Azərbaycan tarixində yeni mərhələnin başlanğıcı

Bu gün müstəqil siyasət Azərbaycan üçün sadəcə inkişaf yolu deyil, eyni zamanda milli ideologiyamızın mühüm prioritetidir və ölkəmiz bütün istiqamətlərdə bu prioriteti yüksək tutur.

Son illərdə ölkəmizdə cəmiyyət həyatının bütün önəmli sahələri üzrə reallaşdırılan dinamik islahatlar da bunun bir təzahürüdür. Aparılan köklü dəyişikliklərlə Azərbaycan tərəqqi və təkamül yolu keçərək yeni şəraitə uyğunlaşır. Xalqın böyük dəstəyi ilə müşayiət olunan bu islahatlar ölkəmizin daxili siyasi uğurlarına yol açır, cəmiyyətimizi daha da səfərbər edir, vətəndaş həmrəyliyini, xalq-hakimiyyət birliyini möhkəmləndirir, siyasi sabitlik və təhlükəsizlik mühitini möhkəmləndirir. Nəticədə daxili siyasətin davamı kimi xarici siyasət istiqamətində də Azərbaycanın addımları daha dayanıqlı və ardıcıl xarakter daşıyır.

Azərbaycan Respublikası Prezidentinin 7 dekabr 2023-cü il tarixli sərəncamı ilə növbədənkənar Azərbaycan Respublikası Prezidenti seçkilərinin elan edilməsi və seçkinin 2024-cü ilin 7 fevralına təyin olunması ölkə həyatında məhz yeni bir tarixin başlanğıcıdır. Bu sərəncamın imzalanmasından sonra müxtəlif dairələrdə müzakirə edilən əsas sual ölkəmizdə növbədənkənar seçkilərin keçirilməsini aktual edən səbəblərdir.

Davamlı inkişaf xətti

Əgər Ümummilli Lider Heydər Əliyevin 1993-cü ildə xalqın təkidli tələbi ilə hakimiyyət rəhbərliyinə qayıdaraq ölkənin gələcək taleyinə görə məsuliyyəti öz üzərinə götürdüyü tarixi günlərdən bəri Azərbaycanda keçirilən prezident seçkiləri arasındakı məntiqi ardıcıllığı, davamlı inkişaf xəttini nəzərə alsaq, hər seçki arasındakı dövrün dövlətimizin milli hədəflərinə doğru böyük bir tarixi mərhələyə çevrildiyini görərik.

Bu mərhələlərin hər birində konkret strateji vəzifələr müəyyənləşdirilmiş, onların uğurlu icrası niyyətilə çoxşaxəli layihələr həyata keçirilmiş, mühüm nəticələr əldə olunmuşdur. Məhz bu mərhələlərdə görülən işlər sayəsində Azərbaycanda ictimai-siyasi sabitlik təmin edilmiş, demokratik, hüquqi dövlət quruculuğu prosesləri öz məqsədinə çatmış, keçid dövrünün aktuallaşdırdığı islahatlar əzmlə həyata keçirilmiş, yeni neft və iqtisadi strategiyanın nailiyyətləri sayəsində Azərbaycanın iqtisadi həyatı yenidən qurularaq, yüksək dinamizmlə dirçəlmiş, inkişaf etdirilmişdir.

2003-cü ilə qədər qurulmuş möhkəm təməllər üzərində Azərbaycan Prezidenti İlham Əliyev yeni strateji dövrlərdə dövlətimizi tarixinin ən böyük uğurlarına yetirmiş, ölkəmiz bütün meyarlar üzrə ən qüdrətli çağlarına gəlib çatmışdır.

Respublikada bir çox sosial problemlər, demək olar ki, aradan qalxmış, regionların tarazlı inkişafı təmin edilmiş, ölkə boyu sosial infrastruktur yeniləndirilmişdir. Bu dövrlərdə Azərbaycan həyata keçirilən qlobal layihələrlə, beynəlxalq proseslərə getdikcə artan təsir imkanları ilə regionun lider dövlətinə çevrilmiş, xarici əlaqələri daha da genişlənmişdir. Ölkəmizdə iqtisadi inkişaf və demokratikləşmə prosesləri paralel aparılmış, cəmiyyətdə yeni siyasi mədəniyyət formalaşmış, dövlətçilik ənənələri daha da inkişaf etdirilmiş, vətəndaş məsuliyyəti güclənmiş, milli vəhdət sarsılmaz xarakter almışdır.

Milli hədəflərə doğru addım-addım

Azərbaycanın iqtisadi nailiyyətləri, maddi imkanları dövlətimizin müdafiə potensialını da gücləndirmişdir. Ölkəmiz getdikcə öz müdafiə qabiliyyətini artırmış, hərbi cəhətdən güclənmiş, qabaqcıl təcrübə və texnologiyalara yiyələnmiş, gənclərimizin hərbi sahəyə marağı artmış, Azərbaycan Ordusu bir neçə mərhələdə həyata keçirilən ardıcıl islahatlarla dünyanın ən qabaqcıl silahlı qüvvələri sırasında qərarlaşmışdır.

Azərbaycan Prezidentinin uğurla həyata keçirdiyi balanslaşdırılmış xarici siyasət kursu, dövlətimizin təşəbbüskarı və əsas iştirakçılarından olduğu qlobal layihələrin heç kimin maraqlarına toxunmadan bütün tərəflərlə qarşılıqlı faydalar yaratması, ölkəmizin dünya üçün artan əhəmiyyəti, respublikamızın hər zaman gərginliklərin, ixtilafların, müharibələrin deyil, sülhün, inkişafın, insanın firavan yaşayışının, xoşbəxtliyinin tərəfini tutması diplomatiyamızın da uğurlarına xidmət etmişdir. Ayrı-ayrı mərhələlər üzrə ölkə həqiqətlərinin dünyaya çatdırılması istiqamətində ardıcıl iş aparılmış, dövlətimiz Ermənistanın vətənimizə qarşı hərbi təcavüzünü hüquqi cəhətdən faktlaşdıran sənədlərin, qərar və qətnamələrin beynəlxalq platformalarda qəbuluna nail olmuşdur. Beləliklə, düşmən ölkənin təxminən 30 il ərzində işğal altında saxladığı torpaqlarımızın beynəlxalq hüququn yaratdığı imkanlar çərçivəsində - istər sülh yolu ilə, istərsə də hərbi yolla azad edilməsi üçün qanuni əsaslar sənədlərlə təsbit edilmişdir.

Birnömrəli vəzifə

Bütün bunlar təbii ki, asanlıqla başa gəlməmişdir. Bu xəttin, ardıcıllığın qorunması üçün zaman-zaman həm daxildən, həm də xaricdən qaynaqlanan nə qədər təhlükəli irticanın, təxribatın və digər anti-Azərbaycan aksiyalarının qarşısı alınmış, çətinliklər, təhdidlər dəf edilmişdir.

Bir faktı da qeyd edək ki, torpaqlarımızın azadlığı məsələsi hər prezident seçkisindən növbətisinə qədər olan müddətdə qarşıya qoyulmuş vəzifələrin ən mühümü olmuşdur. Qarabağ problemi müstəqillik illərində Azərbaycan rəhbərliyi qarşısında mühüm problem idi və bu, digər sahələrdəki inkişaf proseslərinə də müəyyən təsirini göstərirdi. Eyni zamanda müxtəlif sahələrdə həyata keçirilən inkişaf layihələrinin birbaşa hədəfləri ilə yanaşı, bir mühüm hədəfi də məhz Qarabağ probleminin həllini hansısa şəkildə yaxınlaşdırmaq idi.

Bu problem bizə keçmişin ən ağır mirası kimi qalmışdı. 1988-ci ildən ermənilərin Dağlıq Qarabağda başladıqları avantürist millətçi separatizmin qarşısı Azərbaycan rəhbərliyinin qətiyyətsizliyi üzündən vaxtında alınmadığından, 1990-1993-cü illərdə isə respublikamızda yaranmış siyasi və hakimiyyət böhranı, idarəçilikdə səriştəsizlik və qarmaqarışıqlıq üzündən bu problem belə çıxılmaz duruma gəlib çatmışdır. Ermənilərin işğalçılıq siyasəti nəticəsində torpağını itirmiş qaçqın və köçkünlərin öz yerlərinə qaytarılması, işğal altındakı yurdlarımızın bərpası, o ərazilərin də potensialından, resurslarından ölkəmizin ümumi inkişafı üçün istifadə, ən önəmlisi isə müstəqilliyini əldə etmiş ölkəmizin suverenliyinin tam bərpası birnömrəli hədəf kimi qarşıda dururdu.

Tamamlayıcı mərhələ

Cənab İlham Əliyev 2003-cü ildə xalqımızın yekdil səsi ilə Azərbaycan Respublikasının Prezidenti seçildikdən sonra dövlətimizi addım-addım bu hədəfə yaxınlaşdırdı. Bir tərəfdən münaqişənin qan tökülmədən, hər iki tərəfdən insan itkilərinə yol vermədən beynəlxalq hüquq normalarına uyğun ədalətli qaydada həlli üçün ölkəmiz sülh danışıqlarına uzun illər sadiqlik nümayiş etdirdi. Hətta danışıqların ən ümidsiz vaxtlarında da yenə görüşlərdə iştirakdan, müzakirələrdən imtina etmədi. Amma buna paralel olaraq torpaqlarımızın hərb yolu ilə düşməndən təmizlənməsi, ərazi bütövlüyümüzün ordumuzun gücü ilə bərpasını da daim gündəmdə saxlayaraq buna lazımi hazırlıqlar apardı. Beləliklə, Prezident İlham Əliyev Ulu Öndərin ötən əsrin 90-cı illərinin ortalarından müəyyən etdiyi xəttin davamı kimi böyük bir tarixi proses formalaşdırdı. Xalqın dəstəyi, yekdil rəyi ilə hər seçkidə Azərbaycan Respublikasının Prezidenti seçilərək ölkəyə rəhbərliyini davam etdirdiyi müddətlərdə bu prosesi daha da genişləndirdi, əldə edilmiş nailiyyətləri qoruyaraq möhkəmləndirdi. Hər mərhələnin xarakterik vəzifələrini səbirlə, mahir strateq kimi dəqiq şəkildə yerinə yetirdi, hər addımı öz vaxtında, məqamında atdı.

2018-ci ilin aprel seçkisindən sonra isə dövlətimizin başçısı İlham Əliyev xalqımızın qarşısında duran ən mühüm problem - ərazi bütövlüyümüzün bərpası prosesinin son tamamlayıcı mərhələsinə start verdi. Dünyamızdakı, regionumuzdakı yeni reallıqlar, çağırışlar fonunda qısa zamanda ölkəmizin, xalqımızın bütün potensialını vahid məqsəd uğrunda səfərbər etdi və nəhayət, 2020-ci ilin 27 sentyabrında başlamış Vətən müharibəsini Azərbaycanın tarixi qələbəsi ilə başa çatdırdı. 2023-cü il sentyabrın 20-də həyata keçirilən 23 saatlıq lokal antiterror tədbirləri isə ərazi bütövlüyümüzün və suverenliyimizin tam bərpası prosesini tamamladı.

Müstəqillik tariximizdə bir ilk

Artıq Azərbaycanın ərazi bütövlüyü və suverenliyi tam bərpa edildi. Bu möhtəşəm qələbə, uğur həm regionda, həm də ölkəmizdə yeni reallıqlar yaradıb. Müstəqil Azərbaycanın tarixində ilk dəfə olaraq seçkilər bütün ölkə ərazisində keçiriləcəkdir. Bu seçkilər ərazi bütövlüyümüzün və suverenliyimizin təsbitidir. Ən mühümü isə seçkilərdən sonra Azərbaycan tarixində məzmunca yeni bir mərhələ başlanacaq. Həmin mərhələdə artıq Qarabağ problemi, Azərbaycanın ərazi bütövlüyü dərdi, qaçqın və məcburi köçkünlər qayğısı olmayacaq. Bu mərhələ Qarabağın, Şərqi Zəngəzurun dirçəlişi, inkişaf axarına qovuşması, ümumilikdə isə Azərbaycanın daha da qüdrətlənməsi, regionun lider dövləti kimi Cənubi Qafqazın əbədi sülh və inkişaf məkanına çevrilməsinə verdiyi tarixi töhfələrlə yadda qalacaq.

İradə ƏLİYEVA,

Azərbaycan.-2023.- 14 dekabr, № 273.- S.3.