Prezident İlham ƏLİYEV: “Bizim çox sabit siyasi sistemimiz var, xalqımızın çox güclü birliyi var"

Azərbaycan Prezidenti İlham Əliyevin bütün müsahibə və çıxışları bir qayda olaraq həmişə istər yerli, istərsə də dünya KİV-ində böyük rezonans doğurur.

Dövlət başçısının "Euronews" televiziyasına verdiyi son müsahibə də siyasi şərhçilər tərəfindən həm ölkə, həm də dünya mətbuatında geniş müzakirə olunur.

Müsahibədə Azərbaycanın dayanıqlı sülhə, əmin-amanlığa xidmət edən xarici siyasətindən də geniş söz açılmışdır. Müxbirin "Azərbaycan Şərq və Qərb arasında çox strateji-coğrafi mövqedə yerləşir. Beynəlxalq arenada ölkənin strategiyası nədən ibarətdir" sualına Prezident İlham Əliyevin cavabı belə olmuşdur: "Beynəlxalq arenada biz müstəqil siyasət yürütməyə davam edəcəyik. Biz dördüncü ildir ki, BMT-dən sonra ikinci ən böyük beynəlxalq təsisat olan Qoşulmama Hərəkatına sədrlik edirik. Bir çox üzv ölkənin - 120 üzv ölkənin ümumi rəyinə əsasən, Azərbaycan Qoşulmama Hərəkatına yeni ölçü və dinamika verməkdə önəmli rol oynayıb. Biz Qoşulmama Hərəkatının institusional inkişafı ilə bağlı çoxlu addımlar atdıq, parlament və gənclər platformalarını yaratdıq, qadınlar üçün platformanın yaradılması üzərində işlədik. Biz COVID pandemiyası məsələsi ilə bağlı çox fəal olmaqla 80-dən çox ölkəyə yardım etdik. Beləliklə, bizim Qoşulmama Hərəkatında sədrliyimiz bizə siyasətimizi, imkanlarımızı nümayiş etdirməyə şərait yaratdı və yeri gəlmişkən, bizim sədrliyimiz yekdil qərarla əlavə bir il uzadılıb. 120 ölkə, onların heç də hamısı bir-biri ilə yaxşı münasibətdə deyil, lakin Azərbaycana gəldikdə onların hamısı yekdilliklə bizi dəstəklədi. Beləliklə, bu, beynəlxalq dəstəyi ən yaxşı şəkildə nümayiş etdirir. Bəzən bəzi siyasətçilər beynəlxalq birlik haqqında danışdıqda onlar, ola bilsin ki, onlarla ölkəni nəzərdə tuturlar. Lakin beynəlxalq birlik 200-dən artıq ölkədən ibarətdir və bu ölkələrin əksəriyyəti Azərbaycanı dəstəkləyir. Bu, yalnız bir istiqamətdir".

Prezident İlham Əliyevin hər bir müsahibəsi, çıxışı həm də ölkəmizin gələcəyi ilə bağlı inkişafın aydın təsəvvürünü yaradır, uğurlara yönəlmiş iqtisadi və sosial istiqamətləri müəyyənləşdirir. Bu baxımdan Prezidentin "Euronews" televiziyasına müsahibəsi də istisna olmamışdır. Müsahibəsi zamanı dövlət başçısı çox aydın və qəti şəkildə bildirmişdir ki, Azərbaycanın daxilində risklər yoxdur: "Bizim çox sabit siyasi sistemimiz var, xalqımızın çox güclü birliyi var, xüsusilə işğal olunmuş ərazilərimizin azad edildiyi tarixi qələbədən sonra".

Dövlət başçısının müsahibəsindən də aydın göründüyü kimi, Azərbaycan müstəqil xarici və daxili siyasət yürütməyə qadir olan bir ölkədir. O da xüsusilə qeyd olunmalıdır ki, bu siyasət milli maraqlara əsaslanaraq yürüdülür. Bu siyasətin əsasında ölkəni qarşıdurma, yaxud rəqabət arenasına çevirməmək, dövləti mənfi xarici təsirlərdən və daxili işlərə müdaxilədən qorumaq dayanır. Azərbaycanı istənilən rəqabətdən, geosiyasi mübarizədən və ya böyük dövlətlərin toqquşmasından qorumaq üçün Prezident İlham Əliyev tərəfindən vaxtında zəruri və lazımi addımlar atılır. İllərdən bəri formalaşmış dövlət və dövlətçilik ənənələri göz bəbəyi kimi qorunur. Prezident "Euronews" televizisiyasına müsahibəsində bir daha Azərbaycanın siyasətində müstəqil olduğunu, xarici siyasətinin prinsiplərinin dəyişməz qaldığını təsdiqlədi. Dövlət başçısı bütün məsələlərdə Azərbaycanın ədalətə və beynəlxalq hüquq normalarına əsaslandığını, qarşılıqlı əlaqələrin dinamik inkişafında bu prinsiplərin rolunu və əhəmiyyətini bir daha açıqladı.

Müxbirin Azərbaycanın daxili və xarici siyasətlə bağlı verdiyi sualı Prezident İlham Əliyev belə cavablandırdı: "Siyasi inkişafa gəldikdə, burada da Azərbaycan müstəqil xarici və daxili siyasətə malik ölkədir və bu siyasəti milli maraqlara əsaslanaraq yürüdür. Əsas amillərdən biri ölkəni qarşıdurma, yaxud rəqabət arenasına çevirməməklə dövləti mənfi xarici təsirdən və daxili işlərə müdaxilədən qorumaqdır. Beləliklə, biz bu riskləri azaltmağı uğurla bacardıq. Bu səbəbdən bu gün Azərbaycan böyük beynəlxalq potensiala, müsbət beynəlxalq reputasiyaya malik ölkədir. Elə bir ölkə ki, son 20 ildə 300 milyard dollardan artıq sərmayə cəlb edə bilib".

Aparılmış müşahidələr sübut edir ki, dünyanın aparıcı dövlətlərinin mediası Azərbaycan gerçəkliklərini öyrənməyə, bilməyə və onları ictimailəşdirməyə böyük maraq göstərir. Bu maraq Azərbaycanla münasibətlərin möhkəmlənməsinə, bir çox sahələr üzrə əlaqələrin genişlənməsinə xidmət edir. Bütün bunlar isə Azərbaycanın daim artan gücündən, qüdrətindən və Azərbaycan Prezidentinin uğurla həyata keçirdiyi müstəqil xarici və daxili siyasətin uğurlarından xəbər verir. Dövlət başçısının jurnalistin mahiyyətində həm siyasi, həm də iqtisadi çalarlar olan suallarına verdiyi məntiqli, əsaslandırılmış cavablar Azərbaycan gerçəkliklərini tam reallığı ilə ifadə edir.

Vahid MƏHƏRRƏMOV,

Azərbaycan.-2023.- 14 dekabr, № 273.- S.5.