident seçkiləri keçiriləcək.

Artıq Mərkəzi Seçki Komissiyası seçkilərin keçirilməsi üçün qanunvericilikdə nəzərdə tutulmuş əsas hərəkət və tədbirlərin müəyyən edilmiş qaydada və müddətdə reallaşdırılması üçün Təqvim Planını təsdiq edib. Bu, 1993-cü ildən ötən 30 ildə Azərbaycanda demokratik şəkildə baş tutacaq 7-ci prezident seçkisi olacaq.

Yüksəliş, intibah və qüdrətli dövlətçilik kursu

Prezident seçkilərində cəmiyyətin seçimi ilk növbədə ötən 20 ilin yekunlarına əsaslanacaq. İlk dəfə 2003-cü ilin prezident seçkilərində İlham Əliyevi dəstəkləyən xalqımız bununla Ulu Öndər Heydər Əliyevin ideyalarının davamına, təhlükəsizliyə və inkişafa səs verdi. Ötən 20 ildən artıq dövrün reallıqları xalqımızın həm bu seçiminin, həm də sonrakı seçkilərdə İlham Əliyevə etimadının nə qədər düzgün və müdrik qərar olduğunu təsdiq edir.

Bu illərdə Azərbaycan Prezident İlham Əliyevin rəhbərliyi altında yüksəliş dövrünü yaşayıb, güclənib, qüdrətlənib, nüfuzunu artırıb. Heydər Əliyev siyasətini uğurla, yaradıcılıqla davam etdirən Prezident İlham Əliyev Azərbaycanın müstəqilliyini möhkəmləndirib, milli mənafelərimizi cəsarətlə və uğurla təmin edib, dövlətimizin yüksəlişi yolunda meydana çıxan bütün əngəlləri və maneələri qətiyyətlə aradan qaldırıb. İlham Əliyevin həyata keçirdiyi siyasət Azərbaycanı sürətli inkişaf yoluna çıxarmaqla bərabər, beynəlxalq mövqelərini əhəmiyyətli dərəcədə gücləndirib. Artıq uzun müddətdir ki, regionun lideri olan Azərbaycan qlobal məsələlərdə söz və nüfuz sahibidir.

2003-cü ilin oktyabrından ötən hər il Prezident İlham Əliyevin xalqa uğur hesabatıdır. Bu hesabatın hər bir səhifəsi məhz xalqımızın görmək istədiyi hadisələrlə əlamətdardır. Ona görə də ötən 20 ildə hər bir prezident seçkisinin nəticələri ilk növbədə onu təsdiq edib ki, İlham Əliyev Azərbaycan xalqının, seçicilərin güvəndiyi və inandığı, taleyini ona etibar etdiyi siyasətçi və liderdir. Ötən hər bir seçki təsdiq edib ki, cəmiyyətimiz Ulu Öndər Heydər Əliyev tərəfindən müəyyən olunmuş strateji kursa, İlham Əliyev siyasətinə heç bir alternativ görmür. Çünki İlham Əliyev siyasəti Azərbaycanın yüksəlişi, intibahı, qüdrətli dövlətçilik və xalqımızın yüksək rifahı deməkdir.

Zəfər seçkisi

Qeyd etdiyimiz kimi, növbəti prezident seçkiləri növbədənkənar seçkilər olacaq. Növbədənkənar seçkilərin keçirilməsi dünyada qəbul olunmuş siyasi təcrübədir. Növbəti seçkilər bəzi hallarda müəyyən səbəblərdən təxirə salınır, bəzi hallarda isə vaxtından əvvəl keçirilir. Seçkilər növbədənkənar keçiriləndə sadəcə seçicilər öz siyasi iradələrini vaxtından əvvəl ifadə edirlər. Azərbaycanın Seçki Məcəlləsi növbəti Prezident seçkilərinin keçirilməsi ilə növbədənkənar Prezident seçkilərinin keçirilməsi arasında hər hansı prosedur, yaxud müddət fərqi müəyyən etmir.

2018-ci ilin də prezident seçkiləri növbədənkənar keçirilmişdi. Həmin seçkilərdən sonra Azərbaycan növbəti uğurlara imza atdı. Ən böyük uğurumuz isə əlbəttə ki, torpaqlarımızın işğaldan azad edilməsi, bütün ərazilərimiz üzərində milli suverenliyimizin təmin olunmasıdır. Hələ 2003-cü ildə andiçmə mərasimində Prezident İlham Əliyev bununla bağlı demişdi: "Bu problem yalnız bir neçə prinsiplər, beynəlxalq hüquq normaları əsasında həll oluna bilər: Azərbaycanın torpaqları işğaldan azad olunmalıdır, bir milyon qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun, azad edəcəkdir".

2020-ci ilin Vətən müharibəsində torpaqlarımızın işğaldan azad edilməsi, 2023-cü ilin sentyabrında isə Qarabağda erməni separatizminə son qoyulması cənab İlham Əliyevin prezidentlik fəaliyyətinin ən mühüm hadisələridir. Bu qələbələr son bir neçə əsrlik tariximizin ən böyük uğurları, dövlətçiliyimizin şərəf salnamələridir.

Torpaqlarımızın azadlığı və erməni separatizminə son qoyulması yeni reallıqlar yaradıb. Qarşıdan gələn prezident seçkiləri də bu reallıqlar şəraitində keçiriləcək. Belə ki, müstəqilliyimizin bərpasından sonra ilk dəfədir ki, seçkilər torpaqlarımızın tam azadlığı şəraitində baş tutacaq. Ona görə bu seçki də Zəfər seçkisi və ərazi bütövlüyümüzün və suverenliyimizin təsbiti kimi tarixə düşəcək.

Azərbaycan xalqı ötən 20 ildə əldə etdiyimiz bütün uğurlara özünün layiqli siyasi qiymətini verib. Bu mənada qarşıdan gələn növbədənkənar prezident seçkilərində də xalqımız öz müzəffər liderinin, bu gün Qarabağa və Şərqi Zəngəzura yeni həyat bəxş edən rəhbərinin yanında olacaq. Bu seçkilər bir daha Prezident İlham Əliyevin xalqın siyasi dəstəyinə əminliyinin ən bariz göstəricisi kimi tarixə düşəcək.

Bütövlükdə, seçkilərin nəticəsi ötən 20 ilin uğurlarına əsaslanacaq. Xalq Azərbaycanı tarixinin ən qüdrətli dövlətinə çevirən, torpaqlarımızı işğaldan azad edən, erməni soyqırımına son qoyan siyasətin davamına səs verəcək.

Rəşad CƏFƏRLİ,

Azərbaycan.-2023.- 14 dekabr, № 273.- S.1;3.