Xalqla Prezident arasında sarsılmaz birlik mövcuddur

"Prezident İlham Əliyevin 2024-cü il fevralın 7-də növbədənkənar prezident seçkilərinin keçirilməsi haqqında sərəncamı Azərbaycanın milli maraqlarından, mövcud tarixi və siyasi zərurətdən qaynaqlanır. Bu gün nəinki Azərbaycanda, o cümlədən dünyada hər kəs çox yaxşı bilir ki, Qarabağı işğaldan azad edən və Vətəni bütövləşdirən Prezident İlham Əliyevin siyasi çəkisi və nüfuzu, ona olan xalq məhəbbəti və dəstəyi bütün dünya liderlərinin qibtə edəcəyi qədər yüksəkdədir".

Bu fikirləri "Azərbaycan" qəzetinə açıqlamasında Milli Məclisin deputatı Azay Quliyev deyib. Deputat bildirib ki, mövcud siyasi və mənəvi mühit Azərbaycan Liderinin heç kimdən və heç nədən asılı olmadan qarşısına qoyduğu strateji hədəflərə daha qətiyyətlə çatmaq və bu yolda ona mane olmaq istəyənlərin, milli maraqlarımıza təhlükə törədənlərin qarşısını əzmlə almaq üçün lazımi qərarları vaxtında və gecikmədən verməsinə imkan yaradır. Növbədənkənar prezident seçkilərinin təyin olunmasına məhz bu kontekstdən yanaşmaq lazımdır.

Azay Quliyev qeyd edib ki, bu qərarın verilməsində məqsəd regionda və dünyada baş verən geosiyasi dalğalanmalardan və real təhlükələrdən Azərbaycanı etibarlı şəkildə qorumaq, ölkənin siyasi, iqtisadi və idarəetmə sistemində nəzərdə tutulan köklü dəyişiklikləri dövrün tələblərinə uyğun həyata keçirmək, ölkəmizin gələcək inkişafını və rəqabət imkanlarını gücləndirmək, o cümlədən dövlətimizə qarşı açıq şəkildə hazırlanan məkrli planların qarşısını vaxtında almaqdır.

Deputatın sözlərinə görə, xalqımız əmindir ki, Prezident İlham Əliyevin 2020-ci il sentyabrın 27-də əks-hücuma keçmək, 10 noyabrda müharibəni qələbə ilə başa çatdırmaq, 23 aprel 2023-cü ildə Laçında dövlət sərhəd keçid məntəqəsini yaratmaq və bu ilin 19-20 sentyabrında Qarabağda separatçılığa son qoymaq və suverenliyimizi bərpa etmək haqqında verdiyi taleyüklü qərarlar və onların tarixi nəticələri kimi 7 fevral 2024-cü ildə növbədənkənar prezident seçkilərinin keçirilməsi haqqındakı qərarı da eyni xarakterlidir. Bütün qərarlar əldə etdiyimiz qələbələri daha da möhkəmləndirməyə xidmət edir.

Azay Quliyev deyib ki, bəzi siyasilərin prezident seçkilərinin erkən keçirilməsi haqqında söylədikləri tənqidi fikirlərə gəlincə, əminliklə deyə bilərik ki, bunu heç kim ciddi və əsaslı qəbul etmir: "Xalqla Prezident arasında mövcud olan sarsılmaz birliyə müdaxilə etmək və İlham Əliyevlə rəqabət aparmaq mümkün deyil. Bu baxımdan seçkilərin nə vaxt elan olunması və nə vaxt keçirilməsi bu reallığı dəyişmir. Həmçinin siyasi partiyalar üçün seçkilərlə bağlı vaxt anlayışı olmur və olmamlıdır".

Azay Quliyev vurğulayıb ki, Prezident İlham Əliyevin uğurlarını və qələbələrini heç zaman həzm edə bilməyən marginalların və onların xaricdəki təlimatçılarının nöbvədənkənar seçkilərə indidən kölgə salmaq cəhdlərinə isə ümumiyyətlə, əhəmiyyət vermək lazım deyil, çünki milli nankorlar heç zaman millətin yanında olmayıblar və bundan sonra da olmayacaqlar: "Əminəm ki, Vətən müharibəsində olduğu kimi, hər bir vətəndaşımız bu seçkilərdə də fəal iştirak edəcək, qalib və bütöv Azərbaycanın gələcəyi naminə üzərinə düşən vəzifəni layiqincə yerinə yetirəcək".

Nəzrin QAFARZADƏ,

Azərbaycan.-2023.- 14 dekabr, № 273.- S.3.