"Bu seçki Prezident İlham Əliyevə xalqın etimadının və inamının növbəti ifadəsi kimi tarixə düşəcək"

"Prezident İlham Əliyevin 2024-cü il fevralın 7-də növbədənkənar prezident seçkilərinin keçirilməsi ilə bağlı sərəncamı Azərbaycan xalqının həyatında yeni bir hadisə olacaq. Bu seçkilər müstəqillik tariximizin ən şərəfli səhifələrindən biri kimi yaddaşlarda qalacaq. Çünki bu dəfə biz qalib xalqın nümayəndələri kimi Zəfər seçkisinə qatılacaq və öz liderimizə səs verəcəyik. Fikrimcə, bu seçki ölkə vətəndaşlarının siyasi iradəsinin ifadəsi olmaqla, Prezident İlham Əliyevə xalqın etimadının və inamının növbəti ifadəsi kimi tarixə düşəcək".

Bu fikirləri qəzetimizə açıqlamasında Milli Məclisin Aqrar siyasət komitəsinin sədri Tahir Rzayev deyib. Komitə sədri bildirib ki, növbədənkənar seçkilərin keçirilməsi dünyada qəbul olunmuş siyasi təcrübədir və beynəlxalq normalara tam uyğundur, eyni zamanda bu seçkilərin keçirilməsi Prezidentin özünə inamının və xalqın dəstəyinə əminliyinin təzahürüdür.

Komitə sədrinin sözlərinə görə, İlham Əliyev qalib ölkənin qalib Prezidenti, Müzəffər Ali Baş Komandanıdır: "Dövlətimizin başçısı dünyada baş verən hadisələri diqqətlə analiz edir və xalqımızın xoşbəxtliyini, dövlətimizin suverenliyini və müstəqilliyini özünün həyat amalına çevirib. Otuz il işğal altında qalan torpaqlarımızın azad edilməsi, antiterror tədbirləri nəticəsində Qarabağda separatizmin kökünün kəsilməsi, Azərbaycanın bütün dünyada tanıdılması və beynəlxalq aləmdə böyük nüfuz qazanması məhz Prezidentin əvəzolunmaz xidmətlərinin nəticəsidir. Bu gün Azərbaycan dünyada iqtisadi cəhətdən inkişaf edən ölkələrdən biri olmaqla bərabər, həm də sülhün, əmin-amanlığın və təhlükəsizliyin təminatçısı kimi çıxış edir. Prezident İlham Əliyev ən mötəbər tədbirlərdə ölkəmizi layiqincə təmsil edir, özünün bəşəri dəyərlərini ortaya qoyur və insanların xoşbəxt yaşayışı naminə sülhün təmin edilməsi istiqamətində bütün gücünü səfərbər edir. Azərbaycan Prezidenti beynəlxalq təşkilatların tribunalarından bəşəriyyəti sülhə səsləyir. Belə addımlar, sözsüz ki, sülhsevər xalqlar tərəfindən yüksək qiymətləndirilir".

İlham Əliyevin bu gün dünyada sayılıb-seçilən dövlət rəhbərlərindən biri olduğunu bildirən Tahir Rzayev əlavə edib: "Azərbaycanı istəməyən bir çox qüvvələr, Qərbin bəzi siyasi dairələri ölkəmiz haqqında bu gün böhtan və şantaj xarakterli materiallar yaymaq, əsassız qətnamələr, qərarlar çıxarmaq, eləcə də Ermənistana dəstək göstərmək üçün əllərindən gələni edir və bizə qarşı düşmən mövqeyində dayanırlar. Belə bir dövrdə növbədənkənar seçkilər Azərbaycanın demokratik dəyərlərə sadiq olduğunu göstərəcək".

Komitə sədri həmçinin hər zaman olduğu kimi, bu seçkilərdə də namizədlərə bərabər imkanların yaradılacağını bildirib. Qeyd edib ki, vətəndaşlar siyasi iradələrini sərbəst formada ifadə edərək, öz namizədlərinə səs vermək imkanına malik olacaqlar.

Tahir Rzayev vurğulayıb ki, Prezident həmişə xalqla bir sırada dayanıb və xalqın mənafeyi uğrunda əlindən gələni edib: "Azərbaycanı işıqlı sabaha aparan, torpaqlarımızı düşməndən xilas edən, ölkəmizi qlobal aləmdə tanıdan və şöhrətləndirən məhz Prezident İlham Əliyevdir. Sözsüz ki, Azərbaycan xalqı bu dəfə də özünün xoşbəxt və firavan gələcəyinin qarantı olan müzəffər liderimiz İlham Əliyevə səs verəcək.

Nəzrin QAFARZADƏ,

Azərbaycan.-2023.- 15 dekabr, № 274.- S.7.