Azərbaycanın hərbi-siyasi gedişlərinin uğurlu nəticəsi

Azərbaycan xoşməramlı addım olaraq 32 erməni hərbçini, Ermənistan isə 2 azərbaycanlı hərbçini azad edib. Bu, Azərbaycanla Ermənistan arasında etimad mühitinin yaradılması istiqamətində atılmış mühüm addımdır. Prezident İlham Əliyevin uğurlu hərbi-siyasi gedişlərinin və diplomatik bacarığının nəticəsi kimi təzahür edən əsir mübadiləsi iki ölkə arasında sülh müqaviləsinin imzalanması ehtimalını da artırır.

Bu mövzu ilə bağlı "Azərbaycan" qəzetinə danışan Milli Məclisin deputatı Bəhruz Məhərrəmov deyib ki, Azərbaycan Respublikası Prezidentinin Administrasiyası və Ermənistan Baş nazirinin Aparatının dekabrın 7-də birgə açıqlamasında da ifadə olunduğu kimi, artıq hər iki ölkə regionda çoxdan gözlənilən sülhün əldə olunması üçün tarixi fürsətin yarandığı fikrini bölüşərək münasibətləri normallaşdırmaq, suverenlik və ərazi bütövlüyü prinsiplərinə hörmət əsasında sülh sazişinə nail olmaq niyyətini bir daha təsdiq edir: "Bu gün əsirlərin mübadiləsi etimad quruculuğu prosesində mühüm addım, bizi yekun sülhə yaxınlaşdıran ciddi amil kimi dəyərləndirilə bilər. Əsirlər arasında say nisbətinə gəlincə, unutmamalıyıq ki, bu, əsirlərin dəyişdirilməsi yox, humanizm dəyərlərinin rəhbər tutularaq etimad quruculuğuna yönəlik və sülhü hədəfləyən xoşməramlı addımdır. Həmçinin Azərbaycan tərəfi xalqa və dövlətə qarşı konkret cinayətlərə görə ittiham olunan şəxsləri, o cümlədən separatçıların liderləri və digər terrorçuları təhvil vermir".

Deputat qeyd edib ki, əsirlərin mübadiləsi 7 dekabr birgə bəyanatının ardınca Qafqazda sülhə doğru aparan ikinci addımdır: "Razılığa müvafiq olaraq, bundan öncə Ermənistan COP29-a evsahibliyinə öz namizədliyini geri götürərək, Azərbaycanın namizədliyini dəstəkləmişdi. Azərbaycan isə xoş niyyətin təzahürü olaraq, Ermənistanın Şərqi Avropa Qrupundan COP-un Büro üzvlüyünə namizədliyinə dəstək vermişdi. Əlbəttə, bu kimi nəticələr iki ölkə arasında qarşılıqlı etimadın yaradılmasına töhfə verir. Beynəlxalq ictimaiyyət də bu səyləri dəstəkləməlidir".

Bəhruz Məhərrəmovun sözlərinə görə, mövcud situasiya proseslərin təbii axarının nəticəsi deyil, bu reallığa Prezident İlham Əliyev hərbi-siyasi yolla nail olub. Əgər Azərbaycanın istər Vətən müharibəsindəki qələbəsi, dövlət başçısının qətiyyəti ilə aprel ayında Laçın sərhəd-buraxılış məntəqəsinin təsis edilməsi olmasaydı, habelə antiterror tədbirləri ilə cəmi 23 saata separatizmə öldürücü zərbə vurulmasaydı, bu gün etimad quruculuğu prosesi və yekun sülhə doğru real addımlardan danışa bilməzdik.

Nəzrin QAFARZADƏ,

Azərbaycan.- 2023.- 15 dekabr, № 274.- S.5.