YAP-ın namizədi xalqın namizədidir

Yeni Azərbaycan Partiyasının İdarə Heyətinin dünən keçirilmiş genişləndirilmiş iclasında ölkə Prezidenti, partiyamızın Sədri İlham Əliyevin növbədənkənar prezident seçkilərində namizədliyinin irəli sürülməsi ictimaiyyət tərəfindən dərin razılıq və sevinclə qarşılanmışdır. Çünki cənab İlham Əliyev yalnız sıralarında 720 min nəfərdən çox üzvü birləşdirən YAP-ın deyil, bütün xalqımızın namizədidir. Buna görə YAP İdarə Heyətinin qərarı yüksək siyasi-ictimai dəyərə və ehtirama layiqdir.

Qarşıdan növbədənkənar prezident seçkiləri gəlir. Prezident İlham Əliyevin sərəncamı ilə növbədənkənar prezident seçkiləri 2024-cü il fevralın 7-nə təyin edilib. Mərkəzi Seçki Komissiyası tərəfindən də seçkilərin keçirilməsi üçün qanunvericilikdə nəzərdə tutulmuş əsas hərəkət və tədbirlərin müəyyən edilmiş qaydada və müddətdə reallaşdırılması üçün Təqvim Planı təsdiq olunub. Bu, xalqımızın Ulu Öndəri Heydər Əliyevin ilk dəfə Prezident seçildiyi 1993-cü ildən bəri Azərbaycanda demokratik şəraitdə keçiriləcək sayca 7-ci prezident seçkisi olacaq.

Seçkilərin növbədənkənar keçirilməsinə gəldikdə isə, bu, bütün dünyada qəbul olunmuş siyasi təcrübədir. Belə ki, seçkilər bəzi hallarda müəyyən səbəblərdən təxirə salınır, bəzi hallarda isə vaxtından əvvəl keçirilir. Seçkilər növbədənkənar keçiriləndə sadəcə seçicilər öz siyasi iradələrini vaxtından əvvəl ifadə edirlər. Azərbaycanın Seçki Məcəlləsi növbəti prezident seçkilərinin keçirilməsi ilə növbədənkənar prezident seçkilərinin keçirilməsi arasında hər hansı prosedur, yaxud müddət fərqi müəyyən etmir.

Böyük qürur hissi ilə qeyd etmək istərdim ki, sıralarında təmsil olunduğum YAP-ın İdarə Heyətinin respublikamızın siyasi həyatında böyük hadisə kimi dəyərləndirilən genişləndirilmiş iclasında Prezident İlham Əliyevin namizədliyinin irəli sürülməsi xalqımızın iradəsini ifadə edən tarixi qərardır. Xalqımızın bu siyasi qərar ətrafında səfərbər olmasının təməlində ötən 20 ildə Prezident İlham Əliyevin rəhbərliyi ilə Azərbaycanın keçdiyi inkişaf yolu, qazandığımız möhtəşəm nailiyyətlər və Heydər Əliyev siyasi kursuna olan böyük inam dayanır.

20 il əvvəl, 2003-cü ilin prezident seçkilərində xalqımız ilk dəfə cənab İlham Əliyevə etimad göstərməklə inkişafa, quruculuğa, qüdrətli dövlətçiliyə səs vermişdi. Həmin vaxtdan ötən hər bir ilin yekunu Prezident İlham Əliyevin fəaliyyətinin uğurlu hesabatı kimi tariximizə həkk olunub. Hələ ilk dəfə Prezident seçilərkən andiçmə mərasimində cənab İlham Əliyevin Azərbaycanın gələcəyi və perspektiv planlarla bağlı söylədiyi fikirlər həyatda öz təcəssümünü tapıb. Dövlət başçısının verdiyi bütün sözlər həyata vəsiqə alıb.

20 ildə Azərbaycan böyük yüksəliş yolu keçib, modern dövlətə çevrilib, dünyanın həsəd apardığı inkişaf nümunələrinə imza atıb. Mühüm enerji və nəqliyyat layihələrini həyata keçirən, regionun tranzit-logistik qovşağına çevrilən, kosmik kluba daxil olan Azərbaycan əldə etdiyi bu kimi hazırda regionun aparıcı dövləti, dünyada isə söz sahibidir və beynəlxalq mövqelərimiz əhəmiyyətli dərəcədə güclənib. 20 ildə Azərbaycan iqtisadiyyatının bütün sahələri, o cümlədən regionlarının iqtisadi potensialı hərəkətə gətirilib, aparılan quruculuq işləri nəticəsində şəhər və rayonlarımızın siması dəyişib, ölkə vətəndaşlarının sosial rifahı əhəmiyyətli dərəcədə yüksəlib, neftdən gələn gəlir insan kapitalının inkişafına yol açıb. 20 ildə Azərbaycanda ümumi daxili məhsul 6,2 milyard manatdan 78,7 milyard dollara çatıb. ÜDM-in real həcmi isə 4 dəfə artıb.

Bütün bunlar Prezident İlham Əliyevin inkişaf konsepsiyasının nə qədər düzgün və səmərəli olduğunu göstərir. Bu, inkişafın Azərbaycan modelinin mükəmməl təqdimatıdır.

Prezident İlham Əliyevin ölkəmizə rəhbərliyinin ən möhtəşəm və tarixi hadisələri Vətən müharibəsində torpaqlarımızın işğaldan azad olunması, 2023-cü ilin sentyabrında isə Qarabağda milli suverenliyimizin təmin edilməsidir. Ümumiyyətlə, 2003-cü ildə Prezident səlahiyyətlərinin icrasına başladığı ilk gündən cənab İlham Əliyev Qarabağ məsələsində qətiyyətli və Azərbaycanın milli maraqlarını rəhbər tutan siyasət yürüdüb. Dövlətimizin başçısı ölkəmizin mənafelərinə zidd olan heç bir təşəbbüsü və təklifi qəbul etməyib, heç yaxına buraxmayıb.

Prezident İlham Əliyev sülh danışıqlarına sadiq olmaqla yanaşı, torpaqlarımızın müharibə yolu ilə işğaldan azad edilməsi imkanlarını da diqqət mərkəzində saxlayıb. Bu məqsədlə cənab Prezidentin xüsusi diqqəti və təşəbbüsləri ilə Azərbaycan Silahlı Qüvvələrinin döyüş imkanları ən müasir tələblər səviyyəsinə çatdırılıb. Və bu ordu 44 günlük Vətən müharibəsində İlham Əliyevin Ali Baş Komandanlığı ilə öz tarixi vəzifəsini layiqincə yerinə yetirərək torpaqlarımızı işğaldan azad etdi.

2023-cü ilin sentyabr ayında Prezident İlham Əliyev dövlətçiliyimizi şərəfləndirən növbəti tarixi uğura müəlliflik etdi. Dövlətimizin başçısının qətiyyəti, ordumuzun qəhrəmanlığı ilə Qarabağdakı erməni separatçılığı darmadağın edildi. Bununla da Prezident İlham Əliyev Azərbaycan torpaqlarında ikinci erməni dövləti yaratmaq kimi mənfur ideyanı tarixdən birdəfəlik sildi.

Bu xüsusda onu qeyd etmək yerinə düşər ki, qarşıdan gələn prezident seçkiləri Azərbaycanın müstəqillik tarixində ilk dəfə olaraq bütün torpaqlarımızın işğaldan azad edildiyi tarixi şəraitdə keçiriləcək. Bu faktın özü Prezident İlham Əliyevin Azərbaycana uğurlu rəhbərliyinin olduqca mühüm göstəricilərindən biridir.

Prezident İlham Əliyevin ötən 20 ildəki fəaliyyətinin daha bir şərəfli səhifəsi isə Vətən müharibəsindən ötən müddət ərzində işğaldan azad olunmuş ərazilərin bərpasıdır. Ötən 3 ildə bu istiqamətdə görülən işlərin sürəti və miqyası Prezident İlham Əliyevin vətən sevgisindən, milli təəssübkeşliyindən, qətiyyətindən və siyasi iradəsindən xəbər verir.

Dövlətimizin qarşısında yeni hədəflər dayanır. Qarabağ və Şərqi Zəngəzurun bərpasının sürətlə davam etdirilməsi, keçmiş məcburi köçkünlərin öz doğma yurdlarına dönüşü, iqtisadi inkişafın davamlılığı, dinamik və inklüziv cəmiyyətə nail olmaq, insan kapitalının inkişafı kimi məsələlər qarşıda dayanan milli vəzifələrdir.

Azərbaycan xalqı növbəti prezident seçkilərinə ötən 20 ilin möhtəşəm uğurları və qarşıda duran milli priorietlərlə gedir. Seçkilərin nəticəsini də bu uğurlar və bütövlükdə ötən 20 ilin reallıqları müəyyən edəcək. Ona görə əminliklə deyə bilərik ki, ötən prezident seçkilərində olduğu kimi, bu dəfə də vətəndaşlarımız öz müdrik seçimlərini edərək Azərbaycanın inkişafını, yüksəlişini təmin edən, bizi dünyada qalib xalq və dövlət kimi tanıdan siyasətə səs verəcəklər. Cənab İlham Əliyevin rəhbərliyi ilə Azərbaycan qarşıdakı illərdə də hərtərəfli inkişaf edəcək və inamla öz hədəflərinə çatacaq.

Cəbi QULİYEV,

Milli Məclisin deputatı

Azərbaycan.-2023.- 16 dekabr, № 275.- S.7.