Sülhə yaxınlaşırıq

Əsirlərin dəyişdirilməsi Azərbaycanla Ermənistan arasında vasitəçiyə ehtiyac olmadığını göstərir

"Regionda sülhün bərqərar olması üçün humanist addımların atılması mühüm əhəmiyyət kəsb edir. Bir neçə gün əvvəl Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında danışıqlar aparılması nəticəsində humanizm prinsiplərinə sadiqlik nümayiş etdirilərək, Azərbaycan tərəfindən 32 erməni hərbçinin, Ermənistan tərəfindən isə iki azərbaycanlı hərbçinin azad edilməsi barədə razılıq əldə olundu".

Bu sözləri "Azərbaycan" qəzetinə açıqlamasında Milli Məclisin deputatı Arzu Nağıyev deyib. Deputat xatırladıb ki, Ermənistana qaytarılmış 32 nəfərin 26-sı 2020-ci ilin dekabrında Hadrut istiqamətində keçirilmiş antiterror tədbirləri zamanı həbs edilənlər, qalanı isə müxtəlif vaxtlarda sərhədi keçərkən saxlanılanlardır ki, onlar da cəzalarının böyük hissələrini çəkiblər. A.Nağıyev diqqətə çatdırıb ki, 32 nəfərlik siyahıya Azərbaycan xalqına qarşı müharibə cinayətləri və bəşəriyyət əleyhinə cinayət törətmiş qondarma rejimin rəhbərləri daxil deyillər.

Əsirlərin dəyişdirilməsinin əhəmiyyətindən bəhs edən deputat qeyd edib ki, bu mübadilə gələcəkdə iki ölkə arasında sülhün bərqərar olması baxımından əhəmiyyətlidir. "Dumanlı şəraitdə yolu azaraq Naxçıvan tərəfdən Ermənistana keçmiş iki azərbaycanlı hərbçi əsir götürülərək onlara qarşı bir sıra cinayətlərin törədilməsinə dair saxta ittihamlar irəli sürülmüş, qurama məhkəmələrin qərarları əsasında həbs olunmuşdular. 44 günlük Vətən müharibəsindən, həmçinin bu ilin antiterror tədbirlərindən sonra Azərbaycan ərazisinə keçərək təxribatlar törətməyə cəhd edən bir qrup erməni hərbçi də saxlanılmışdır", - deyə A.Nağıyev əlavə edib. O bildirib ki, Azərbaycan və Ermənistan arasında əldə olunmuş razılığa əsasən, bu mübadilə humanist bir addımdır və gələcəkdə iki ölkə arasında sülh müqaviləsinin imzalanması istiqamətində atılacaq addımlarda çox mühüm əhəmiyyət kəsb edəcək. Bundan başqa, Ermənistan Birləşmiş Millətlər Təşkilatının İqlim Dəyişmələri üzrə Çərçivə Konvensiyasına tərəf dövlətlərin 29-cu konfransına evsahibliyinə öz namizədliyini geri götürərək Azərbaycanın namizədliyini dəstəkləyib. Bu da çox mühüm addımdır və Azərbaycan-Ermənistan arasında, həmçinin regionda sülhün bərqərar olması üçün önəmli bir hadisədir. Deputat əlavə edib ki, mübadilə prosesi vaxtilə Xocalıda, Xankəndidə cinayət törətmişlərə və separatçıların rəhbərliyinə şamil olunmur. "Cənab Prezidentin bu humanist addımı iki hərbçimizin ailəsinə böyük sevinc, səadət, xoşbəxtlik gətirdi. Bu, dövlətimizin əsgərinə, zabitinə, Vətən keşiyində duran hər bir şəxsə qarşı atdığı humanist addımdır və təqdirəlayiq hal kimi dəyərlənməlidir", - deyə o bildirib.

Mübadilənin heç bir vasitəçi olmadan Azərbaycan və Ermənistan arasında birbaşa danışıqlar nəticəsində baş tutduğunu xatırladan A.Nağıyev regionda sülhün bərqərar olması üçün vasitəçilər olmadan addımlar atmağın mümkünlüyündən də bəhs edib. O vurğulayıb ki, istər ABŞ, istər Qərb dövlətləri vasitəçilik missiyasını həyata keçirərək özlərinin bu rolundan istifadə etməyə, bu və ya digər şəkildə Cənubi Qafqazda aparılan siyasətə öz təsirlərini göstərməyə çalışırlar. Lakin Azərbaycanın öz daxili və xarici siyasəti var, birbaşa danışıqlar da bunun təzahürüdür.

Əsmər QARDAŞXANOVA,

Azərbaycan.-2023.- 15 dekabr, № 274.- S.5.