Bakı beynəlxalq tədbirlərin təcrübəli ev sahibinə çevrilib

Bakı gələn il BMT-nin İqlim Dəyişmələri üzrə Çərçivə Konvensiyasına Tərəf Dövlətlərin 29-cu Konfransına (COP-29) evsahibliyi edəcək. 1995-ci ildən hər il keçirilən bu konfransın məqsədi dünyada iqlim dəyişikliyi ilə mübarizədə irəliləyişləri qiymətləndirməkdir.

Bu mövzu ilə bağlı "Azərbaycan" qəzetinə danışan Milli Məclisin deputatı Azər Badamov deyib ki, Azərbaycan BMT-nin qlobal iqlim dəyişiklikləri ilə bağlı təşəbbüsünə qoşularaq könüllü şəkildə öhdəlik götürüb: "Ölkəmiz istilik effekti yaradan qazların azaldılması və istehsal olunan elektrik enerjisinin 30 faizinin 2030-cu ilə qədər bərpaolunan enerjiyə çevrilməsi ilə bağlı öhdəliyi icra edir. Ümumiyyətlə, istilik effekti yaradan qazların həcminin 2030-cu ilədək 35 faizə qədər, 2050-ci ilədək isə 40 faizə qədər azaldılması planlaşdırılıb. Həmçinin üç il əvvəl erməni işğalından azad olunmuş ərazilərimizdə bərpaolunan enerji resurslarından səmərəli istifadə olunması istiqamətində də böyük layihələr icra olunur".

Deputat deyib ki, Azərbaycanın bərpaolunan enerji sahəsində təcrübəli beynəlxalq şirkətlərlə sazişlər bağlaması mövcud sahədə inkişafımıza daha da təkan verir: "Bu istiqamətdə görülən işlərin təzahürü kimi Birləşmiş Ərəb Əmirliklərinin "Masdar" şirkəti ilə əldə olunmuş razılaşmaya əsasən, Qaradağda istifadəyə verilmiş günəş-elektrik stansiyasını misal göstərmək olar. Həmçinin Azərbaycan, Gürcüstan, Rumıniya və Macarıstan arasında imzalanmış razılaşmaya əsasən, ölkəmizdə istehsal olunacaq "yaşıl enerji"nin Avropaya nəql edilməsi üçün Qara dənizin dibi vasitəsilə yeni "yaşıl enerji" dəhlizi marşrutunun yaradılması istiqamətində işlər də davam etdirilir. Bu da ölkəmizdə enerji istehsalı sahəsində böyük həcmdə qaza qənaət olunmasına xidmət edəcək və Avropaya daha çox qaz ixrac etməyimizə imkan yaradacaq. Habelə, Azərbaycandan Avropaya daha böyük həcmdə bərpaolunan enerji və qaz daxil olduqca orada da istilik effektli qazlar yaradan kömürdən istifadə azalacaq".

Azər Badamov vurğulayıb ki, ölkəmizin qlobal iqlim dəyişiklikləri ilə mübarizəyə daha çox töhfə vermək potensialı var. Ona görə də COP-29-un Azərbaycanda keçirilməsi doğru qərardır. Bakının belə mötəbər konfransa evsahibliyi etməsi ölkəmizin bərpaolunan enerji potensialının beynəlxalq səviyyədə daha yaxşı təbliğinə imkan verəcək. Bu da yeni investisiyaların ölkəmizə gəlişinə şərait yaradacaq. Həm də dünya ictimaiyyəti Azərbaycanı daha yaxından tanıya biləcək. Bütün bunlar ölkəmizin iqtisadi inkişafını sürətləndirəcək.

Deputatın sözlərinə görə, Azərbaycanın beynəlxalq tədbirlərə evsahibliyi etməklə bağlı zəngin təcrübəsi var: "Azərbaycan Avropa və İslam Həmrəyliyi oyunlarına, həmçinin Qoşulmama Hərəkatına, digər beynəlxalq forum və tədbirlərə evsahibliyi edib. Ölkəmiz COP-29 konfransını da yüksək səviyyədə təşkil etməklə növbəti dəfə qlobal əhəmiyyətli mühüm tədbirin ünvanına çevriləcək. Xüsusi qeyd etmək lazımdır ki, Azərbaycan belə konfransalara evsahibliyi etməklə etibarlı tərəfdaş və beynəlxalq ictimaiyyətin ləyaqətli üzvü olduğunu təsdiqləyir".

Nəzrin QAFARZADƏ,

Azərbaycan.-2023.- 14 dekabr, № 273.- S.4.