Onlar bizim sabahımızdır

Ulu Öndər Heydər Əliyevin zəngin dövlətçilik fəaliyyətində gənclər siyasəti hər zaman xüsusi yer tuturdu. Böyük tarixi şəxsiyyət gənclərə, sabahımızın qurucularına xüsusi önəm verirdi, onların gücünə, qüvvəsinə və bacarığına inanırdı.

Sağlam düşüncəli, milli ruhlu gəncliyin ümidlərini doğruldub vətənin gələcəyinə sahib çıxa bilmələrindən ötrü onlara diqqət və qayğısını bir an belə əsirgəmirdi.

Azərbaycan dövlətinə rəhbərliyi dövründə böyük rəhbər özünəməxsus müdrikliklə təlqin edirdi ki, milli dövlətçiliyimizin möhkəmləndirilməsi, Azərbaycanın əbədi müstəqilliyinin təmin olunması gənclərə həssas münasibətdən, onlara vətəndaşlıq hissinin aşılanmasından, dövlətin öz gənclərinə sahib çıxmasından, cəmiyyət həyatının bütün sahələrində təmsil olunmasına şərait yaradılmasından, onların aparıcı qüvvəyə çevrilməsinə dəstəkdən və bu qüvvədən milli hədəflər uğrunda məqsədyönlü istifadədən çox asılıdır. Buna görə də hələ ötən əsrin 70-80-ci illərində ölkəyə rəhbərlik etdiyi zamanlarda Ümummilli Liderin göstərişi ilə yüzlərlə azərbaycanlı gənc keçmiş ittifaqın aparıcı ali məktəblərinə, müxtəlif ixtisaslar üzrə təhsil almağa göndərilirdi. Təkcə bir faktı qeyd etmək kifayətdir ki, 1970-ci ildə Heydər Əliyevin təşəbbüsü ilə 1500-dən artıq azərbaycanlı gənc bu qayğı ilə əhatə olunmuşdu. Bütün bunlar Ulu Öndərin sabahımız olan gənclərə sevgisindən, diqqət və qayğısından, ölkəmizin işıqlı gələcəyini düşünməsindən xəbər verirdi. Həmin zamanlarda başqa ölkələrə təhsil almağa göndərilən bu gənclər illər sonra Ümummilli Liderin rəhbərliyi altında müstəqil Azərbaycanın qurulmasında fəal iştirak etməyə başladılar.

Xalqın ən fəal təbəqəsi olan gəncliyə böyük dəyər verən Ümummilli Lider Heydər Əliyev deyirdi: "Hər bir xalq özünün xoşbəxt gələcəyi olan ümidlərini ilk növbədə gənc nəsillərə bağlayır. Gənc nəslin vətənpərvərlik ruhunda tərbiyə olunması onun mənsub olduğu xalqın rifahının, ölkənin çiçəklənməsinin rəhnidir. Bu gün iftixar və qürur hissi ilə bildirmək istəyirəm ki, müasir Azərbaycan gəncliyi milli-mənəvi dəyərlərimizi, doğma ana dilimizi, ata-babalardan qalan gözəl adət-ənənələrimizi göz bəbəyi kimi indi də qoruyub yaşadır".

Ümummilli Lider gənclərlə keçirdiyi mütəmadi görüşlərlə onlara nə qədər böyük dəyər verdiyini, bu insanları maraqlandıran məsələləri daim diqqətdə saxladığını, böyüməkdə olan nəslin gələcəklə bağlı ideyalarının, hədəflərinin mühümlüyünü göstərirdi. Gənc nəslin mənəvi, fiziki sağlamlığının, vətənpərvərlik ruhunda tərbiyəsinin, milli dəyərlərimizə bağlılığının nə qədər vacib məsələ olduğunu nümayiş etdirir, öz yanaşmaları ilə gənclərə şəxsi nümunə olurdu.

Ölkədə gənclər siyasətinin düzgün qurulmasını çox vacib və önəmli hesab edən Ulu Öndər Heydər Əliyev deyirdi: "Mənim üçün ən əziz nemət Azərbaycanın uşaqlarıdır, Azərbaycanın gəncləridir. Çünki Azərbaycan Prezidenti kimi mən də bu gün Azərbaycanın böyük gələcəyi haqqında düşünürəm. Azərbaycanın gələcəyi isə Azərbaycanın gənclərindən və uşaqlarından asılıdır".

1993-cü ildə Ümummilli Lider Heydər Əliyev xalqın təkidli tələbi ilə hakimiyyətə qayıtdıqdan sonra gənc nəslə göstərilən diqqət və qayğını dövlət siyasətinin əsas istiqamətlərindən birinə çevirdi. Azərbaycanı gənclər ölkəsi, gəncləri isə gələcəyimiz adlandırdı. Ulu Öndər böyüməkdə olan gənc nəslə qayğını hər zaman önə çəkdi. Hüquqi və dünyəvi dövlət quruculuğu prosesində onların gücünə, enerjisinə, bilik və savadına ehtiyac duyulduğunu düzgün qiymətləndirdi və bu istiqamətlərdə zəruri addımlar atdı. Zamanında atılan bu addımlar cəmiyyətdə gənclərin fəallığına, inkişafına hərtərəfli şərait yaratdı. Onların aparıcı qüvvəyə çevrilməsinə təkan verdi.

Gənclərin cəmiyyətdə rolunu daha da artırmaq məqsədilə Ulu Öndərin rəhbərliyi altında olduqca mühüm qərarlar qəbul edildi. Azərbaycan Respublikası Prezidentinin 26 iyul 1994-cü il tarixli fərmanı ilə ölkəmizdə Gənclər və İdman Nazirliyi yaradıldı. 1995-ci ildə Gənclər Təşkilatlarının Milli Şurası fəaliyyətə başladı. Azərbaycan gənclərinin cəmiyyətin inkişafında və bir çox vacib problemlərin həllində rolunu artırmaq, ölkənin gələcək inkişafında iştirakını və məsuliyyətini yüksəltmək məqsədilə Ümummilli Lider Heydər Əliyev tərəfindən 1995-ci ildə Azərbaycan Gənclərinin Forumunun keçirilməsi təşəbbüsü irəli sürüldü. Bir il sonra Ulu Öndərin təşəbbüsü reallaşdı. 2 fevral 1996-cı ildə gənclərin I Forumu keçirildi. İlk forum Azərbaycanda gənclər siyasətinin müəyyən olunmasında böyük rol oynadı. 1997-ci il fevralın 1-də forumun ildönümü münasibətilə gənclərin bir qrupunu qəbul edən Ulu Öndər 2 fevralın Azərbaycan Gəncləri Gününün elan edilməsi haqqında sərəncam imzaladı.

Heydər Əliyev həmişə gənclərimizə böyük ümidlər bəsləyir və dəfələrlə qeyd edirdi ki, Azərbaycanın gələcəyi gənclərin əlindədir. Ona görə də Azərbaycanda demokratik cəmiyyət, hüquqi dövlət quruculuğu prosesinin ilk dönəmindən gənclər siyasətinin başlıca istiqmaətlərini müəyyənləşdirdi və onun icrasına doğru uğurlu addımlar atdı. O illərin gəncliyi vətən sevgisini, qəhrəmanlıq əzmini, Azərbaycanın müstəqilliyi, ölkəmizin ərazi bütövlüyü uğrunda döyüşlərdəki iştirakı, şəhidlik məqamına qədər yüksəlməsi ilə sübuta yetirdi. Heydər Əliyevin irəli sürdüyü milli dövlətçilik kursu Azərbaycan gəncliyinə imkan verdi ki, öz əzmkarlıqlarını, yüksək potensiallarını cəmiyyət həyatının bütün sahələrində reallığa çevirib ən böyük tarixi qələbələri Azərbaycan dövlətinin qüdrəti ilə qazansınlar.

Dahi rəhbərin müəyyənləşdirdiyi gənclər siyasəti bu gün Prezident İlham Əliyev tərəfindən uğurla davam etdirilir. Azərbaycanda gənclər siyasətini daha da inkişaf etdirmək, onların dövlət qulluğunda məsul vəzifələrdə iştirakını təmin etmək, aparıcı qüvvəyə çevirmək və sosial-iqtisadi problemlərinin həllini təmin etmək məqsədilə ölkə rəhbərliyi bütün lazımi tədbirləri həyata keçirdi, önəmli dövlət proqramları qəbul olundu. Gənclərin ailə-məişət vəziyyətinin yaxşılaşdırılmasını, çətinliklərinin həllini daim diqqətdə saxlayan Prezident İlham Əliyevin bu istiqamətdə həyata keçirdiyi siyasət ölkə gəncləri tərəfindən hər zaman yüksək dəyərləndirilir. Prezident İlham Əliyevin gənclərlə keçirdiyi görüşlərdə irəli sürülən təklif və təşəbbüslərin cəmiyyətdə dəstəklənməsi, real həyatda həllini tapması gənclərə dövlət qayğısının bariz nümunəsidir.

Ümummilli Lider Heydər Əliyev hər zaman Azərbaycan gənclərinə inandığını, dövlətimizin gələcək inkişafında onların üzərinə böyük məsuliyyət düşdüyünü qeyd edirdi. Bu gün gənclərimizin ölkənin siyasi, sosial-iqtisadi sahələrində mühüm vəzifələrə təyin olunması, onlara böyük etimad göstərilməsi Ulu Öndər Heydər Əliyev tərəfindən təməli qoyulan siyasətin uğurlu davamıdır.

Vahid MƏHƏRRƏMOV,

Azərbaycan.-2023.- 14 dekabr, № 273.- S.14.