Seçkilərə möhtəşəm uğurların fonunda gedirik

Xalqımız şanlı Zəfərimizin memarına səs verəcək

2024-cü ildə ilk dəfə suverenliyi tam bərpa olunan Azərbaycanın bütün ərazilərində prezident seçkiləri keçiriləcək. İlham Əliyevin sərəncamı ilə növbədənkənar prezident seçkiləri növbəti il fevralın 7-də baş tutacaq. Bu dəfə qalib xalqın nümayəndələri seçkilərdə qalib vətəndaşlar kimi səs verəcəklər.

Yeni Azərbaycan Partiyasının növbədənkənar prezident seçkilərində namizədi İlham Əliyev olacaq. Mövzu ilə əlaqədar "Azərbaycan" qəzetinə danışan Milli Məclisin deputatı Vüqar İskəndərov qeyd edib ki, Azərbaycan öz tarixinin şanlı dövrünü yaşayır və ölkəmiz bütün sahələrdə bir-birini əvəz edən uğurlar əldə edir: "2024-cü il fevralın 7-də keçiriləcək prezident seçkilərinə də bu uğurlar fonunda gedirik. Azərbaycanın ərazi bütövlüyü və suverenliyi tam bərpa edilib. Buna Prezident İlham Əliyevin rəhbərliyi ilə həyata keçirilən qətiyyətli siyasət nəticəsində nail olunub".

Deputat vurğulayıb ki, 2018-ci ildə İlham Əliyev yenidən Prezident seçildikdən sonra xalqımızın qarşısında duran ən mühüm problem - ərazi bütövlüyümüzün bərpası prosesinin son tamamlama mərhələsinə start verərək qısa zamanda ölkəmizin, xalqımızın bütün potensialını vahid məqsəd uğrunda səfərbər etdi. Həmin seçkilərdən cəmi iki il sonra - 2020-ci il sentyabrın 27-də başlamış Vətən müharibəsi Azərbaycanın tarixi qələbəsi ilə başa çatdı. 2023-cü il sentyabrın 20-də lokal antiterror tədbirləri isə ərazi bütövlüyümüzün və suverenliyimizin tam bərpası prosesini tamamladı.

V.İskəndərovun sözlərinə görə, ərazi bütövlüyümüzün və suverenliyimizin bərpası həm regionda, həm də ölkəmizdə yeni reallıqlar yaradıb. Məhz bu kontekstdən yanaşanda bu seçkilərin tarixi əhəmiyyəti bir daha önə çıxır. Çünki müstəqil Azərbaycanın tarixində ilk dəfə olaraq seçkilər bütün ölkə ərazisində keçirilir. "Bu seçkilər ərazi bütövlüyümüzün və suverenliyimizin təsbitidir. Xalqımız bu seçkilərə xüsusi əhvali-ruhiyyə ilə gedir. Qalib ölkənin vətəndaşları bütün ərazilərində suverenliyi bərpa edilən ölkənin növbəti prezidentini seçəcək. Təbii ki, xalqımız Azərbaycanın tarixinə şanlı Zəfəri yazan cənab İlham Əliyevə səs verəcək", - deyə deputat əlavə edib.

Əsmər QARDAŞXANOVA,

Azərbaycan.-2023.- 15 dekabr, № 274.- S.7.